Read Biete 2 TIMOTHEA 2 Bible Online

2 TIMOTHEA 2 - Biete bible

2 TIMOTHEA 2

¹Ki naipa, nang chu Krista Jisua lungkhamna hin nang inrât riseh.

²Riatpuitu itam takkahei riata keima rithoka riseina nî riathei khah mi iamom, mi dang inrisei nôk thei ranghei ziangah inkol roh.

³Krista Jisua sipai iamomtak angkan intak ne tuangpui roh.

⁴Sipai chu â ruitu ân lôm theina rangin, ridoi lâiin hi ringlâi vângsaknah hin rizêl ngai mak e.

⁵Khante, risiakna ṭanghei khom dân angkah taka an itlân non chu loman mu ngai mak e.

⁶Loi sinah khom isin zâltak isongtu khah â râ dong masa rang tak a nit.

⁷Ki ṭong hih iṭha takkan ngaitua roh, Pumapan lam tinrêngah riatthiamna nang pêng a ti.

⁸Thurchi Ṭha nang ki îril ngai, Jisua Krista, Davida richia mi, thina rithoka thoinôk tâka thu khah remai roh.

⁹Kha Thurchi Ṭha sikah khan dengtheina ki tuang a, mi sual angkah taka zingziria khuap ki nit a; khanniseh, Pathian thu chu ikhuap thei chi ni mak e.

¹⁰Khasikah khan, Krista Jisuaa om, saninringna khah, kumtluang roinpuina neh an dong theina rangin Pathian mi rithlanghei sikin hihei murdi hih kî tuang a nit.

¹¹Hi thu hih â dik a nit: “A thina ei itlângpuiin chu, A ringna khom itlângpui ei ti.

¹²Ei tuangin chu a roirêlnaah rêlpui ei ti. Amah ei phialin chu ani khomin ne phial a ti.

¹³Eimani iiamom no khom eila, Ani chu iiam a om mai a, Amah neh amah riphial ngai mak.”

¹⁴Hi thu hih ni mihei iril mai roh, thu chanlamboiah an rider nona rangin Pathian mitmuah thu peh roh. Kha ridernaah khan îte ṭhatna omak a, arngaituhei bang a îsiat ngai a nit.

¹⁵Sinithotu, Pathian thutak thu ifel takka mi inriseia, a sintho izakpui rang ai nit ino angkan, Pathian mitmuah ihamna tak tak ni dong theina rangin zâltak song roh.

¹⁶Pathian ngîknona neh thu chanlamboi isîrna chu nungsong roh; amakhan Pathian ngaisak nona tiang mihei a ṭhui inlat tîr tîr ngai.

¹⁷Kha an thu inrisei khah taksa fah zoi ngai pânisia angkah a nit. An lâiah mi inikah Humenaia neh Fileta khah a bulpui an nit.

¹⁸Kha mihei khan thutak lampui an pêt a, “Thoinôkna chu a tlung zoi pial tâk,” itin, mi ṭhenka iamna khom an inboi pêk ngai.

¹⁹Nikhomseh, Pathian lungphûm idettak kha chu inîng thei mak, amakhan, “Pumapan a mihei chu a riat,” iti neh “Pumapa riming rilamhei murdîn sual nung an song ngêt rang a nit,” iti riziak a chuang.

²⁰In roinpui takah hin bûrbêl chi tinrêng a om a, ṭhenkah chu rângkachak neh tangkarua siam a nit a, ṭhenkah chu thing neh ipila siam a nit. Ṭhenkah chu zoron dang bîka mang rang a nit a, ṭhenkah chu nîn tina mang rang a nit.

²¹Tukhom kha thil ṭhano tinrêng ata khah arkiangin chu bûrbêl ilu, a pu ta ranga mang inrup, risûnfâi diam, sin iṭha tinrêng ithona ranga imang thei ranga risiam thlâm angkah hi hong nîng a ti.

²²Vânglâi rizukna nungsong inla, lungril rithiang taka Pumapa rilamtuhei neh khan dikna hei, iamna hei, lungthlungna hei, ringeina hei rizûl roh.

²³Hi riderna invêt neh rifena boi hih nungsong roh, ringo risualna bang a îsua ngai a nit.

²⁴Pumapa som khan chu ringo risual a song rang ni mak a, mi murdi chunga lungindâi thei, minriseitu ṭha, lungisôt mi a nit rang a nit;

²⁵ama doituhei ringaiichîn takka kôiilîm thei mi a nit rang a nit; khanchu, ama doituhei khom khah Pathianin rilet zoro pêng a ta, thutak la hong riang an ti.

²⁶Khangkan, Diabola chânga ôk, a nuam a însin ngaihei chu hong isuakin, an hong har nôk duai tâk lôiim.