Read Biete 2 TIMOTHEA 3 Bible Online

2 TIMOTHEA 3 - Biete bible

2 TIMOTHEA 3

¹Sûn nungkhônah chu zoro khir takhei la hong tlung a ti iti remai roh.

²Marangṭhat izong mihei, kuatinkam mihei, risonghei, ripâkhei, Pathian sîrinsiahei, nu neh pa ngîk inohei, lôm nachâng rianohei, rithiang inohei,

³suakpui lungthlungna nei inohei, mi nunisia hei, mi nô ngaihei, ridîn thei inohei, mi tôksolhei, mi that inuamhei, ṭhatna nelhei,

⁴vârrilethei, lungirâthei, ringaiinluhei, Pathian lungithlung nêka mahni lômna bang lungithlunghei la suak an ti.

⁵Chungtiang chu sakhua mi reng ang an ta; nikhomseh, a sinthotheina tak chu ôi no nih. Kha mihei khah nungsong roh.

⁶Khahei lâia mihei kha kêng mi inheia lêng a, sual puakrik ipêl nupang intlo ualhei suaka man ngaituhei chu an nit; khangkana nupanghei khah rizukna tinrênga ṭhuiinrimang,

⁷iria tum maia thutak reh thei tlak inohei an nit.

⁸Janni neh Jambri khan Mosia an idoi angkah khan, kha mihei khom khan thutak an doi ngai; an lungril mangsang a chang tâk a, iamna lamah khan Pathian nuam lam mi ni khâi mak e.

⁹Nikhomsela, kha ban kha chu thil dang tho thei ual no nih, Janni neh Jambri chunga tlung angkah ngirah khan mi tinin an intlôk tlia la mûng an ti.

¹⁰Khannisela, nang chu ken riseina hei, ki om dân hei, ki thiltum hei, ki iamna hei, ki tuangtheina hei, ki lungthlungna hei, ki diarna hei ni zui a;

¹¹mîn nuam an ne lona hei, dengtheina ki chunga tlunghei khom khah ni riat a. Antiokeiah, Ikoniomah neh Lustra khuaa nuamlona inrît kî tuang natinsatzia neh khahei murdi ata khah Pumapan a ne kêlisua tâk thuhei kha nî riat a nit.

¹²Tukhom Krista Jisua neh rizoma Pathian ngaisakna ringnuna om inuam kangân chu nuamlona tuang an ti.

¹³Mi sualhei neh mi lêmsiahei kha chu mihei ilêmin neh anni khom ilêma omin isual tîr tîr an ti.

¹⁴Khannisela, nang chu, thutak ni irseihei tâk neh ni îpom indet tâk khah ituh ngit roh, tûm nang inrisei kha nî riat a nit.

¹⁵Ni naipangte lâi ata Thubu Rithiang chu ni riat inchial tak tak a, Krista Jisua iam sika saninring inih ranga nang invâr thei a nit iti ni riat.

¹⁶Pathian Thubu tin hih Pathian rithuak khuma riziak a nit sikin thutak inriseina rang hei, dikino rikôkna rang hei, â châi intlûnna rang hei neh nunchan dik taka lêngna ranga rilna ranghein ai nang tak tak a nit.

¹⁷Khangkan imang a nitin chu Pathian mi khah imang inrup a hong nit a, sin iṭha tinrêng itho ranga inrithluk a hong init ngai a nit.