Read Biete TITA 1 Bible Online

TITA 1 - Biete bible

TITA 1

¹Keimah Paula hi, Pathian suak neh Jisua Krista tirtôn, Pathian mi rithlanghei iamna lama kâiruai rang neh

²ei sakhua tiang thu dik, kumtluang ringna tûngna kha inreh ranga rithlang ki nit. Pathian, milak tho ngai ino khan kha ringna khah leilung insiang ma ata a lei inkung a,

³amakhah a zoro inkung takah khan a thuchaah a zuang înlang tâk a, ne saninringtu Pathian thupêk angkan kha Thurchi Ṭha puang indarna sin khah inkol ki nit.

⁴Ei rêngka ei îpom iamna sika ki nai tak tak Tita, chibai nang ki bûk a. Pa Pathian neh ne saninringtu Krista Jisua ziang ata lungkhamna neh ringeina ni ziangah om riseh.

⁵Thil infel la nanghei infel rangin Kret tuihualah nang kî mâk a nit, thu nang kî pêk angkah khan kho tinah koindang upahei phun pêk roh.

⁶Upahei[1] chu sêlnaboi, nupui khatka nei,[2] a naihei khom Pathian iiama, hoiinhâina lama isêl kâi ino neh tuklul lian ino an nit ngêt rang a nit.

⁷Koindang ruaitu chu Pathian insungkua enkoltu a nit a, sêlnaboi a nit rang a nit. Mi tuklul ilian, lungirât, uain inrui mi, mi tôksol, dik ino taka lepinrûk inuam mi a nit rang ni mak e.

⁸Mi don ithiam neh thil iṭha lungithlung mi, ridîn ithei, mi dik, mi rithiang, mi fel a nit ngêt rang a nit.

⁹Inriseina dik takin mi â thor theina rang neh kha inriseina sêltuhei khah thiamno ân chang theina rangin thurin neh rimea thucha iamom khah â tuh ngit mi a nit sa rang a nit.

¹⁰Rihela, mi lêm ngai itam takka an om a, a bîkin Juda sakhua ata hong rilethei khah an nit ual.

¹¹Annihei khah an bâi iruk pêk rang a nit; sum imu tumin an inrisei loirua inriseiin a inpum pumin mihei lungbuai an sak ngai a.

¹²Kret mihei lâia zânthla khatkah khomin, “Kret tuihual mihei chu mi mînlak, sarâng pualoi neh thaboi rôlruak hei an nit,” ai ti hi thu dik tak a nit.

¹³Khasikah khan iamna dik an nei theina rangin inah takkan rikôk roh.

¹⁴Judahei phûng neh thutak nungisonghei thupêk khah zôm khâi no riseh.

¹⁵Mi rithianghei ta rangin chu tinrêng hih arthiang a; khanniseh, mi nimhei neh iam inohei ta rangin chu îte arthiang zel omak e; an lungril neh an sia neh ṭha riatna ten khom a înim a nit.

¹⁶Pathian iria an riti a; nikhomsela, an sintho khan ai phial ngai a nit. Khahei khah nel iom neh thu zôm ino an nit a, thil iṭha sin rang rêng rênga mangmunboi an nit.