Read Biete TITA 2 Bible Online

TITA 2 - Biete bible

TITA 2

¹Nangman chu thurin dik nen risei mai rang a nit.

²Putarhei chu ridîn ithiam, maritiom, lungril ifel, iamna dik, lungthlungna nei mi, tuangidiar mi inih rangin ithor roh.

³Khangkah ngirin pitarhei khom an châng dânah Pathian iṭi mi inih rangin ithor inla, mi sîrinseh ngai neh uain idu mi an nit rang ni mak e. Thil iṭha mi inrisei song sela,

⁴la nûnngâk ualhei khah an pasalhei neh an naihei lung an thlung rang tlia hei,

⁵ridîn itheia rithiang takka an om rang tlia hei neh inchongpinu ṭha tak inia an pasalhei zianga an ribilriam rang tlia hei inrisei riseh. Khanchu, Pathian thu hih isîrinsian om no nih.

⁶Khangkah ngirin tlangvâlhei khom mahnia ridîn thei rangin ithor roh.

⁷Nangmah vâng chu thil tinrêngah nunchan iṭha mi inmutu ni nit ngêt rang a nit. Marit tak neh ṭhatnemringai takkan mihei inrisei ngai inla,

⁸ṭongbâi ithlum, sêlna rang om ino khah mang ngai roh; khanchu, ei irâlhei khan an ne sîrinsiatna rang rêng rêng mu no nia, izak an irmu rang a nit.

⁹Suakhei chu lam tinrêngah an puhei richam chama oma an puhei lungintluk rangin ithor roh. An puhei an sâm rang ni mak,

¹⁰an puhei neinun khom an irûk rang ni mak e. Iru nêkan lam tinrêngah iamiom takkan an om rang a nit; khanchu, ei Pathian ne saninringtu inriseina thu hih îtinrêngah a lutzia an înlang rang a nit.

¹¹Mi murdi saninring an nit theina rangin Pathian lungkhamna chu inlang a nit tâk a.

¹²Kha lungkhamna khan Pathian ngaisak nona neh rammual rizuknahei imaraka hi rammualah hin ridîn tak neh ifel taka om a, Pathian ingaisaka om a,

¹³ei itûng, ei Pathian roinpuitak neh Saninringtu Jisua Krista zuang inlâr nî hamṭhatna Nikhua khah ingâk rangin a ne înrisei a nit.

¹⁴Amah ngêi kha ei rithûlin arpêk a, siatna tinrêng ata a ner tlan isua a, ama mi inih rangin a nen rithiang a, sin iṭha sin rang rizukna a ne înnei a nit.

¹⁵Hi thu hih nen risei rang a nit; ithor inla, richam inei takkan ril roh. Tutên nang enkhûm no riseh.