Read Biete HEBRAI 1 Bible Online

HEBRAI 1 - Biete bible

HEBRAI 1

¹Tianlâiah khan Pathianin ei chibulhei ziangah a zânthlahei imangin lam tinrêngah thu a lei isîr ngai a.

²Khannisela, atûn zoro nungkhônheiah hin chu ei ziangah a Naipaah khan thu a îsîr tâk a nit. Ani chu richon murdi â luatu rangin ai phun a nit a, ama mangin rinêng neh rivân hi ai siam a nit. Ani khah Pathian roinpuina vâr neh,

³Pathian zepui riputu tak a nit; tinrêng hi a thutak sinthotheinan â tûk inding a, sual fâina lampui a siam zoi nungin Chungnungtaka kut changtiang, rivânah a hang iṭhung tâk.

⁴Vântirtônhei riming nêka riming roinpui ual lei inei ai nit angkan Naipa chu anni nêka roinpui ual a hong nit tâk a.

⁵Pathianin hi ṭong hih vântirtônhei ziangah ti tlak ngai mak e, “Nang chu ki Naipa ni nit a; Vuanah hin naipan nang ki nei tâk,” iti hih. Khabanah, Pathianin vântirtôn chungchâng isîrin, “A ta rangin Pa nîng ki ta, Ki ta rangin Naipa nîng a ti,” iti ṭong hih ti ngai mak e.

⁶Pathianin a Nai lutîr kha chu hi rammualah a zuk tirah khan, “Pathian vântirtôn murdîn Ani chu chubai ûn riseh,” ai ti a nit.

⁷Vântirtônhei chungchângah chu Pathian Thubûn hingkan a ti, “Pathianin a vântirtônhei chu ithli ân chang ngai a, Â somhei chu meichok ân chang ngai,” a ti.

⁸Naipa chungchâng rêk chu Pathianin hingka hin ai ti a nit: “O Pathian, ni rêngram chu kumkhuakan om mai a ti. Dikna rêng irol chu ni ram rêng irol a nit.

⁹Dikna nen lut a, dikino chu ni nel ngai. Khasikin, Pathian, ni Pathian khan, Ni rualhei nêkan ditsakna riak nang a înrithu tâk a nit hi,” iti hi.

¹⁰Hingkah hin khom a ti sa: “O Pumapa, a tîrin rinêng hi ni siam a, Rivân khom khi ni kutsuak a nit.

¹¹Khahei kha chu la boi an ta, Nang chu om mai ni ti. Khahei kha chu puansil angkan la lui an ta,

¹²Puan angkan la thlep ni ta, Puansil angkan ithleng la nîng an ti. Nang chu ni ngaingir ni nit mai a, Mong nî nei no tin,” iti hi.

¹³Pathianin a vântirtônhei lâia tute ziangah hi ṭong hih ti ngai mak e: “Ne râlhei ni kepha sia nan ki siam mâkah, Ke changtiang iṭhung roh,” iti hi.

¹⁴Khate, vântirtônhei hih im an init? Vântirtônhei chu Pathian sin itho ngai rithlahei, saninringna changtuhei sin itho pêk ranga itirsuakhei an nit.