Read Biete HEBRAI 10 Bible Online

HEBRAI 10 - Biete bible

HEBRAI 10

¹Dân khan thil iṭha la hong iom ranghei rilim, a tak ni no, arlim bang a nei sikin, kum tina ribôlna ngaingir an ilan mai ngaihei khan â lantuhei khah ingkah khomin tlukrikipin ai siam thei ino a nit.

²Tlukrikipin siam thei sela chu, ribôlna lantuhei hih inrithiang an nit tâk a, sualah an rimang iti riatna nei khâi no nia, ribôlna lan khah an irngam pial rang tâk ni mak im a?

³Khannisela, hi ribôlna hin mihei an sual kum tin a înriat nôk ngai a nit.

⁴Sechalhei neh kêlchalhei thisenin sualhei khah inboi thei ni tlak mak e.

⁵Khasikin, rammualah a zuang lâiah khan hingka hin a ti: “Ribôlna neh thillan nuam mak che a, Keima ta rangin takpum ni nen rifûk pêk tâk a.

⁶Hâlrivâm ribôlna neh sual ribôlna khah, Lôm tlak mak che.

⁷Khanchu, keiman, ‘O Pathian, ringai ta, Dân lekhabu zuata ki thurchi riziak angkah khan, Ni lungdo sin rangin keimah hin ki om,’ ki ti a,” itin.

⁸Amasan, “Ribôlnahei, thillanhei, hâlrivâm ribôlnahei neh sual ribôlnahei khah nuam mak che a, ilôm khom lôm mak che a,” a ti a. Kha ribôlnahei khah Dân angkah taka lan ni khom seh khangkan ai ti a nit.

⁹Khanchu, “O Pathian, ringai ta, ni lungdo sin rangin keimah hin ki om,” a ti nôk a. Khasikin, Pathianin ribôlna luihei khah ân boi riai a, khahei rithûlah khan Krista ribôlna hih ai sia tâk a nit.

¹⁰Jisua Krista khan Pathian lungdo a sin a, kumkhuaka rangin voikah a takpum a lan sikin ei rêngkan sual ata inrithiang ei init tâk a nit.

¹¹Thiampuhei khan kôl nisuak itepa sinin ribôlna ngaingir khah voi itam takkah an lan mai ngai a; nikhomsela, kha ribôlnahei khan ingkan khom sual inboi thei tlak mak e.

¹²Krista rêkin chu, kumkhuantluangka rangin sual ribôlna voikah bang a lan nungin, Pathian changtiang a hang iṭhung tâk a.

¹³Â râlhei a kepha siana siam an nit zoro chu amakhan ai ngâk tâk a nit.

¹⁴Voikah ribôlnaa arlannaah khan an sual ata a înrithiang tâkhei khah kumkhuantluangka rangin tlukrikipin ai siam tâk a nit.

¹⁵Rithla Rithiang khomin hingka hin a nen riat a:

¹⁶“Nikhua hong itlung ranga an zianga Thu ki thlung rang chu, Amahih a nit, Pumapan a ti; An lungsungah ki Dânhei siang ki ta, An lungrilah riziak sâng ki ti,” itia â sîr zoi nungah khan,

¹⁷“An sualhei neh an siatnahei remai khâi no ning e,” a ti nôk a.

¹⁸Khanchu, sualhei izâ a nit tâkin chu sual inboina ranga thillan nang khâi mak e.

¹⁹Khanchu, suapuihei, Jisua thisen zârin Mun Rithiang Takah khan ei lût thei tâk a.

²⁰Ani khan puanzâr fe thlengna lam ithar neh lam iring khah a ne ong pêk tâk, kha puanzâr kha chu ama takpum khah a nit.

²¹Pathian insung mihei chungah thiampu roinpui tak ei nei sikin,

²²ei lungrila isia neh iṭha riatna ṭha no chu infâi tâka omin, ei takpum khom tuifîma infâia omin, lungril idik tak neh iamna det tak inei pumin Pathian nâi ei ti u.

²³Ei tûngna thurin hih inîng loiin itûn det ngit ei ti u. Ân kungtu khah ai iamom a nit.

²⁴Lungrithlung rang neh sin iṭha sin ranga rithor risak rang dân ngaitua seng ei ti u.

²⁵Ṭhenka tho lam angkan ei inkhôm ima no min u. Ima nêkan Pumapa Nikhua khah a hong nâi ual uala nin riatin rithor risak ual ual rei.

²⁶Thutak riatna ei nei tâk nung khoma ei la sual tên maiin chu, sualhei inboi thei ribôlna om tlak khâi no ni a;

²⁷roirêlna neh ama doituhei inrimang rang Pathian ningthikna mei inthang, iṭiom tak ngâkna bang om tâng a ti.

²⁸Tukhom Mosia Dan zôm inohei chu, riatpuitu inik ithumka thun lungkhamna boi riaikan ithat an nit ngai.

²⁹Pathian Naipa imusit a, thuthlung thisen, amah inrithiangna khah îte bea be noa, lungkhamna Rithla sîrinsehtu kha chu natinsat nôk uala kuttum inrik intuang rangin nin irngai ino mani?

³⁰“Phuba rêng rêng keima lâk rang a nit, Keiman thung ki ti,” iti neh, “Pumapa khan a mihei rêl a ti,” ititu hih ei riat a.

³¹Pathian iring kuta thla chu inrît tak a nit.

³²Zoro thlenga invâra nin om nunga dengthei rikhêl tak nin tuang lâi sûnhei khah remai rei.

³³Zoro khatkah mipui sensâm makungah nangni êron nuamning nangni an lo a, zoro dangah chu khangkana an lei întuanghei neh munkan nin tuang a.

³⁴Mi tânghei khah lung nin inkham a, nin neinunhei nangni an lâk pêk khomin, kumkhuantluangka sôi rang thil iṭha ual nin nei iti rian, kha nin ichânna khom khah ilôm takkan nin tuang a.

³⁵Loman roinpui tak â thlun rang sikin nin ihâina khah inrimang no rei.

³⁶Pathian lungdo sin rang neh a înkung idong rangah khan tuangdiarna ai nang a nit.

³⁷Pathian Thubûn, “Itôiteka nunga zuang rangah khah zuang tâng a ti, Rivuak no nih.

³⁸Khannisela, mi fel chu iamnan ring a ti; [6] Nung artolin chu a chungah lôm tlak no ning e,” ai ti angkan.

³⁹Eini chu nung ritola armang rang lôma mi ni mang me a, ringna inrihuam ranga iamna tûn det lôma mi kêng ei init.