Read Biete HEBRAI 11 Bible Online

HEBRAI 11 - Biete bible

HEBRAI 11

¹Iamna hi thil ei itûnghei a om ngêt riatna, thil ei imu nohei riatinfelna a nit.

²Iamna thu-ah hin zoro luia mihei khan inpâk an lei ilo a nit.

³Rammual hih Pathian thua siam a nit iti neh thil imu theihei hih thil mu thei inoheia siam a nit iti iamnan ei iriat a nit.

⁴Iamnan Abela khan Kaina nêka ribôlna ṭha ual Pathian ziangah a lan a, a thillan khah a lei iham pêk a, mi fel a nit itin Pathian ihamna ai dong a nit. Kha a iamna sikah khan a thi nung khomin thu a la îsîr mai a nit.

⁵Iamnan Enoka khah thina ritem loi rangin Pathianin chungtiang a ṭhui a, tutên mu khâi mak e. Pathian Thubûn, “Enoka khah chungtiang iṭhuiin a om maah khan Pathian ân lôm ngai,” a ti.

⁶Iamna boiin chu tutên Pathian inlôm thei ngai mak e. Pathian zianga hong kan amah chu a om a, ama zongtuhei ziangah loman a pêk ngai iti an iam ngêt rang a nit.

⁷Iamnan Nova khan sûn matona thil la hong itlung rang Pathianin â ril lâiah khan, Pathian thu zômin rikuang a sin a, kha rikuangah khan amah neh a insungkuahei saninringin an om a. Kha sikah khan, rammual khah thiamno ân chang a, iamna sikin thiam inchang a nit tâk.

⁸Iamnan Abrahama khan Pathianin ipeh ranga a înkung rama fe ranga a koi lâiah khan Pathian thu zômin a fena rang khom reh loiin arthok a,

⁹Iamnan Pathianin ram a înkung pêkah khan khualmi angkan a om a, Pathian ṭonginkung a dongpui rang, Isaka neh Jakoba angkan puan inheiah a om a.

¹⁰Khopui, lungphûm idet inei, Pathian isiam neh isin kha a ngâk mai tâk a.

¹¹Iamnan Abrahama khah a tar ok nungin neh Sari khom â ching ni man sela, Pathian chu a ṭonginkungah iiam a om itin arngat ngit sikin Pa a lai chang a nit.

¹²Abrahama khah â thi angkah dôra om tâk ni khom seh, kha mi khatka rithokah khan richi, rivâna ârsihei zâkah neh tuipui rikama ṭiai tep zoino dôrah an înzir a nit.

¹³Iamna nei pumin kha mihei murdi khah an ithi a nit. Pathianin a înkung pêk khah dong phâk no khom seh, ilah taka rithokin an lei mua, an lôm tak tak a. Rinêngah hin khualmi neh mivâi an nit iti an lei ririat a.

¹⁴Khangkana thu isîrtuhei khan mahni ram rilun rang khah an zong iti an înlang a nit.

¹⁵An ram hong mâk kha chu kan khâi mak a, kan sela chu kîr nôkna zoronṭum nei tâng an ti.

¹⁶Khanêkan, ram iṭha ual rivâna om khah an irngai ual a nit. Khanchu, Pathianin an Pathian riti khah izak mak a, an ta rangin khua tena a lei isiam pêk tâk a nit.

¹⁷Iamnan Abrahama khan, Pathianin a fia lâiah khan a naipa Isaka khah ribôlnan ai lan a nit. Pathian ṭonginkung idongtu ni khom sela, a naipa neisun ribôlnan a lai lan a nit.

¹⁸Pathianin a ziangah, “Isaka rithoka hin ner chihei isui nîng a ti,” ai ti ni khom seh,

¹⁹Pathianin Isaka khah thina rithok khomin a kâiithoi thei iti iamin Abrahama khan a lan tâk a, Isaka khah â thi tâk kâiithoi angkan ai mu kîr nôk ngir tâk a nit.

²⁰Iamnan Isaka khan sûn matona rangin Jakoba neh Esauva khah ṭhat a vur a.

²¹Iamnan Jakoba khan, a thi rangto takin Josefa naihei khah ṭhat a vur seng seng a, khanung chu â rol rinêlin Pathian chubai a ûn a.

²²Iamnan Josefa khan, a thi rang a hong nâiah khan Israel richihei Aigupta ram ata an hong suak rang thu â sîr a, a ruhei an rê rang dân khom â ril a.

²³Iamnan Mosia khah, a suak lâiin, naite mêliṭha tak a nit sikin, a nu neh a pa khan rêng thupêk ṭi loiin thla thumkah an thup a.

²⁴Iamnan Mosia khan, a hong lian tenan chu Faroa nainu naipaa ribe mai khah nuam khâi mak a.

²⁵Itôiteka sunga sual hoina mang nêkan chu Pathian mihei neh dengtheina tuang arthlang ual tâk a.

²⁶Aigupta ram richongna murdi nêkah khan Krista an musitna khah richon ilu ualin a be a, sûn matona loman a mu rang khah ai thlîr ngit a nit.

²⁷Iamnan rêng ningthik khah ṭi loiin Aigupta ram khah a mâk a; mu theino Pathian khah a mu sikin ai tuang ngêi ngêi a nit.

²⁸Iamnan Kalkan Kût ân ding a, Vântirtôn khan Israelhei nai lutîrhei khah a that nona rangin inkotheiah khan thisen khah ân rithe a.

²⁹Iamnan Israelhei khan imuanga lôn angkah dôrin Tuipui Sen khah an rikan a; Aigupta mihein rikan an tumah khan tuiin a chîm inrimang riai a.

³⁰Iamnan Jeriko kulpui khah Israelhein sûn sarikah an vêl zoin chu a chim tâk a.

³¹Iamnan Rahabi nochizuar khan Israel enthlâttuhei khah ilôm takkan a lei ithlun sikin iam inohei lâiah rimang sa mak e.

³²Ki la îsîr mai rang mani? Gideona hei, Baraka hei, Samsona hei, Jeptha hei, Davida hei, Samuela hei neh zânthlahei thurchi isîr rang eila zoron ne dum no nia.

³³Khahei khan iamnan ramhei an lâk a, thil dik an sin a, Pathian ṭonginkung an dong a. Sakeibaknei bâihei an inrichîp pêk a,

³⁴meipui inthanghei an that a, khandaia that an zôk a, rât ino lei ni khom sela inrât an nit a, risual bualah khan mi rât inthang an nit a, irâlhei kulpui an isim a.

³⁵Iamna sikin nupanghein an mi thihei ithoinôk an mu a. Ṭhenkan nuamlona an tuang a, thoinôkna ringnun rilun an nei theina rangin kêlisua nuam mak a.

³⁶Ṭhenkah chu nuiza siamnan imangin an om a, ito an tuang a, ṭhenkah chu rênbun inbunin tâng inah ikhum an nit a.

³⁷Ṭhenkah lunga dêngin an om a, ṭhenkah bong inika ât tanin an om a, khandaia thatin an om a. Ṭhenkah bera vun neh kêl vun isilin an ivâi a; inriang tak, denginthei tak neh nuamlo tuangin an om a.

³⁸Kha mihei ta rangin chu rammual hih om mun hoi ino tak a nit. Mi vâi angkan ramchârheiah neh itlângheiah an rivâk an rivâk a, ipûkheiah neh khurheiah an om ngai a.

³⁹Khahei khan an iamna sikin Pathian ihamna an dong a; nikhomsela, Pathian ṭonginkung kha chu dong mak a.

⁴⁰Pathianin ei ta rang thil iṭha ual a lei inkung tâk a, khahei khah eimani neh anmani a ruala tlukrikipa ei om theina rangin a lei înrifûk a nit.