Read Biete HEBRAI 12 Bible Online

HEBRAI 12 - Biete bible

HEBRAI 12

¹Khaangkan, eini chu sûmpui angkana ne thlîrtuhein an ne hual vêl sikin, nen nim thei murdi neh sual eimania kop ngit hih pai ei ta, ei matona itlânrisiakna omah hin zâltak isongin itlân ei ti u.

²Jisua, ei iamna ringatna bul neh inrikiptu tiang khah en ngit ei ti u. Ani khomin a matona loman iom sikah khan, mualinphoina khah intlômin Krosah khan a tuang a, atûn chu Pathian rêngṭhungmun changtiang a hang îṭhung tâk a nit.

³Nin sôl a, nin rizal nona rangin mi sualhei nelna rikhêltak ituangtu khah ngaitua ngai rei.

⁴Sual nin doinah hin thisen isuak[7] rakkan la puh mak chei.

⁵Naihei angkana Pathianin nangni â thorna ṭong khah nin irngil tâk mani? “Ki nai, Pumapa nang isôina khah uksak loiin om non la, Nang a ngo khomin rizal no roh.

⁶Pumapa khan lung ai thlunghei chu â sôi ngai a, Naia a ipom chu a hêm ngai,” iti a nit.

⁷Nin ituang hi Pân nangni a thununna a nit; naihei chunga tho dân angkan Pathianin nin chungah ai tho a nit hi. Pân ai thunun ino nai tûm â om a?

⁸Naihein an itong ngai ihêm khah nin tong non chu, nai tak ni loiin, zâi nai nin init ai nit rang a nit.

⁹Ei taksa tianga pahei thu-ah khom an ne hêm a, marit ei tho ngir ngai a. Ei Rithla tianga Pa vâng chu ei ringna rangin archam chamin ei om ai nang a nit.

¹⁰Ei taksa tianga pahein chu itôitekah ṭhat an ti lam angkah takin an ne hêm ngai a, Pathianin chu arthiangna ei dong theina ranga ei ṭhatna rangin kêng a ne ihêm ngai.

¹¹Thununna rêng rêng hih tuang lâiin chu ilôm iomin ilang ngai mak a, ngaisiatiomin a îlang ngai a nit. Khannisela, tuang zoi tenan chu kha taka isôia om tâkhein chu irâ thlangamiom tak â sua a, ringnun ifel tak ân nei ngai.

¹²Khaangkan, nin kut ikhamhei khah lâng unla, nin rikhûk inthinghei khah inrât rei.

¹³Kebâihei khah lôn thei loiin om loia indama an omna rangin lam itlûnah lôn rei.

¹⁴Mi tin neh ringeia lêng tum unla, rithiangna nei tum sa rei; kha rithiangna boiin tutên Pumapa mu thei no nih.

¹⁵Ridîn rei; khanonchu, Pathian lungkhamna ata ilîrin, nin lâiah thingkung ikhâ hong ichera nangni inbuaiin, amakhan mi itam takkah porinchen om an ti.

¹⁶Khabanah, tute ridi song manih, Esauva angkana Pathian marit tho no mi manih, om loi rangin ringai ving sa rei. Ani khan a nai lutîr nitna khah voika bu nêkin ai zuar a nit.

¹⁷Kha nungah khan, a Pa ṭhatvurna la dong inuamin mitrithli ṭul pumin zong man seh, indanglamna zoro a om khâi no sikin ihengin ai om tâk a nit iti nin riat a.

¹⁸Nin tlâng hong tlung hih Sinai tlâng angkah kha ni mak e; Sinai tlâng kha chu itôn thei a nit a, kha tlâng khah meichok suakna, izîng isa takin a irkhû khup, thlipui rângna,

¹⁹bekul irî vung vungna, rôl inrît omna a nit. Mipuihein kha rôl khah an riat a, reh nôk tlak khâi loi rangin an ngên a.

²⁰“Sa tena khomin itlâng khah a tônin chu lunga dêng that rang a nit,” iti thupêk khah an ituang zoi khâi ino a nit.

²¹An thil mu khah ân rît rai sikin, Mosia khomin “Iṭin ken thing,” ai ti rak a nit.

²²Atûn chu Zion tlâng, Pathian iring khopui, vân Jerusalemah, vântirtôn sâng itam takkahei omna,

²³nai lutîr, rivâna riming ichuang koindanghei, mi tin roiirêlpêktu Pathian neh tlukrikipa siam tâk mi fel rithlahei ribûmna lian maah nin îding tâk a nit.

²⁴Abela thisen nêka ṭha uala thu sîr thei thisen rithetu Jisua, thuthlung thar palâi ziang nin hong itlung tâk a nit hih.

²⁵Thu zuang isîrtu hih nin lei inar duai lôiin, ridîn rei. Rinêng chunga an zianga thu sîrtu lei inarhei ilua dengintheina an zôk non chu, rivâna rithoka thu zuang isîrtu nungisonghei vâng hin chu dengintheina khah zôk thei tlak no min e.

²⁶Kha lâiah khan a rôl khan rinêng hih ân nîng a, atûn chu, “Voikah chu rinêng bang ni loiin, rivân khom lân nîng ki ti,” itin ṭong a înkung a nit.

²⁷Khante, “Voikah chu,” iti hin thilsiamhei kha innîngin ithon paiin om an ta, innîng thei inohei bang om mai an ti iti a înlang a nit.

²⁸Khanchu, ram inîng thei ino ei dong sikin lôm ei ti u; marit neh iṭidet pumin a lôm rang lamin Pathian sin thông ei ti u.

²⁹Ei Pathian hih mi kânginrivâm ngai mei kêng ai nit.