Read Biete HEBRAI 13 Bible Online

HEBRAI 13 - Biete bible

HEBRAI 13

¹Suapui lungrithlungna hi om mai riseh.

²Khualmi chunga ṭhat isua remai rei. Khangkana thon mi ṭhenkan an riat loi kârin vântirtôn an îthlun tâk kêng dua.

³Tâng ina omhei khah nangni khom â tâng sa angkah takin remai unla; intak ituanghei khom taksaa om sa ngir nin nit sikin remai rei.

⁴Rineina hih mi murdîn an inlut rang a nit, sangram chu iiam an om risak rang a nit. Ridihei neh inrêhei chu Pathianin rêl a ti.

⁵Nin ringnunah khan sum kanna ṭang no sela, nin thil nei chungah khan nin ilung intluk rei. Amah ngêiin, “Nang ithla tlak no ning a, imah khom nang mah tlak no ning e,” ai ti a nit a.

⁶Khasikin, ihâi takkan, “Pumapa chu ne ṭangpuitu a nit a, Ṭi no ning e. Miriamin im an ne lo thei ranga?” ei iti ngam a nit.

⁷Pathian thu nangni lei isîr pêk nin ruaitu masahei khah remai rei. An lei hong om dân khah iṭha takkan ngaitua unla, an iam dân risei rei.

⁸Jisua Krista chu mizân neh, vuani neh, kumkhuakan a ngaingir a nit.

⁹Inriseina chi dang dang neh rikhêl tak tak iṭhui invâiin om no rei. Pathian lungkhamna rithoka sungril tiang ringnun râtna ne peh thei idong hih, fâknêk thua dân izôm nêkan chu a ṭhat ual a, kha dân izômhei khan îte rifena mu ual ngai mak e.

¹⁰Tempila sinthotu thiampuhein eimani mâichâmah khan fâk an zong a irthiang ino a nit.

¹¹Thiampu Lal takin sa thisen khah sual ribôlna ranga lan rangin Mun Rithiang Takah a lûtpui a; khanniseh, saruakhei kha chu riabuk putiang an ihâl ngai a nit.

¹²Khasikin, Jisua khomin, ama thisen ngêiin mihei ân fâi theina rangin khopui putiang a lei ituang tâk a nit.

¹³Khaangkan, amah an musitna chu itlângpuiin, khopui putiang a ziangah fêng ei ti u.

¹⁴Rinêngah hin ei ta rangin khopui rilun omak a, khopui la hong iom rang khah ei izong a nit.

¹⁵Khaangkan, Jisua zâra ei ribôlnan Pathian ziangah inpâkna lan mai ei ti u; amakhah arming ei thlop ikipah inpâkna ribôlna ei ilan ngai chu a nit.

¹⁶Iṭha sin neh risan risak hih ringil tlak no rei, khahei khah Pathian inlôm ngai ribôlna chu a nit.

¹⁷Nin ruaituhei thu zôm unla, an thu thun om rei. Pathian ziangah an sintho an la sîr rang sikin ringam loiin nangni an ienkol ngai a nit. An thu nin zômin chu ilôm takkan sin an ta; nin zôm non chu ngaisiat pumin sin an ti, amakhah nin ta rangin rifena om no nih.

¹⁸Ne ṭongṭai pêk mai rei. Tiklâi khomin thil iṭha sin kin nuam mai sikin sia neh ṭha riatna rithiang tak kin nei iti kin riat infel.

¹⁹Nin ziang tiang Pathianin a ne tir nôk zel theina ranga ṭongṭai rangin nangni kî ngên tak tak a nit.

²⁰Khante, Berapu roinpui, ei Pumapa Jisua thina rithoka kâiithoitu ringeina Pathian khan, kumtluang thuthlung indetna thisen sikah khan,

²¹a lungdo sin thei rangin thil iṭha tinrêngin nangni inrithluk sela, Jisua Krista zârin a lôm inrupa om rangin ne siam riseh. Khanchu, Krista ziangah khan roinpuina kumkhuantluangin om riseh. Amen.

²²Suapuihei, hi rithorna thu hih lunginîk takka ringai rangin nangni kî ngên a nit, nin zianga ki lekhathon hih â tôitek a nit.

²³Ei suapuipa Timothea khah tâng in ata isua a nit tâk iti nin riat ki nuam, a hong tlung phâkin chu nangni mu ki hongin hong ṭhui ki ti.

²⁴Nin ruaituhei murdi neh mi rithianghei murdi khah ne chibai pêk rei. Itali rama suapuihei hin chibai nangni an bûk.

²⁵Nin rêngka ziangah[8] Pathian lungkhamna om riseh.