Read Biete HEBRAI 2 Bible Online

HEBRAI 2 - Biete bible

HEBRAI 2

¹Khasikin, ṭhui inrimanga ei om nona rangin thutak ei iriathei khah ei itûk indet ngit rang a nit.

²Vântirtônhei imanga ei chibulhei zianga thu an lei ithlun ilua khah a det tak tak a, tukhom â zui ino neh â zôm inotu rêng rêng chu an tong rua pial kuttum itho an nitin chu,

³Hingka taka saninringna roinpui vâng hiteh uksak loiin thông eila, ingkan im ei itlân suak thei ranga? Hi saninringna thu hih a tîrin Pumapa manga inpuang a nit tâk a, khanung ama retuhei khan â dik iti an ne fia pêk a;

⁴Pathian khomin, sinrikhêlhei, thilrikhêlhei neh sinthotheina tinrênghei neh, ama lungdoa Rithla Rithiang thilpêkhei isemin anni khah a riatpui a.

⁵Rammual la hong iom rang, a thurchi ei îsîr khah vântirtônhei thunuaiah seh mak e.

⁶Nikhomsela, mi tûn manih chu Pathian Thubu takmuna manih hingka hin a ti: “Miriam hih im a nit a, O Pathian, ni riat leng leng ngai hi? Miriam naipa khom hih im a nit a, ni donsui mai ngai?

⁷Ani chu itôiteka rangin vântirtôn nêka innuai ualin ni siam a, Roinpuina neh chôiinrisângna nen khum a,[1]

⁸A ke nuaiah thil tinrêng ni sia a,” itin. “A ke nuaiah thil tinrêng ni sia,” a ti sikin thil tinrêng a îhuap tak tak a nit; nikhomsela, atûn chu thil tinrêng a nuaia omin ei lai riat hi no a nit.

⁹Nikhomsela, Jisua, “Itôiteka ranga vântirtôn nêka innuai uala siam,” khah thina a tuang sikah khan roinpuina neh chôiinrisângna inkhum a nit tâk iti ei mu, Pathian lungkhamna zârin mi tin ta rangin thina a irtem tâk a nit.

¹⁰Pathian, thil tinrêng isiamtu neh ihoitu ta rangin chu, a roinpuina dong ranga nai itam takkah hong ṭhui inlûttu, an saninringna siamtu Jisua kha tuangna sika tluk rikipa siam khah a îdik pial a nit.

¹¹Ân rithiangtu neh a înrithianghei kha Pa khatka rithoka suak an nit; khasikin, Jisuan annihei khah “Suapuihei” iti izak mak e.

¹²Pathian ziangah, “Ki suapuihei ziangah ner ming rilam ki ta, An inkhômnaah nang inpâkna la sak ki ti,” a ti a.

¹³“Pathianah ki iamna ringat ki ti,” khom a ti a. “En ta, keimah neh Pathian ne ipêk naipanghei hi,” khom a ti nôk sa.

¹⁴Naipang ai tihei hi taksa neh thisen inei an nit a, ani khom anmani angkah kha a hong init sa tâk a nit.

¹⁵Khanchu, a thina sikin thina chunga thuneitu Diabola kha â nê a, damsungka ithi ṭi mai maia om ngai, ṭina suaka tânghei khah ai sanisua tâk a nit.

¹⁶A zuang iṭangpui ngaihei hih vântirtônhei ni mak a, Abrahama richihei an nit a zuang iṭangpui ngai chu.

¹⁷Khasikah khan, Pathian sin a thonah khan Thiampu Laltak iamom tak neh lungkhamnaa sip a nit a, mi murdi sual thupha chôina lantu inih rangin lam tinrêngah a suapuihei angkan a zuang om ai nang pial a nit.

¹⁸Amah ngêiin thlêmna tongin a lei tuang zoi tâk sikin, atûn chu thlêmna tonghei ai ṭangpui thei tâk a nit.