Read Biete HEBRAI 3 Bible Online

HEBRAI 3 - Biete bible

HEBRAI 3

¹Khasikah khan, suapui rithiang, rivân koina donghei o, ei thurina Tirtôn neh Thiampu Laltak khah ngaitua rei.

²Pathian insungkua pumpui ta ranga Mosia ai iamom angkah takin ani khom ân kungtu ta rangin ai iamom a nit.

³Insungkua indingtu chu a insung mihei nêkan chôiinrisângna ai dong ual ngai angkah hin, Jisua khom Mosia nêkan roinpuina risâng ual idong inrup a nit.

⁴Insungkua tin hih tukhôk înding manih chu a nit a; thil tinrêng indingtu chu Pathian a nit.

⁵Mosia chu isom inin Pathian insungkua pumpui ta rangin a iamom a, Pathian thu sîr lei inpuang nôktu a nit a.

⁶Krista chu Naipa inin Pathian insung mihei chungah ai iamom a nit; eini hih a insung mihei chu ei nit, ei tûngnaah hin ihâi tak neh lung idet takka ei itûk inrichel ngit ngânin chu.

⁷Khasikah khan, Rithla Rithiangin, “Vuansûnah hin Pathian rôl nin riatin chu,

⁸Nin chibulhein ramchârah Pathian an rinak a, Ama doia an irhel angkah khan, Nin lungril inkhir khâi no rei.

⁹Kum sômilika sung nin chibulhein, Ki sintho an mu pumin an ner nak a, an ne fia a.

¹⁰Khasikin, kha rikhûkhei chungah khan ki ning a thik a, ‘An lungrilin a ṭhui inkôi a, Ki lampui khom reh khâi mak e,’ ki ti a.

¹¹Ningithik takka ki înkung tâk angkah khan, ‘Ker ngamnaah khan lût tlak no nih,’ ki tia,” ai ti angkah khan.

¹²Suapuihei, ridîn rei; khanonchu, Pathian iring nungisong rangin nin lâia tu lungrila manih iam nona sual hong lût duai a ti.

¹³“Vuansûn,” iti a nit sungah hin nin lâia tute sualah an ilîr a, an lungril an inkhir nona rangin nîn tin rithor risak mai rei.

¹⁴A tîra ei iamna kha a mong idênin ei itûk indet ngânin chu Krista tlângpuituhei ei nit.

¹⁵Amahih Pathian Thubûn a ti: “Vuansûnah hin Pathian rôl nin riatin chu, Nin chibulhein ama doia an irhel angkah khan, Nin ilung inkhir khâi no rei,” iti hi.

¹⁶Tuhei im Pathian rôl riat nunga rihel kha? Aigupta rama rithoka Mosian ai ṭhui isuahei khah ni mak im a?

¹⁷Kum sômilika sung tuhei chungâm Pathian ilung ai hoi ino kha? Sual isina ramchâra thi tâkhei chungah khan ni mak im a?

¹⁸Thu ôi inohei chung bangah ti no chu tu ziangâm arngamnaa lût loi ranga ṭong a înkung kha?

¹⁹Khaangkan, an iam no sikin kha ramah khan lût thei mak iti ei iriat a nit.