Read Biete HEBRAI 4 Bible Online

HEBRAI 4 - Biete bible

HEBRAI 4

¹Atûnah hin kha ringamnaa lût theina ṭonginkung a la ngîr mai sungah hin nin lâiah tute kha ringamnaa lût thei khâi inoa ribe om duai nin ti iṭiom a nit.

²Annihein Thurchi Ṭha an iriat angkah ngirin eini khomin ei riat tâk a. Anni khan iamnaa ringaia pomtuhei an nit no sikin an thu riat khah rifena an imupui ino a nit.

³Eini iamtuhei hih arngamnaa lût tâkhei chu ei nit. Pathianin rinêng neh rivân a siam zoiah khan a sin arngam tâka chu, “Ningthik puma ki înkung tâk angkah khan, Ker ngamnaah khan lût tlak no nih,” a lai ti mai a nit.

⁴Pathian Thubu-ah takmuna manih sûn sarinî thu hingkan â sîr: “Sûn sarinin chu Pathianin a sintho murdi ata arngam tâk a,” itin.

⁵Kha thu zom ngirin: “Ker ngamnaah khan lût tlak no nih,” a ti nôk a.

⁶Hi thu-ah hin a ṭhen a la lût rang an om tina a nit. Thurchi Ṭha lei ireh masahei khan an iam no sikin lût thei khâi mak a.

⁷Khaangkan, ki lei îsîr tâk, “Vuansûnah hin Pathian rôl nin riatin chu nin ilung inkhir khâi no rei,” iti hi Davida mangin kum itam takka nungah Pathianin nikhua dang, “Vuansûn,” ai ti khah a zuang înkung nôk tâk a nit.

⁸Josuan mipuihei khah, “Ringamnaah,” khan a lei iṭhui inlût thei ni sela chu, Pathianin nikhua dang thu isîr khâi no nih.

⁹Khasikin, Pathian mihei ta rangin chu ringamna nikhua dang a lai om mai a nit.

¹⁰Pathianin a sintho ata a irngam angkah takin Pathian înkung ringamna muhei chu an sinsôlna ata lar ngam an ti.

¹¹Tho, khasikin, iam nona sika an îlîr angkah khan tute ei ilîr nona rangin, kha ringamnaa lût rangin zâltak song ei ti u.

¹²Pathian thu chu a ring a, sin a tho thei a, khandai bêneirim ingaihtak nêkan khom a ngaih ual a. Ringna neh rithla richinna hei, rurbun neh rithling hei idênin a sun ikhoi chit thei a, lungrila ngaituana neh tumna hei khom a riat thei zel ngai.

¹³Pathian mitmuah â lang ino thil rithup rêng rêng omak e. Ei thurchi ei la sîrna ranga mitmuah khan thil tinrêng hih korongboi neh ri-ongpam ai nit riai a nit.

¹⁴Khanchu, Pathian omna rivâna fe thleng tâk Thiampu Lal roinpui tak, Jisua, Pathian Naipa khah ei nei sikin ei thurin hih itûn det ngit ei ti u.

¹⁵Ei Thiampu Laltak nei hi ei rât nonahei ne repui phâk ino ni mak a, eimani angkah taka lam tinrênga thlêmna tong tâk; khanniseh, isual ino chu a nit.

¹⁶Khangkah khan iṭangpui ei nang zoro takah khorngaina neh lungkhamna ei mu theina rangin lungkhamna rêngṭhungmun khah ihâi takkan nâi ei ti u.