Read Biete HEBRAI 5 Bible Online

HEBRAI 5 - Biete bible

HEBRAI 5

¹Thiampu Laltakhei chu miriam lâi ata rithlang suak an nit ngai, miriam ta ranga Pathian tianga sinitho ranga iphun an nit a, thilpêkhei neh sual sika ribôlnahei ilan ngai rang an nit.

²Anni khom khah râtnona ihual vêla om ngir an nit sikin, rianohei neh pualoihei chungah khan an ilung an idil thei ngai a nit.

³Khasikah khan, mi danghei ta ranga sual ribôlna an ilan pêk angkah takin, anmani ta rang khom an lan ngêt ai nang a nit.

⁴Tutên hingkana chôiinrisângna hih mahni khâtin khum thei ngai mak, Arona angkana Pathian ikoihei bangin an ikhum thei ngai a nit.

⁵Kha angkah takin, Krista khom khah Thiampu Laltaka risiamin mahni richôiinrisâng mak a; kha nêkan, Pathianin, “Nang chu ki Naipa ni nit, Vuansûnah hin naipan nang kî nei tâk a nit,” ititu khan ai chôiinrisâng tâk a nit.

⁶Mun dangah khom, “Nang chu Melkisedeka thiampu nitna angkan, Kumkhuantluangka thiampu nîng ni ti,” ai ti sa a nit.

⁷Ani khan a taksa riput lâi sûnheiah khan thina rithoka amah inzôk theitu ziangah iring takka khêkin neh mitrithli thla puma ngênin a ṭongṭai a. Pathian a ṭi ngai sikin a ngênna khah ringai pêk a nit tâk a.

⁸Pathian Naipa tak ni man sela, a tuangnaheiah khan thu zôm a irsei a nit.

⁹Tlukinrikipa hong iomin, a thu zôm murdihei ta ranga kumtluang saninringna nâr a hong nit tâk.

¹⁰Khanchu, Melkisedeka thiampu nitna angkana Thiampu laltak inih rangin Pathianin a înkung tâk a nit.

¹¹Hi chungchâng thu-ah hin isîr rang itam takka ei nei a; nikhomsela, nin la riatthiam thei no sikin â sîrinfel a întak a nit.

¹²A zoro ngaituan chu minriseitu ni thei rak ta unlan arhoi a; khannisela, Pathian thu kha a bul rêta rithoka lân risei nin inang nôk tâk a nit. Bu rum ni loiin rinutui irin nin la înrup a nit hih.

¹³Tukhom rinutui irin lan rup chu, isia neh ṭha la riano, naite a nit.

¹⁴Bu rum kha chu ulianhei ta rang a nit. Khahei khan â sia neh â ṭha ithlei thei rangin an lungril kha an îsôi innip tâk a nit.