Read Biete HEBRAI 6 Bible Online

HEBRAI 6 - Biete bible

HEBRAI 6

¹Khasikah khan, Krista thu bul isîr khâi loiin puitling tiang pan tâng ei ti u. Sintho rifena boi ata riletna thu[2] hei, Pathian iiam thu hei,

²baptisma thu hei, kut ringat thu hei, mithi thoinôkna thu hei neh kumtluang roirêlna thu hei inriseina lungphûm chu phûm nôk khâi loiin,

³matiang fe tâng ei ti u. Pathianin ṭhat a tin chu amakhah ei tho ngêt rang a nit.

⁴Khante, voikah lungril invâra om a, rivân thilpêk ritem a, Rithla Rithiang khom idong tâk,

⁵Pathian thu ṭhat tlia neh zoro la hong ranga sinthotheina ritem tak nunga,

⁶an iamna imah nôkhei chu rilet nôk ranga hong ikhîr nôk theirua ni khâi mak e. Anmani ngêiin Pathian Naipa khah ihêmde nôkin mualphoi an isak a nit.

⁷Rinêng, a chunga ruatui itla ngai lei idong a, â neitu ta ranga chimu ifarua sua tâk chu Pathianin ṭhat a vur ngai.

⁸Khannisela, riling neh loisûl bang isua chu imarakin a om a, vânisâm itong mabâkin a om a, a nungkhônah chu ihâl inrimang a nit ngai.

⁹Rual lungthlunghei, khangkana thu khah isîr khom unlang, nangni chu khangkana thil nêka thil iṭha ual, saninringnaa ṭang thilhei kha thông nin ti kin iiam ngit a nit.

¹⁰Nin thil tho ngai, atûn khom nin lai tho mai ngai, arming sika lungthlungna nin înlang hei neh, mi rithianghei sin nin itho pêk ngai hei hi ringil rangin Pathian chu fel ino ni mak e.

¹¹Tu khomin nin itûng hi a hong tlung rikip mâkah chu takritâina nin isua mai kin inuam tak tak a nit.

¹²Nin ritha inboi loia iam ngit pum neh tuangidiar taka ngâk ngêi ngêi ngai, Pathian ṭonginkung idongtuhei ringnun khah risei rangin nangni kin inuam a nit.

¹³Pathianin Abrahama ziangah ṭong ân kung lâiah khan, ama nêka roinpui ual iching rang an om no sikin, ama riming ichingin ṭong arkhâm a.

¹⁴“Inkhêl loiin ṭhat nang vur ki ta, nang inpung ngêt ngêt ki ti,” a ti a.

¹⁵Khanchu, Abrahama khan a ngâk ngêi ngêi a, Pathian ṭonginkung khah a dong tâk a.

¹⁶Miriamhein anmani nêka roinpui ual riming ichingin ṭong an rikhâm ngai a, khaangkana vânirisâm khan risêlna ân mong a, a îndet ngai a nit.

¹⁷Pathian khomin a ṭonginkung ân danglam no rangzia inlangnan ṭonginkung idong ranghei ziangah mahni riming iching rakkan ai namindet a nit.

¹⁸Indanglam nôk pai pai ino chi hi thil inikah, a ṭonginkung neh mahni riming ichinga vânirisâmna sikah hin, Pathian chu mînlak thei ni mak. Khasikin, eini, a zianga zôkna muhei hin ei matona tûngna om hih itûn det ngit rangin a ne ithor tak tak a nit.

¹⁹Kha tûngna khah ei ringnun thîrkuatin ei nei a, idet tak neh iamiom tak a nit; Mun Rithiang Takah khan arthlung a.

²⁰Amakhan ei ta rangin, ei maruaitu Jisua a lei lût tâk a, Melkisedeka thiampu nitna angkana kumtluang Thiampu Laltak a nit tâk.