Read Biete HEBRAI 7 Bible Online

HEBRAI 7 - Biete bible

HEBRAI 7

¹Kha Melkisedeka khah Salem kho rêng a nit a, Pathian Chungnungtaka thiampu khom a nit. Ani khan Abrahama, rêng ilikahei inê zoia a hong kîr nôkah khan a lei ritongpui a, ṭhat a vur a.

²Khanchu, Abrahama khan ani khah a râllâk thil murdia rithokin sômka khatkah a pêk a. Melkisedeka riming omzia hi “Felna Rêng” tina[3] a nit a. Salem rêng khom a nit sikin “Ringeina Rêng” tina khom a nit.

³Ani chu pa nei ino, nu nei ino, richibulhei isui rang om ino, a om phut nî neh a ringnun mong nî khom isîr rang om ino a nit a; Pathian Naipa angkah a nit a, thiampu ai nit mai a nit.

⁴Ei richibul Abrahama luan a râllâk thil murdia rithokin sômka khatkah ai pêkah kha a roinpuizia hi ngaitua ta u.

⁵Thiampu sin itho Levia chihei khan Dân thupêk angkan an chipui Israel mihei, Abrahama richi ngirhei ziang ata sômka khatkah ilah rang thu an dong a.

⁶Melkisedeka khah Levia chi ni mak a; khannisela, Abrahama zianga rithokin sômka khatkah a lâk a, Pathian ṭonginkung idongtu Abrahama khah ṭhat ai vur a nit.

⁷Iti nang loiin ân thuai ual chu â roinpui ualin ṭhat ai vur ngai a nit.

⁸Thiampuhei thu-ah khan chu â thi thei miriamhein sômka khatkah an dong a; khanniseh, Melkisedeka thu-ah khan chu Pathian Thubûn â ring maia a îsîr khan sômka khatkah ai dong a nit.

⁹Khante, Levia, sômka khatkah idong ngaitu ngêi khom khan Abrahama kutin Melkisedeka ziangah sômka khatkah a pêk tâk iti thei a nit,

¹⁰Melkisedekan a lei ritongpui lâiah khan Levia chu a pu Abrahama ṭhâlbeah a lai om ṭian a nit.

¹¹Khaangkan, Levia richihei thiampu sin neh rimana Dân hih ipe a nit a; khahei sika inrikip thei ni sela chu, Arona thiampu nitna angkana nino, Melkisedeka thiampu nitna angkana thiampu dang hong iom îte a nangna om khâi no nih.

¹²Thiampu nit dân balam indanglama a hong om tâkin chu Dân khom khah indanglam ai nang ngêt a nit.

¹³A thurchi kin îsîr ei Pumapa hi chu mâichâma sinthona tôn ngai ino nam lâia mi a nit.

¹⁴Ei Pumapa chu Juda nama rithoka zuang inzir a nit iti ifel takkan ei riat, Mosian thiampu chungchâng thu â sîr lâiah khan hi nam hih sâm ngai mak e.

¹⁵Thiampu chi dang, Melkisedeka angkana thiampu, miriam balama thiampu chang nino,

¹⁶mong ngai ino ringna sinthotheinaa thiampua siam a hong iom tâk hin ei thu khah a înfel nôk ual a nit.

¹⁷Pathian Thubu khan, “Melkisedeka thiampu nitna angkan kumkhuantluangkan thiampu ni nit,” a ti a.

¹⁸Thupêk masa kha rât mak a, imang inrup ino a nit sikin iheng a nit tâk a.

¹⁹Dân khan îte ṭhatrikipin siam thei mak a. Atûn chu tûngna ṭha ual, Pathian nen nâi ngaitu ipen ei iom tâk a nit.

²⁰Khabanah, riming ichinga rikhâm rakka a zuang iphun a nit, thiampu danghei chu khangkana ṭongrikhâm rakka phun ni ngai mak e.

²¹Khannisela, ani hi chu riming iching rakka iphun a nit, â phuntu khan a ziangah, “Pumapa khan riming ichingin ṭong arkhâm a, A ṭong ikhîr khâi no nih; Nang chu kumkhuantluangkan thiampu ni nit,” a ti a.

²²Khangkah takkah khan Jisua chu thuthlung iṭha ual indetpuitu a hong nit tâk a.

²³Mi danghei kha chu thina sikin an om mai thei ngai no sikin thiampua siam khah itam takkah an nit.

²⁴Nikhomsela, ani kha chu kumkhuantluangkan a ring mai sikin a Thiampu nitna kha ithleng thei ni loiin ai nit mai tâk a nit.

²⁵Khaangkan, amah-a Pathian zianga honghei chu atûn neh tiklâi khomin ai saninring thei a nit, anni ta ranga Pathian zianga ngên pêk rangin kumkhuantluangkan a ring mai sikin.

²⁶Khangkana Thiampu Laltak khan ei risamna murdi a ne irkam pêk zoi a nit; a ni chu mi rithiang, demnaboi, porinchena kop ino, mi sualhei lâia rithoka a rana om, rivân nêka inchung ualin atûn chôiinrisângin a om tâk a.

²⁷Thiampu laltakhei khan nîn tin anmani sual sika ribôlna kha an lan a, khanung mipuihei sual sika ribôlna an lan pêk ngai a; ani hin chu khangkana tho khah nang mak e. Amah rilanin, mi murdi ta rang ribôlna kha voikan amah arlan lâiah khan kumkhuaka rangin ai lan înrizoi riai tâk a nit.

²⁸Dân khan chu râtnona nei miriamhei khah thiampu laltakin a phun ngai a; khannisela, Dân om nunga riming ichinga ṭonginkung zuang iom khan chu Naipa, kumkhuantluangka tlukrikip tâkah khah, Thiampu laltakin a zuang iphun a nit.