Read Biete HEBRAI 8 Bible Online

HEBRAI 8 - Biete bible

HEBRAI 8

¹Khanchu, ei thu sîrhei lâiah hin a bipui tak chu amahih a nit: khangkana Thiampu Laltak khah ei nei iti hi a nit. Rivânah khin Roinpuitaka rêngṭhungmun changtiang a hang iṭhung a.

²Mun rithiangtak neh biakbûk tak tak, miriam isin ni no, Pumapa isinah khan sin a hang itho tâk a nit.

³Thiampu Laltakhei chu thilpêkhei neh ribôlnahei ilan ranga phun an nit a. Khasikin, ei Thiampu Laltak khom hin ilan rua îmanih chu a nei ngêt ai nang a nit.

⁴Rinêngah hin la om mai sela chu thiampu sin zel tho no nih, Dân ti lama thilpêk ilan ngai thiampu an om mai sikin.

⁵Mosian biakbûk a sin rang lâiah khan Pathianin a sin dân rang â ril a, “Itlânga arlim nang ki înmu angkah thapah khan tinrêng ni siam rang a nit iti remai roh,” ai ti angkah khan hihei sinthona hi rivân thilhei rimil neh rilîm ka kêng ai nit.

⁶Khannisela, atûnah hin chu thuthlung iṭha nôk ual palâi ai nit angkah takin, anmani sinthona nêka inchung ual ipe a nit tâk a, kha thuthlung khah ṭonginkung roinpui uala ringat a nit.

⁷Thuthlung masa khah îte demnaboi ni sela chu, â nikna hong iom khah ai nang khâi ino rang a nit.

⁸Khannisela, anmani demin hingka hin ai ti a nit: “Nikhuahei khah a hong itlung rang tâk, Israelhei neh Judahei chu thuthlung ithar siampui ki ti.

⁹An chibulhei Aigupta ram ata ki ṭhui isua lâia, An kuthei ke tûk nî-a, An zianga ki thuthlung angkah kha ni loiin; Ki thuthlungah khan iiam an om mai no sikin, Anni chu kî uksak khâi ino a nit,” Pumapan a ti.

¹⁰“Nikhua hong itlung ranga Israelhei zianga thu ki thlung rang chu amahih a nit: An lungsungah ki Dânhei siang ki ta, An lungrilah riziak sâng ki ti. Keimah an Pathian nîng ki ta, Anmani ki mihei nîng an ti.

¹¹Khanchu, tutên, ‘Pumapa chu reh rei,’ itin, Mahni bungtualbômhei manih, Mahni suapuihei manih an inrisei nang khâi no nih. Â chîntaka rithokin â liantak idênin, An rêngkan an ne iriat rang tâk a nit.

¹²An siatnahei izâng ki ta, An sualnahei remai khâi no ning e, Pumapan a ti,” itin.

¹³“Thuthlung thar,” itin â sîr sikin thuthlung masa kha chu a înlui tâk a nit; khangkah khan, hong ûnliana, hong ilui tâk chu â boi zel rang a nit.