Read Biete HEBRAI 9 Bible Online

HEBRAI 9 - Biete bible

HEBRAI 9

¹Khante, thuthlung masa khomah khan chubai ûn dânhei neh chubai ûnna rang Mun Rithiang, hi rinêngah hin a nei a.

²Biakbûk an siam a, a tongtîr khah Mun Rithiang an ti a. A sungah khan meiser siana hei, Pathian zianga ilan tâk ibai siana docham hei a om a.

³Puanzâr â nikna pênah khan Mun Rithiang Tak an iti khah a om a.

⁴A sungah khan namhoi hâlna rângkachak mâichâm hei, Thuthlung Bôm rângkachaka inluan hei a om a. Thuthlung Bôm sungah khan Manna omna rângkachak kola hei, Arona rol icher hei, thuthlung riziakna lungphêk inika hei khah a om a.

⁵Kha Bôm chungah khan roinpuina Cherubhei an om a, sual izâna mun chungah khan an rithla an phar a. Kha thuhei khah atûn chu a kip a kôiin isîr thei no min e.

⁶Kha thilhei khah hingkana lei inrifûk a nit a. Thiampuhei khah Biakbûk tongtîrah khan an thiampu sintum isin rangin nîn tin an fe ngai a.

⁷A khêl tiang, Biakbûk sung inrilah khan chu Thiampu Laltak bang a kumah voikah, thisen ichôi ngêtin a lût ngai; kha a thisen chôi khah ama rang neh mipuihein an riat loi kâra sual an isinhei ribôlna rangin ai lan ngai a nit.

⁸Hi thil inrifûk dâna rithokah hin Biakbûk tongtîr hih a la om sungkah chu, Mun Rithiang Tak lûtna lampui khah a la ir-ong tak ino a nit iti Rithla Rithiang khan a ne înmu a nit.

⁹Amahih atûnlâi inrikhekna a nit. Hi dân angkana thil ilanhei neh ribôlna lanhei hin â lantu mipuihei lungril khah tlukinrikip thei mak;

¹⁰khahei kha chu fâknêk, rithâr dân dang dang, taksa tiang thil ringot a nit a, siamintharna zoro tlung mâka mang rang bang a nit.

¹¹Khannisela, Krista chu thil iṭha atûna lei itlung pial tâkhei [4] Thiampu Laltak a nit tâk a, a sinthona Biakbûk khom khah, miriam isin ni mak a, hi rammuala thilsiam angkah khom hi a nit no sikin a roinpuin ai tlukrikip ual a nit.

¹²Ribôlnaa a thisen lan khom khah kêlchal neh serâtchaltuai thisen ni loiin, ama thisen ngêi a nit a, Mun Rithiang Takah khan voikah ilûtin kumkhuantluanga rangin ritlanna ai siam tâk a nit.

¹³Kêlchalhei neh sechalhei thisen neh serla rivâm, mi nim chunga an irthe luan, an taksa nimna infâi pêkin ân rithiang theiin chu,

¹⁴Krista thisen vângin chu a înrithiang liai rang vang na! Ani chu kumtluang Rithla zârin thillan demnaboi ichangin Pathian ziangah ribôlnan amah arlan tâk a, Pathian iring sin ei tho theina rangin a thisenah khan sin thina thlun ngaiheia rithokin ei sia neh ṭha riatna ân rithiang tâk.

¹⁵Hi sikah hin Krista chu thuthlung thar palâi a nit; thuthlung masa thonchâinahei ata mihei artlan suak theina rangin a lei thi tâk sikin, Pathianin ai koihei khah kumtluang ṭhatvurna a înkung khah an idong thei tâk a nit.

¹⁶Thumâk chungchâng khom hi â mahtu khah a thi tâk neh a la thi no ifia bak a nang ngai;

¹⁷â mahtu la dam sungin chu imang thei la ni ngai mak a, a thi nung bangin imang thei ai nit ngai a nit.

¹⁸Khasikin, thuthlung masa khom khah thisena indet ai nit a nit kha.

¹⁹Dân thu-a thupêk tinrêng Mosian mipuihei â ril lâiah khan, serâtchaltuai neh kêl thisen khah a lâk a, tui neh inripolin, husop[5] iṭang neh samul sen imangin Dân lekhabu zuat neh mipuihei murdi khah arthe a,

²⁰“Amahih nin zôm ranga Pathianin nangni ai pêk thuthlung namindetna thisen a nit hih,” a ti a.

²¹Khante, Biakbûk neh biakna mangruahei murdi khom khangkah ngirin thisen khah arthe a.

²²Dân thu dungizuiin chu thil tinrêng hi thisena inrithiang zit dên rang a nit a, thisen isua loiin chu sual izâna zel omak e.

²³Khaangkan, rivân thil ri-angpuihei ilua khangkana inrithiang khah a nang a, rivân thil tak takhei vâng chu kha nêka ribôlna ṭha uala inrithiang ai nang ngêt rang a nit.

²⁴Krista chu miriam isiam Mun Rithiang, a tak rilimah khan ai lût ni mak e, rivânah khin a hang lût a, atûn ei rithûlin Pathian makungah a hang ingîr tâk a nit.

²⁵Thiampu Laltak khan chu sa thisen ichôiin kum tin Mun Rithiang takah khan a lût ngai a. Khannisela, Krista chu mahni rilan rangin voi itam takkah lût mak e.

²⁶Khangkan ni no sela chu leilung insiang phut ata voi itam takkah ai tuang rang tâk a nit. Nikhomsela, atûn zoro mong rangtoah hin sual inboina ranga amah rilan rangin voikah a zuang îlang a nit.

²⁷Miriam ta rangin voikah ithi inkung a nit, kha nungah khan roirêlna om a ti.

²⁸Khangkah ngirin Krista khom khah mi tam takka sualhei inboi rangin voikah ribôlnan ilan a nit tâk a. Sual inboi rang ni khâi loiin, ama lei ingâktuhei saninringnaa ṭhui inlût rangin a voi niknan zuang ilang nôk a ti.