Read Biete JAKOBA 1 Bible Online

JAKOBA 1 - Biete bible

JAKOBA 1

¹Pathian neh Pumapa Jisua Krista suak Jakoba hin, nam sômlei nam inikah rammual pumpuia rithekindar kha chibai ki bûk.

²Ki suapuihei, thlêmna tinrêng nin tong khomin vânṭhat riti rei.

³Nin iamna ifiaa ai om hin tuangdiarna a siam ngai iti nin riat a.

⁴Khante, îte risam loia nin tlukrikip a, nin pumka nin zôk theina rangin tuangdiarna khan sin inrikip riseh.

⁵Nin lâiah tukhomin vârna arsamin chu, mi murdi zianga thloi loia tikithlâi takka peh ngaitu Pathian kha ngên sela, ipen om a ti.

⁶Nikhomsela, ringlana boi riaikan iiam ngitkan ngên riseh. Tukhom ringlana nei chu ithlîn tuikhanglian a sêma a înrifôn diai angkah hi a nit.

⁷Khangkana mi, lungril bulbâl nei ino, a sintho murdia det ino mi khan chu Pumapa ziang ata îte imuh rangin ritûng no riseh.

⁹Suapui inriang tak khah chôiinrisânga a omin lôm sela,

¹⁰richong mi khom intlôma a omin lôm riseh, loisûl pâr angkan archongna kha a la boi rang a nit.

¹¹Inî a hong suak a, ithli lum tak a hong rângin loisûl khah ân thêm a, a pâr khah a ṭul a, a enhoina a hong ṭuai ngai. Khaangkan, richong khom a sum a buaipui sungin a irmang rang a nit.

¹²Thlêmna a tong lâi khoma ding indet chu a ham a ṭhat, fiana khah a khêl tenan chu Pumapan amah lungithlungtuhei zianga ipe a înkung, chôiinrisângna rênglukhum, ringna khah ai dong rang a nit.

¹³Tukhomin thlêmna a tongin, “Pathian îthlêm kêng kî nit,” ti tlak no riseh. Pathian chu isual ranga thlêm thei chi ni mak, ani khomin tute ithlêm ngai mak e.

¹⁴Mi tin mahni rizukna suala thlêm an nit chit ual a, amakhan â hôp a, ai ṭhui inrimang ngai a nit.

¹⁵Khante, kha rizukna khan nai a vong a, sual a nei a; sual khah a hong puitling tenan chu thina ai nei ngai a nit.

¹⁶Suapui lungthlunghei, ilêmin om no rei.

¹⁷Thilpêk iṭha tinrêng neh thilpêk rikip chu rivâna rithoka zuang, ivâr isiamtu Pa ziang ata zuang isuak a nit. Ani chu danglam ngai mak a, rilîm ichâng diai angkan rihêl danglamin izîngah nen om ngai mak.

¹⁸A thilsiam murdihei lâia irâ masatak rangin ama lungdo angkah takin thutaka rithokin a ne inei a nit.

¹⁹Ki suapui lungthlunghei, amahih remai rei. Mi tinin thu ringai richu sela, thusîr richu loiin, lungril rivuaiin om riseh.

²⁰Miriam ningthikna hin Pathianin ai zong felna khah isua thei ngai mak e.

²¹Khasikin, thil porinche chi tin neh sual tinrêng pai vang unla, nin lungrila Pathian thu itu, nangni saninring thei kha, ringaiichîn takkan ipom rei.

²²Sintho om loia, thu ringaitu ringot ini inrupa ben mahni rilêm no rei.

²³Tukhom thu ringaitu nia zôm ino chu, lîmena ri-ena mahni mêl diktak imutu angkah a nit.

²⁴Iṭha takkan ar-en a, a fe nôk nungin chu a mêl omzia arngil nôk zel ngai.

²⁵Khannisela, tukhom dân rikip, zalenna dân kha iṭha takka en a, khangkana om mai a, ringai a, ringil nôk zel loia, izôma zômtu chu a sinthona kipah ṭhativurin om a ti.

²⁶Tukhom sakho mi tak ritia, â lei vêng inṭha no chu mahnia rilêm a nit a, a sakhua khah chanlamboi a nit.

²⁷Ei Pa ei Pathian mitmua sakhua biak dân rithiang neh sual kop ino chu amahih a nit: Farahei neh numeihei an dengthei zoroa ingaisak a, rammual siatna kop loia rikiang hi a nit.