Read Biete JAKOBA 2 Bible Online

JAKOBA 2 - Biete bible

JAKOBA 2

¹Ki suapuihei, ei Pumapa Jisua Krista, Roinpuina Pumapa iamhei nin init angkan thleibîk nei no rei.

²Nin inkhômna inah mi rângkachak kutsabit ibuna puan iṭhatak isil hong lût sela; khante, inriang puan iṭetfap isil hong lût sa sela;

³puan iṭha tak isil khah marit nin tho a, a ziangah, “Nang chu ṭhungmun iṭhaah hin iṭhung roh,” nin ti a; khan, inriangte ziangah chu, “Nang chu son va ding roh, a nit nole, ki ke kôla iṭuangah hin iṭhung roh,” nin tin chu,

⁴thleibîk nin nei a, nin mi vatdân lungril a îsual ni mak im a?

⁵Ki suapui lungthlunghei, ringai rei, Pathianin hi rammual ringaia inrianghei hih, iamnaa richong rang neh, amah lungithlunghei ta ranga a înkung ram khah ilua rangin a irthlang tâk a nit.

⁶Nangnin chu inrianghei khah mualphoi nin sak ngai a. Mi richonghei hi an nuam nangni lotu neh roirêlna ina nangni kâi inlût ngaitu ni mak im a?

⁷Riming iṭha nin irput, â sîrinseh ngai khom anmani ni mak im a?

⁸Pathian Thubu-a chuang Dân roinpui tak, “Nangmah lung ni irthlung angkan ni bungahei lungthlung roh,” iti hih nin zômin chu nin ithôn ṭhat a nit.

⁹Khannisela, thleibîk nin neiin chu thil isual nin itho a nit, Dân isehtuhei nin nit.

¹⁰Tukhomin Dân zôm rikip riai khom seh, thupêk khatkah â siatin chu a rêngkan a îsiat a nit.

¹¹“Inrê no roh,” ititu ngir khan, “Mi that no roh,” ai ti sa a nit kha. Khasikin, inrê no man inla, mi ni thatin chu Dân isehtu ni nit ngir.

¹²Khanchu, zalenna dân imanga irêlpêka om rang ei nit iti ririan thu sîr unla, isin khom sin rei.

¹³Lungkhamna ṭang loia thil ithotu chu lungkhamna ṭang loiin irêlpêk nîng a ti; khanniseh, mi lunginkham thei kha chu roirêlna iṭi rang nei no nih.

¹⁴Ki suapuihei, mîn, “Iamna ki nei,” ti man sela, a sinthoah inlang viat no sela, im arfena? Khangkana iamna khan amah ai saninring thei rang mani?

¹⁵Suapuipa manih, suapuinu manih puansil iboiin neh fâknêk risamin om sela,

¹⁶nangmani lâia tukhôkin manih, a ziangah, “Rithlaringam takkan fen la, ilum pamkan neh ikhop takkan om roh,” ti unla, a taksa ranga a irsam khah peh no unla, im arfena?

¹⁷Khaangkah ngirin iamna ringot hih sintho boiin chu â thi a nit.

¹⁸Mi tukhôkin manih, “Mi ṭhenin iamna an nei a, mi ṭhenin sintho an nei,” tîng a ti. Nikhomsela, keima sâmna chu, “Ingkan im mîn sinthoah inlang loiin iamna ai nei thei nen mu roh, keiman ki iamna nei kha ki sinthon nang inmûng ki ti,” iti hih a nit.

¹⁹Pathian khatkah bang a om iti ni iam na? A ṭhat, ramrilihei khomin amakhah an iam a, iṭin an inthing ngai a nit.

²⁰Intlo, iamna hi sintho boiin chu chanlamboi a nit iti ni riat nuam im?

²¹Ei chibul Abrahama khan a naipa Isaka mâichâmah a lan lâiah khan, a sintho sikin kêng thiam ai chang ni mak im a?

²²A iamna neh a sintho khah munkan arkop a, a sintho khan a iamna khah a înrikip tâk a nit iti ni riat.

²³Pathian Thubûn, “Abrahaman Pathian a iam a, kha a iamna sikah khan Pathianin mi felin ai be a nit,” ai ti khah a hong idik tâk a; khanchu, Pathian malin ibe a nit tâk a.

²⁴Iamna ringotin ni loiin, sintho sikin keng mîn Pathian ziangah thiam an ichang ngai iti nin riat tâk.

²⁵Khaangkah khan, Rahabi nochizuar khom khan, Israel entlâttuhei khah a lei don a, lam dang tianga infe ranga a lei san lâiah khan a sintho sikin thiam ai chang ni mak im a?

²⁶Takpum hi rithla ṭang iloiin chu â thi ai nit angkan iamna hih sintho ṭang loiin chu â thi a nit.