Read Biete JAKOBA 3 Bible Online

JAKOBA 3 - Biete bible

JAKOBA 3

¹Ki suapuihei, minriseitu ichang riai ngêt tum no rei. Minriseituhei hih mi danghei nêka khir ualin roiirêl pêk ei lai nit rang a nit iti nin riat a.

²Ei rêngkan zoro tin thil ei thonsual mai ngai a. Tukhom a thu sîra thonsual ngai ino mi chu mi puitling a nit a, khangkana mi khan a takpumpui khom ai enkol thei a nit.

³Ei thu inzôm rangin sakor bâiah lâkam ei inpet a, a takpumpui khom ei nuamna tiang tiang ei iher thei ngai.

⁴Rikuanghei khom hih a lian ok nâka, phâivua râtin a sêm inlêng khom a, ân lôntu khan vaitha chînte mangin a nuamna tiang tiang a înfe ngai a nit.

⁵Khangkah ngirin ilei khom hih takpum iṭang ichînte ni khom seh, arsong pam a nit. Meirisi lekten ramphêk rizat khom a kâng riai ngai dân hih ngaitua ta u.

⁶Ilei khom hih mei angkah a nit a, siatna tinrênga sip, ei takpuma kop, ei takpumpui innim ngaitu a nit a, ei ringnun pumpui ihâla dûkmun meidîla dengintheitu a nit.

⁷Mîring tinrêng, ramsa neh iva hei, bokrivâk ngai neh inga hei hih vâiinzong thei an nit a, miriamin ivâi khom an vâiinzong tâk ngai.

⁸Khanniseh, ilei hi chu tutên an ivâiinzong thei tlak ino, sual om thei ṭian ino, thina tûra sip a nit.

⁹Amahih imangin ei Pumapa, ei Pa chu ei inpâk a; ei miriam champui Pathian ri-angpuia siamhei vânisâmna khomin ei imang ngai a nit.

¹⁰Bâi khatka rithokin inpâkna neh vânisâmna ai suak ngai a nit. Ki suapuihei, khangkan chu a nit rang ni mak e.

¹¹Tuinâr khatka rithokin tui itui neh tui tui ino suak ngai mak e.

¹²Ki suapuihei, theichâng kungah oliv irâ ngai mak a; grep kungah khom theichâng irâ ngai mak e; ichi khura[1] rithok khomin tuipût rithiang hong suak thei ngai mak e.

¹³Nin lâiah vârna neh riatthiamna nei an om im? Ringaiichîn tak neh ivâr takkan a sintho ṭhat neh a om dân ṭhatin inlang riseh.

¹⁴Khanniseh, nin lungrilah narsana inthûk tak neh marangṭhat zongna nin nei duaiin chu, thu dik ikalin nin vârna songin milak ril no rei.

¹⁵Khangkana vârna kha chu chungtianga rithoka suak ni mak a, rammual neh taksa rizukna neh ramrilia rithoka suak a nit.

¹⁶Rinarsana neh marangṭhat zongna a omna kipah chu buaina neh sualna chi tinrêng a om ngai.

¹⁷Chungtianga rithoka vârna chu a masa takah arthianga, ringei a nuama, â lung arvuai a, arsônpui a hoi a; lungkhamnan a sip a, irâ ṭha â sua ngai a, thleibîk nei mak a, vârrilet mak e.

¹⁸Ṭhatna hih ringeina râ, ringeina siamtuhein ringeina zonga chi an itu râ khah a nit.