Read Biete JAKOBA 4 Bible Online

JAKOBA 4 - Biete bible

JAKOBA 4

¹Nin lâia ridoina neh rikhalnahei khah taka rithoka hong isuak im ai nit? Hoiinhâi nin rizukna, nin lungril sunga ridoina siam mai ngaia rithoka hong isuak ni mak im a?

²Nin rizuk a, nin nei thei no sikin mi nin that a; nin idit a, nin nei thei no sikin nin ringo nin risual a; Pathian ziangah nin ithlun no sikin nin inuam kha nin inei thei ino a nit.

³Nin zong khomin ni zong dân â dik no sikin mu ngai mak chei, hoiinhâina mang nin tum sikin.

⁴Nangni inrêhei [2] o, rammual rualrichanpui hih Pathian irâl nitna a nit iti nin iriat ino mani? Khaangkan, tukhom rammual rualrichanpui inuamin chu Pathian irâl ai chang ngai a nit.

⁵Pathian Thubûn, “Eimania Pathianin rithla ai sia hin a ne dit bîkzia a înlang a nit,” ai ti hih idik loi rangin nin iiam mani?

⁶Khannisela, Pathianin lungkhamna a ne la vur intam nôk ual a. Khasikin, Pathian Thubûn, “Pathianin lârripâkhei â dan a, ringaiichînhei chu lung ân kham ngai” ai ti a nit.

⁷Khasikah khan, Pathian thu thun om unla, Diabola khah idan rei; khanchu, nangni marak a ti.

⁸Pathian nâi rei, ani khomin nangni nâi a ti. Mi sualhei o, nin kuthei khah risûnfâi rei; Vârrilethei o, nin lungril inrithiang rei.

⁹Ngaiinseh unla, ngûi unla, ṭap rei; nin inui khah ngaisiatin rilet sela, nin râifân khah ngûinan rilet riseh.

¹⁰Pumapa mitmuah nin ringai inchîn unla; khanchu, aman nangni chôiinrisâng a ti.

¹¹Suapuihei, risîr risak no rei. Tukhomin a suapui â sîrinsiatin manih, a demin manih chu Dân a isîrinsiat a nit a, Dân ai dem a nit. Dân ni demin chu Dân izômtu ni mak che a, roiirêltu kêng ni nit ual a nit.

¹²Dân ipetu neh roiirêltu chu Pathian bang kêng ai nit. Amah bang a nit mi saninring theia ân rimang theitu chu; nangmah, ni miriam champui idem ngaitu khah tu ngân im ni irsôn kha?

¹³Atûnah hin ringai ta u, nangmani, “Vuani manih, naktûka manih, kha khopuiah khan fêng ei ta, amakhan kumkah va thang ei ta, rivai va thông ei ta, sum vân pung ok ei ti,” itituhei o;

¹⁴nin ringna khah naktûk im ai chang rang ilua reh mak chei u. Nin ringna khah im a nit a? Sûm itôitekah hong ilanga, â boi nôk zel ngai angkah hi a nit.

¹⁵Khasikah khan, “Pumapan ṭhat a tin chu dam ei ta, kha kha, chu chu thông ei ti,” nin ti ual rang a nit.

¹⁶Khannisela, atûnah hin ripâk takkan nin irsong a nit. Khangkana risong taka om kha chu sual a nit.

¹⁷Khaangkan, tukhom sin iṭha a sin rang ireh ṭianka sin ino chu a ta rangin sual a nit.