Read Biete JAKOBA 5 Bible Online

JAKOBA 5 - Biete bible

JAKOBA 5

¹Richonghei, ringai ta u, nin chunga dengtheina zuang itlung rang sikah hin ṭap unla, khêkiroi ta rei.

²Nin richonhei a siat zoi tâk a, nin puanhei khom ringên a fâk zoi tâk.

³Nin rângkachak neh nin sum khom ân êk zoi tâk a; hi ân êk hih nin puanozia inlangtu nîng a ta, meiin îtika ai kângrivâm ngai angkan nin taksa khah fân rimang a ti. Hi sûn nungkhônheiah hin richon nin ibûm a nit hi.

⁴Ringai ta u, nin loia rilo ngaihei thalo nin îrênpêkhei khah an ikhêk a, bu âttuhei khêk irî khah Tinrêngthothei Pumapa Pathian ikuar a tlung tâk.

⁵Rinêngah hin hoiinhâi tak neh ihoi takkan nin iom a nit. That nî-a [3] rang nin lei irvâi inthâi a nit hi.

⁶Mi fel khah thiamno nin inchang a, nin that a, aman chu nangni doi mak e.

⁷Khaangkan, suapuihei, Pumapa zuang nôk mâkah chu idiar takkan om rei. Ringai ta u, loi ithotu diar tlia kha. A loi khan irâ lutak â sua pêk mâkah chu ruatui masa neh ruatui nungkhôn [4] khah a ngâk ngêi ngêi ngai.

⁸Nangni khom idiar takkan om unla, lungril idet tak ripuh rei; Pumapa zuang nôk rang khah ai nâi tâk a nit.

⁹Suapuihei, thiamno changa nin om nona rangin ridem risak no rei. Ringai ta u, Roirêltu khah inkot bulah a îding ṭian tâk a nit.

¹⁰Suapuihei, Pumapa riminga thu sîr ngai zânthlahein dengtheina idiar takka an tuang dân khah remai unla, anni khah entonin nei rei.

¹¹An lei tuangdiar sikin mi hamṭha ei iti a nit. Joba tuangdiar tlia khah nin riat a, Pumapan a nungkhôna ṭhat a vurzia khah nin riat. Pumapa chu khorngaina neh lungkhamna sip a nit.

¹²Suapuihei, ikhom ni seh, ṭong nin inkung zoro khomin vâni chu risâm ngai no rei. Rivân isâmin manih, rinêng isâmin manih, thil dang riming isâmin manih, vâni risâm no rei. A nit nin iti chu, “A nit,” ringot ti unla, ni mak nin iti chu, “Ni mak,” ringot ni riseh; khanchu, thiamno changin om no tin u.

¹³Nin lâiah intak ituang an om im? Ṭongṭai riseh. Râiifân an om im? Inpâk la sak riseh.

¹⁴Nin lâiah damino an om im? Koindang upahei koi sela, anni khan Pumapa rimingin siriak inôt sela, a ta rangin ṭongṭai pêk riseh.

¹⁵Khanchu, iiam ngita ṭongṭaina khan damino khah indam a ta, Pumapa khan ani khah kâiithoi a ta; sual a lei isin tâkhei khom izâ nîng a ti.

¹⁶Khaangkan, nin sualhei thupha richôi risak unla riṭongṭaipui risak rei; khanchu, indamin om nin ti. Ṭhatnemringai takka mi fel ṭongṭaina khan thil roinpui tak ai tho thei a nit.

¹⁷Elija khah eimani angkana miriam ngir a nit a, rua sûr nona rangin ṭhatnemringai takkan a ṭongṭai a, kum ithumkah neh kum rilangka sung rinêngah rua sûr khâi mak a.

¹⁸Khante, a ṭongṭai nôk a, rivân ata rua a zuang sûr nôk a, rinêngin irâ â sua nôk tâk a.

¹⁹Suapuihei, nin lâia mi, thutaka rithokin ivâi rimang ta sela, tukhôkin manih a hong ṭhui ikhîr nôkin chu,

²⁰mi sual, a lampui ivâina ata hong ṭhui ikhîr nôktu khan kha mi sual rithla khah thina rithokin inring a ta, sual itam takka izâna ithlun pêk a ti iti remai rei.