Read Biete 1 PETERA 1 Bible Online

1 PETERA 1 - Biete bible

1 PETERA 1

¹Petera, Jisua Krista tirtôn hin, Pathian mi rithlang, Ponto ram hei, Galatia ram hei, Kapadokia ram hei, Asia ram hei neh Bethunia ram hei murdia arthek indarhei chibai ki bûk.

²Pa Pathian iriat thlâm angkana rithlang, Jisua Krista thu zôm rang neh a thisena risûnfâi ranga Rithla Rithiang in nin nit. Nin chungah lungkhamna neh ringeina inpungin om riseh.

³Ei Pumapa Jisua Krista Pathian neh Pa chu inpâkin om riseh. Jisua Krista chu mithi lâi ata kâiithoiin, tûngna ring inei rangin a lungkham roinpui takah khan a nen ring nôk tâk a.

⁴Richon seh thei ino, dem kâi ino neh ṭuai thei ino lua rang ei nit a, kha richon khah nin ta rangin rivânah irê diam tâk a nit.

⁵Saninringna, zoro nungkhôna inlang ranga rifûk diam chu imuh rangin iamna sika Pathian sinthotheinaa vêng inṭhat chu nin nit.

⁶Fiana tinrêng nin tong a, nin lungzîng lâi khomin ilôm takkan om rei.

⁷Nin iamna fiana rang a nit, â seh thei rângkachak ilua meiah an fia ngai a; a nêka luh ual, nin iamna khah ifian a om rang a nit. Khanchu, Jisua Krista a zuang inlâr Nikhuaah khan inpâkna hei, roinpuina hei, chôiinrisângna hei mûng nin ti.

⁸Ani khah la mu tlak ngai no khom unla lung nin thlung a, atûn la mu no khom unla nin iam a, lômna roinpui, isîr thei inon nin isip a nit hi;

⁹nin iamna râ, nin rithla saninringna khah nin mu sikin.

¹⁰Hi saninringna thu hih zânthlahein iṭha takka zongin an sui a; Pathian thilpêk, lungkhamna nin chunga zuang itlung rang khah an lei îsîr thlâm a nit.

¹¹Krista Rithla anmania om khan, Krista tuang rang tliahei neh kha nunga roinpuina om ranghei khah a lei inriat thlâm a, tik zoron im a zuang itlung rang, ingkan im a zuang itlung rang iti iria an itum ngai a nit.

¹²Kha zânthlahei khah anmani ta rang ni loiin, nangmani ta ranga an isin a nit iti inria an nit a. Rivâna rithoka itir, Rithla Rithiang ṭangpuinan Thurchi Ṭha nangni sîr pêkhei khan amakhah nangni an îsîr pêk a nit kha. Kha thil khah vântirtônhei khomin â ria an inuam ngai a nit.

¹³Khasikin, lungril risiam thlâmka omin ringai ving unla, Jisua Krista a zuang inlâr tika lungkhamna nangni a zuang ichôi pêk rang khah tûng ngit rei.

¹⁴Nai, thu-ôihei angkan om unla, tianlâi, nin riat no lâia nin rizukna hei angkah khan om no rei.

¹⁵Nangni koitu a irthiang angkan nangni khom nin châng dân lam tinrêngah rithiang rei.

¹⁶“Keimah ker thiang sikin nin rithiang rang a nit,” Pathian Thubûn ai ti angkah khan.

¹⁷Khante, thleibîk nei loia mi tin an sintho angkah chita ngaitua pêk ngaitu khah Pan nin neiin chu, hi rinêngah nin châm sungah hin amah ingîk pumin om rei.

¹⁸Nin chibulhei ata nin idong, nunchan mangmunboi tak ata khah, thil â seh thei sum neh rângkachaka ritlan ni mak chei a;

¹⁹berate demnaboi neh rithiang nona nei ino, Krista thisen ilu taka ritlan nin nit iti nin riat a.

²⁰Ani chu leilung insiang maa inkung thlâm a nit a, atûn zoro nungkhônah hin nangmani ta rangin a zuang îlang tâk a nit.

²¹Thina rithoka â kâiithoitu neh roinpuina petu Pathian khah ama sikin nin iam tâk a; khanchu, Pathian khah nin iamna neh nin tûngna ringatna tak a hong nit tâk.

²²Atûn chu thutak nin zôm sikin nin lungril nin inrithiang a, tititakin nin iampuihei lung nin thlung tâk a, lungril murdin lungrithlung risak rei.

²³Chi seh thei ata ni loiin, chi seh thei ino Pathian kumtluang thu ring ata suak ithar nin nit.

²⁴Pathian Thubûn, “Miriam murdi hih loisûl iring angkah an nit, An roinpuinahei khom loisûl pâr angkah a nit. Loisûl chu a thêm a, a pâr khom a ṭul ngai.

²⁵Pumapa thu chu kumtluangin ai om mai a nit,” ai ti a nit. Amakhah a nit, Thurchi Ṭha nangni an îsîr pêk kha.