Read Biete 1 PETERA 4 Bible Online

1 PETERA 4 - Biete bible

1 PETERA 4

¹Kristan [4] taksan a tuang tâk sikin nangni khom khangkana lungril khah ripuh rei; tukhom taksaa tuang tâkin chu sual a mâk ngai;

²taksaa a la om kârkah khom taksa nuamlama om khâi loia Pathian lungdoa a om theina rangin.

³Jentailhein an itho nuam ngai, sûn nung tianga nin lei itho tâk khah ân rup tâk; hurna hei, taksa rizukna hei, zu dûna hei, zu mun hoiinhâina hei, zu ina ribukna hei neh mirmil biakna porinche hei lei hong ithon zoro nin imang ngai a nit kha.

⁴Atûn chu kha an nuamzâka an omnah khan nin ṭang khâi no sikah hin an ringai arkhêl a, nangni an irkôk insiat tâk a nit.

⁵Nikhomsela, khahei khan, Pathian, â ring neh â thi hei roi irêl ranga arfo diama ziangah khan an thurchi chit anmanin la sîr an ti.

⁶Hi sikah hin kêng mithihei ziangah khom Thurchi Ṭha isîr ai nit, taksaa om miriamhei angkan an chungthu irêl a nit a, rithlaah khan Pathian angkana an ring theina rangin.

⁷Thil tinrêng mongna zoro a nâi tâk a, nin ṭongṭai theina rangin lungril ifeltak riputin ridîn rei.

⁸Thil dang murdi nêkan lungril takin lungrithlung risak rei, lungthlungnan sual itam takka arkhû ngai.

⁹Chiar loiin rithlun risak rei.

¹⁰Pathian lungkhamna thilpêk enkoltu ṭhahei angkan Pathian thilpêk nin idong murdi khah sin itho pêk risakna rangin mang rei.

¹¹Tukhomin thu â sîrin chu Pathian thucha isîr ngêt riseh; sinthotu khomin Pathianin râtna a pêk lam takkan tho riseh; khanchu, Jisua Krista sikin Pathian chu thil tinrêngah chôiinrisângin om thei a ti, roinpuina neh sinthotheina chu kumkhuantluangkan ama ta a nit a. Amen.

¹²Rual lungthlunghei, fiana nâ tak nin ituang hih thil rikhêl tak nin isik tâkin be no rei.

¹³Krista tuangna ituangpuituhei nin nit sikin ilômin lôm ual unla, roinpui takka a zuang ilang tikah râifânna neh lômnan nin lai sip rang a nit.

¹⁴Krista riming sika iêroa nin iom a nitin chu nin ham a ṭhat; Rithla roinpui, Pathian Rithla khah, nin chungah a om tina a nit.

¹⁵Nin lâiah tukhomin nin tuangin, mi that sika manih, inru tho sika manih, thil thonsual sika manih, mi dang inbuaitu nin nit sika manih chu ni tlak no riseh.

¹⁶Khanniseh, Kristian nin nit sika nin ituang a nitin chu nin izak rang ni mak, Krista riming nin riput sikin Pathian ziangah lômthu isîr lem rei.

¹⁷Roirêlna chu phut zoro a hong tlung tâk a, Pathian insungkuaheia rithokin iphut nîng a ti. Eimaniah arphut a nitin chu, Pathian Thurchi Ṭha iam inohei mongna khah ingkah takin im nîng a ti na?

¹⁸Pathian Thubûn, “Mi ṭhahei saninring inih rang ilua ân takin te, Pathian ngaisak ino mi sualhei khah, Im an ichang rang tâk?” ai ti angkah khan.

¹⁹Khasikin, Pathian lungdoa tuanghei khan sin iṭha tho maiin an rithla khah anmani Siamtu iamomtak kutah inkol let riseh.