Read Biete 1 PETERA 5 Bible Online

1 PETERA 5 - Biete bible

1 PETERA 5

¹Khaangkan, nin lâia koindang upahei khah, keimah, an upa champui, Krista tuangnahei imutu neh roinpuina zuang ilang ranga rangtum inei rangtu hin ki îthor a nit.

²Nin lâia Pathian berahei khah enkol inṭha rei, rizuk iloiin ni loiin, Pathian nangni nuamlama rizuk takka idonsuiin, thalo tûng ringot sikin ni loiin, sintho nuamna lungril ineiin enkol rei.

³Nin idonsuihei chungah inlal no unla, beralômhei enton inrup ni ual rei.

⁴Khanchu, Bera enkoltu Laltak khah a zuang inlâr tikah chôiinrisângna rênglukhum roinpui, a vâr ṭuai ngai ino khah dong nin ti.

⁵Khangkah ngirin, nangni vânglâihei, ulianhei thu zôm rei. Nin rêngkan ringaichînnaa rithlukin sin ritho pêk risak rei. Pathian Thubûn, “Pathianin lârripâkhei â kal a, ringaiichînhei chu lung ân kham ngai,” ai ti a nit.

⁶Khasikin, a zoro taka chôiinrisânga nin om theina rangin Pathian kut irât tak nuaiah ribil rei.

⁷Nangni a donsui ngai sikin nin lungzîngna murdi ama chungah bâng riai rei.

⁸Ringai ving unla, ridîn rei; nin irâlpa, Diabola chu, sakeibaknei irung angkan a fâk inrimang rang izongin a irvak diai a nit.

⁹Iamnah hin iding indet ngit unla, ani khah doi rei. Rammual pumpuiah nin iamtu champuihei khomin khangkah takin an tuang sa iti nin iriat a nit.

¹⁰Khante, itôitekah nin tuang tenan chu, Kristaa kumtluang roinpuina dong ranga nangni koitu, lungkhamna sip Pathian khan nangni siaminrikip a ta, nangni siamindingin râtna neh detna nangni pêng a ti.

¹¹Ama ziangah khan sinthotheina kumkhuantluangkan om riseh. Amen.

¹²Ki suapuipa, mi iamoma kî be, Silvana kutah hin hi lekhathon itôite hih nangni ki hong ithon a nit. Amahih Pathian lungkhamna chu a nit iti nangni inreh rang neh amakhan iding indet ngit ranga nangni ke thorna chu a nit.

¹³Babilon koindang, nangmani angkah ngira rithlang hin chibai nangni an bûk a; ki naipa Marka khomin chibai nangni a bûk.

¹⁴Krista lungthlungnaa kut ritun chibai ribûk risak rei. Nangmani Kristaa om murdihei ziangah ringeina om riseh.