Read Biete 2 PETERA 1 Bible Online

2 PETERA 1 - Biete bible

2 PETERA 1

¹Jisua Krista suak neh tirtôn Simon Petera khan, ne Saninringtu Jisua Krista zâr neh ei Pathian felna zâra iamna lûtak kin inei angkana neihei chibai ki bûk a.

²Pathian neh ei Pumapa Jisua nin riatnaah khan lungkhamna neh ringeina nin chungah inpungin om riseh.

³A roinpuina neh ṭhatna dong ranga ne koitu ei riat tâk sika Pathian ṭina ringnuna ei ring theina rangin, Pathian sinthotheina khan ei inang murdi a ne pêk tâk.

⁴Khanchu, thilpêk roinpui neh ilutak a înkung khah a ne pêk tâk a; kha thilpêkhei sikah khan rammual sual rizukna, ne seh theia rithokin nin zôk a, Pathian nitna rithiang khah nin îtlângpui thei tâk a nit.

⁵Hi sik takah hin nin theidôr isuan, nin iamnaah khan ṭhatna bôk unla; nin ṭhatnaah khan riatna bôk unla;

⁶nin riatnaah khan ridîn theina bôk unla; nin ridîn theinaah khan tuangdiarna bôk unla; nin tuangdiarnaah khan Pathian ngaisakna bôk unla;

⁷nin Pathian ngaisaknaah khan suapui kanna bôk unla; nin suapui rikannaah khan lungthlungna bôk rei.

⁸Hi nitnahei hih nin nei a, a pung maiin chu ei Pumapa Jisua Krista nin riatnaah khan takritâi tak neh irâ sua nuam takin nangni siam a ti.

⁹Tukhom khahei nei ino chu mitizîng, a kol a kiang bang imu, a sual iluihei infâi pêk an nit iti ringil tâk an nit.

¹⁰Khanchu, ki suapuihei, Pathian nangni koina neh rithlangna hih inlang rangin zâltak isongin idet takkan iding rei; khangkana dinghei kha chu tiklâi khomin ilîr no nih.

¹¹Khaangkan, ei Pumapa neh Saninringtu Jisua Krista kumtluang ramah ilôm takkan nangni inlût a ti.

¹²Khasikin, thutak nin iriatah khan idet takkan om ta khom unla, hi thu riat intharna nangni peh mai hih kî nuam a nit.

¹³Hi takpuma ki om sung kârkah chu hi thuhei nin riatmaina ithor inhar mai hih ki sin rangin kî be a nit.

¹⁴Ei Pumapa Jisua Kristan ifel takka a ne îril angkan hi thi thei takpum hih khek viak tâng ki ti iti ki riat.

¹⁵Ki thi nung ten khoma hi thuhei hih nin riatmai theina rang lam nangni siam pêk rangin theidôrah zâlsong ki ti.

¹⁶Ei Pumapa Jisua Krista chu roinpui takka a zuang nôk rang thu nangni kin iril lâiah khan, iphuatot phûngheiah ringat mang ung a, a roinpuina khah mit ngêia â mutuhei kin nit.

¹⁷Ani khah Pa Pathianin chôiinrisângna neh roinpuina a pêk lâiah khan, Roinpuitaka zianga rithokin rôl a zuang suak a, “Ani hih ki Naipa lungthlungtak, a chungah kî lôm tak takah khah a nit,” a ti a.

¹⁸Kha rôl, rivâna rithoka zuang isuak khah, keini khomin itlâng rithianga a ziangah kin om lâiah khan kin iriat a nit.

¹⁹Khante, zânthlahei thu lei inpuang tâk khah â dik ngêt iti keini khomin idet nôk ualkan kin îpom tâk a nit. Khua a hong vâr ma a, sikhovâr kha nin lungrilah a hong vâr suak mâkah, amakhah meiser, mun izînga vâr an iuksak angkan nin uksakin chu thôn ṭhâng nin ti.

²⁰Pathian Thubu-a rillôkna thu rêng rêng hih mahni khâtin irilfia rang ni make iti reh masa zel rei.

²¹Rillôkna thu rêng rêng hih miriam nuama suak ni ngai mak a, miriamhei khah Rithla Rithiang izêka omin Pathian ziang ata thu suak khah an iril ngai a nit.