Read Biete 1 JOHANA 2 Bible Online

1 JOHANA 2 - Biete bible

1 JOHANA 2

¹Ki naihei, nin isual nona rangin hi thu hih nin ziangah ki irziak a nit. Nikhomsela, tukhom a lei isualin chu, Pa zianga ei rithûla ne ṭongpêktu mi fel, Jisua Krista chu ei nei.

²Ani chu ei sualhei izâna[2] a nit, eimani sual bang ni mak a, rammuala mi murdi sual izâna khom a nit.

³A thupêkhei ei zômin chu amah ei iriat a nit iti ei riatinfel a.

⁴“Amah chu ki riat,” itia a thupêkhei zôm ual ino chu kha mi khah milak a nit a, amah-ah thutak ai om ino a nit.

⁵Tukhomin a thu a zômin chu Pathian lung ai thlung titak a nit. Pathianah ei om ngêt iti ei riatinfel theina chu amahih a nit:

⁶“Pathianah ki om mai, ititu chu Jisua Krista ringnun angkan a ring rang a nit,” iti hi.

⁷Ki rual lungthlunghei, nin ziangah thupêk ithar ki irziak ni mak e; thupêk ilui, a tîr ata nin inei khah ki irziak a nit. Kha thupêk ilui khah nin thu lei riat tâk a nit.

⁸Nikhomsela, nin zianga thupêk atûna ki irziak hih â thar a nitna ten khom a om, kha thutak khah Kristaah neh nangmaniah â lang. Izîng chu arkiang thiai tâk, ivâr tak tak khah a zuang vâr tâk sikah hin.

⁹Ivâra om ritia, a suapui a la nelin chu atûn tenah hin izîngah a lai om mai a nit.

¹⁰Mahni suapui lungithlungtu chu ivârah a om mai a, a ta rangin ibâna rang reng omak e.[3]

¹¹Mahni suapui ineltu chu izîngah a om a, izîngah armai ṭian a, izîngin a mit ân del tâk sikin a fena khom ai riat ngai ino a nit.

¹²Ki naihei, Krista sika nin sualhei izâ a nit tâk sikin nin ziangah ki irziak a nit.

¹³Pahei, a tîr ata om mai khah nin riat tâk sikin nin ziangah ki irziak a nit hi. Vânglâihei, Diabola khah nin inê tâk sikin nin ziangah ki irziak a nit.

¹⁴Ki naihei, Pa khah nin riat tâk sikin nin ziangah ki irziak a nit. Pahei, a tîr ata om mai khah nin riat tâk sikin nin ziangah ki irziak a nit. Vânglâihei, nin rât a, Pathian thu nangmaniah a om sika Diabola khah nin inê tâk sikin nin ziangah ki irziak a nit.

¹⁵Rammual hih lungthlung no unla, rammuala thil iomhei khom lungthlung no rei. Tukhomin rammual hi lung a thlungin chu, Pa chu lung ai thlung ino a nit.

¹⁶Rammuala thil iom murdi, taksa rizukna hei, mit rizukna hei neh damsung roinpuina lem hei hih Pa zianga rithoka suak ni mak a, rammuala rithoka suak korong a nit.

¹⁷Rammual hih arzukna pumin armang thiai a nit; Pathian lungdo sintu chu kumkhuakan om mai a ti.

¹⁸Ki naihei, zoro nungkhôn a nâi tâk, Krista doitu la hong a ti iti nin iriat angkah khan, atûnah hin Krista doitu itam takkah an hong suak tâk; khasikah khan, zoro nungkhôn a nit tâk iti ei iriat a nit.

¹⁹Hi mihei hih ei pôla mi ni tlak mak e, kha sikah khan an ne imâk a nit; ei pôla mi ni sela chu ei ziangah om mai an ti. Nikhomsela, an rêngkan ei pôla mi ni riai mak iti â lang fiana rangin an ne imâk tâk a nit.

²⁰Nikhomsela, Kristan Rithla Rithiang nin chungah a vur [4] tâk sikin nin rêngkan [5] thutak nin iriat a nit.

²¹Khasikin, thutak nin riat no sika nin ziangah ki irziak ni mak; nin riat sik neh thutaka rithokin milak a suak ngai no sika ki irziak a nit.

²²Jisua chu Mesia a nit iti pom inotu nêka milak tûm â om rang? Tukhom Pa neh Naipa pom inotu khah Krista doitu chu a nit.

²³Tukhom Naipa pom ino chu Pa khom a îpom ino a nit; Naipa pomtu khan chu Pa khom a îpom a nit.

²⁴Nangni chu a tîr ata nin thu riat khah nangmaniah in-om mai rei. A tîr ata nin iriat khah nangmaniah a om maiin chu, Paah neh Naipaah nin iom mai rang a nit.

²⁵Amahih a nit, a ṭonginkung, amah ngêiin ei zianga a înkung chu: Kumtluang ringna hi.

²⁶Nangni ṭhui inrimang itumtuhei chungchâng thu hi nin ziangah ki irziak a nit.

²⁷Nangni chu, Kristan ama Rithla nin chunga ai vur khah nangmaniah a om mai a, tute înrisei nang mak chei, Rithla khan thil tinrêng nangni ân risei a, nangni a înrisei khah â dik a, milak ni mak e. Khanchu, nangni a înrisei angkah khan Kristaah om mai rei.

²⁸Atûnah hin, ki naihei, a zuang inlâr tikah ihâi takkan ei om a, a zuang Nikhuah izak loia ei om theina rangin amah-ah om rei.

²⁹Krista chu mi fel tak a nit iti nin riat sikin tukhom idik taka sintu murdi chu Pathian nai an nit iti reh rei.