Read Biete 1 JOHANA 3 Bible Online

1 JOHANA 3 - Biete bible

1 JOHANA 3

¹Ringai ta u, Pa lung ne thlungna hi ân thûk vang na! Pathian naihein a ne ibe tâk hi. Khaangkan, a naihei ei init pial a nit. Hi sikah hin rammualin a ne iriat ino a nit, Amah chu an riat no sikin.

²Ki rual lungthlunghei, atûnah hin Pathian naihei ei nit tâk a, ingkan im ei la om rang iti chu la lang tak mak e. Nikhomsela, Krista a zuang inlâr tikah chu ama angin om tâng ei ti iti chu ei riat, ani chu a nit lam angkah takin ei imu rang a nit sikin.

³Tukhom Kristaa hi tûngna nei kan chu amah a irthiang angkan an rithiang ngai.

⁴Tukhom sual isin kan chu dân a îsiat a nit, sual chu dân isiatna a nit.

⁵Krista khah sualhei inboi rangin a zuang ilang a, amah-ah khan sual omak e iti nin riat a.

⁶Tukhom Kristaa om mai chu isual ngai mak e; tukhom sual la sin mai chu ani khah mu mak a, ireh khom reh mak e.

⁷Ki naihei, tutên nangni lêm no riseh. Krista chu mi fel tak ai nit angkan thil dik isintu chu mi dik a nit.

⁸Thil isual isintu chu Diabola rithoka suak a nit; Diabola chu a tîr ata â sual pial a nit. Pathian Naipa a zuang ilangna bi tak chu Diabola sinthohei inboi ranga a nit.

⁹Tukhom Pathian nai chu, Pathian nitna amah-ah a om mai sikin isual khâi ngai mak e; Pathian khah a Pa a nit sikin a îsual thei khâi ino a nit.

¹⁰Pathian naihei neh Diabola naihei an thleina chu amahih a nit: Tukhom thil dik sin ino neh a suapui lungthlung ino chu Pathian nai ni mak e.

¹¹Atîr ata thucha nin iriat khah amahih a nit, lung ei rithlung risak chit rang a nit iti hih.

¹²Kaina, mi sual lâia mi, a unaipa Abela thattu angkah khan chu om no min u. Ithôm ai that kha? Ama sinthohei â suala, a unaipa sinthohei â dik sikin a nit.

¹³Ki suapuihei, rammualin nangni a nel khomin nin ringai inrikhêl no rei.

¹⁴Eini chu ei suapuihei lung ei thlung sikin thina ata ei suak a, ringnaah ei lût tâk iti ei iriat a nit. Tukhom lungthlungna nei ino chu thinaah a lai om mai a nit.

¹⁵Tukhom a suapui inel chu mi that a nit; tukhom mi that chu kumtluang ringna nei no nih iti nin riat.

¹⁶Aman ei ta ranga a ringna ai pêk hin lungthlungna hih im ai nit iti ei riat tâk. Eini khomin ei suapuihei ta rangin ei ringna ei pêk sa rang a nit.

¹⁷Tûn manih rammual richongna neiin a suapui risamin mu sela, a chungah lungkhamna nei no sela, Pathian lungthlungna khah ingkan im amah-ah a om thei rang?

¹⁸Ki naihei, ei ṭong neh ei bâi bangin lungrithlung no min u, sintho neh a tak takin ni ual riseh.

¹⁹Khanchu, amakhan thutakah ei om iti riang ei ta, a makungah khom ingam takkan om thei ei ti.

²⁰Ei lungril iluan thiam no a nen changin chu, Pathian chu ei lungril nêkan a roinpui ual a, tinrêng ai riat riai a nit iti ei iriat a nit.

²¹Ki rual lungthlunghei, ei lungrilin thiam no a nen chang non chu, Pathian makungah ei îhâi ngam ngai a nit.

²²Khaangkan, a thupêkhei ei zôm a, a lômrua ei sin sikin a zianga ei ingên murdi ei imu mai ngai a nit.

²³A thupêk chu amahih a nit: A Naipa Jisua Krista ei iam a, a thupêk angkana lung ei irthlung risak hih.

²⁴Pathian thupêk izômtu chu Pathianah a om mai a, Pathian khom amah-ah ai om ngai a nit. Khante, ama Rithla a ne pêk sikah hin Pathian chu eimaniah a om mai iti ei iriat a nit.