Read Biete 1 JOHANA 4 Bible Online

1 JOHANA 4 - Biete bible

1 JOHANA 4

¹Ki rual lungthlunghei, Rithla [6] ki nei iti pai murdi iam no rei, an Rithla nei khah Pathiana rithoka a nit neh nit no fia rei; zânthla lem itam takkah rammualah an hong suak tâk sikin.

²Amahih Pathian Rithla nin riat theina rang chu a nit: Jisua Krista taksan a zuang itia inpuang murdi chu Rithla ai dong khah Pathiana rithoka suak a nit.

³Nikhomsela, Jisua thlop inohei[7] rithla dong kha chu Pathiana rithoka suak ni mak e. Kha rithla kha chu Krista doitua rithoka suak a nit, la hong a ti iti nin lei iriat thlâm tâk kha a nit a, atûn khom rammualah ai om pial tâk a nit.

⁴Ki naihei, Pathiana rithoka suak nin nit a, nangmania om Rithla khah rammuala mihei zianga om nêkan chu a roinpui ual sikin zânthla lemhei khah nin inê tâk.

⁵Anni chu rammual mi an nit a; khasikin, rammual mi angkan thu an isîr a, rammualin an thu a irngai pêk ngai a nit.

⁶Eini chu Pathiana rithoka suak ei nit a; Pathian iretuhei khan ei thu khom an ringai ngai; Pathiana rithoka suak ni non chu ei thu khom ringai ngai mak e. Amakhah Rithla dik neh dik ino ei riat theina chu a nit.

⁷Rual lungthlunghei, lungrithlung risak ei ti u, lungrithlungna hi Pathiana rithoka suak a nit a; tukhom lungthlungna nei chu Pathian nai a nit a, Pathian khom ai riat a nit.

⁸Lungthlungna nei ino khan chu Pathian reh mak e, Pathian chu lungthlungna a nit sikin.

⁹Pathian lungthlungna chu hingka hin ei chungah a zuang ilang, ama zâra ringna ei mu theina rangin Pathianin a Naipa neisun rammualah a zuk itirah hin.

¹⁰Amahih a nit lungthlungna chu: Eimanin Pathian lung ei ithlung ni mak a, Aman lung a ne thlung a, ei sualhei thupha chôina inih rangin a Naipa a zuang itir a nit.

¹¹Rual lungthlunghei, Pathianin khangkah takin lung a ne thlungin te, eini khom lung ei rithlung risak chit rang a nit.

¹²Tutên tiklâi khomin Pathian mu ngai mak e; khannisela, lung ei rithlung risakin chu Pathian eimaniah a om mai a, a lungthlungna khom eimaniah inrikipin ai om a nit.

¹³Ama Rithla a ne ipêkah hin, Pathianah ei om a, Ani khom eimaniah a om iti ei riatna chu a nit.

¹⁴Pan a Naipa chu rammual Saninringtu rangin a zuk tir iti ei mu tâk a, mi danghei khom ei îril sa a nit.

¹⁵Tukhom Jisua chu Pathian Naipa a nit itia inpuangtu chu amah-ah Pathian a om mai a, ani khom Pathianah ai om mai a nit.

¹⁶Pathianin lung a ne thlungna chu eimani ngêiin ei riat a, ei iiam tâk a nit. Pathian chu lungthlungna a nit a, kha lungthlungnaa om mai chu Pathianah a om mai a, Pathian khom amah-ah ai om mai a nit.

¹⁷Roirêlna Nikhua a khan ṭi viat loia ei om theina rangin lungthlungna khah eimaniah inrikipin a om tâk; hi rammual khomah hin ama ang takkan ei iom tâk a nit hi.

¹⁸Lungthlungnaa chu ṭina zel omak a, lungthlungna rikip khan ṭina a ûm inrimang ngai. Ṭinaah khan dengtheina a kop a, tukhom ṭina la nei chu lungthlungnaah a la irkip ino a nit.

¹⁹Pathianin lung a ne thlung bak sikin lung ei ithlung a nit.

²⁰Mîn “Pathian lung ki thlung,” itin a suapui nel sela, kha mi khah milak a nit; a suapui ai mu mai ilua lung a thlung thei non teh, Pathian ai mu ngai ino vâng khateh ingkam lung a thlung thei ranga?

²¹Hi thupêk hih ama ziang ata ei imu a nit: “Pathian lung ithlungtu khan a suapui khom lung a thlung rang a nit,” iti hi.