Read Biete 1 JOHANA 5 Bible Online

1 JOHANA 5 - Biete bible

1 JOHANA 5

¹Tukhom Jisua hih Krista a nit iti iam chu Pathian nai a nit a, Pa lung ithlungtu khan nai khom lung ai thlung ngai a nit.

²Pathian naihei lung ei thlung iti ei riatna chu, Pathian lung ei thlung a, a thupêkhei ei izôm hi a nit.

³Pathian lung ei thlungna chu amahih a nit: a thupêkhei ei izôm hi; a thupêkhei chu ei ta rangin ai khir ino a nit.

⁴Pathian nai kangânin chu rammual hi â nê ngai; ei iamna hi rammual inêa ngamna chu a nit.

⁵Jisua hi Pathian Naipa a nit iti iamtu bang nino khan tûm rammual â nê thei ranga?

⁶Jisua Krista hi a nit, tui neh thisena zuang chu a nit. Tui bangah ni loiin tui neh thisenah[8] a nit; Rithla chu thutak a nit sikin Rithla chu riatpuitu a nit.

⁷Riatpuitu chu ithumkah an om:

⁸Rithla neh tui neh thisen; kha thumkahei khah munkah an nit.

⁹Miriam riatpuina lua ei ipom inteh, Pathian riatpuitu nitna vâng teh â roinpui ual a nit a; Pathian riatpuina chu, a Naipa thurchi ân riat tâkna hi a nit.

¹⁰Pathian Naipa iamtu khan chu hi inriatna hih ama lungrilah ai nei a nit; nikhomsela, Pathian iam inotu khan chu Pathian chu milak a închang a nit, Pathianin a Naipa thurchi a înriat khah a iam no sikin.

¹¹Amahih a thu inriat chu a nit: Pathianin kumtluang ringna a ne pêk a, kha ringna khah Naipaah hin ai om a nit.

¹²Naipa neitu khan ringna khah a nei a, Naipa nei ino khan chu ringna khah nei mak e.

¹³Kumtluang ringna nin nei iti nin riat theina rangin nangmani Pathian Naipa iamtuhei ziangah hi thu hih ki irziak a nit.

¹⁴A lungdo angkana îkhom ei ngênin chu a ne ngaitua ngai, amakhah amah ei ngamna chu a nit.

¹⁵Khanchu, tiklâi khomin ei ini murdi a ne ngaitua ngai iti ei riat sikin, a zianga ei thil ngên khah ei mu tâk iti khom ei iriat sa a nit.

¹⁶Tukhomin a suapui, thina rak nino sual isinin mu sela, Pathian ziangah ngên pêk a ta, Pathianin ringna pêng a ti. Amahih thina rak nino sual isinhei ta rang a nit. Thina rak sual a om a, khangkana ta rangin chu ngên pêk iloi rang a nit.

¹⁷Felnona murdi hih sual a nit korong a; nikhomsela, thina rak sual chu ni zit mak e.

¹⁸Tukhom Pathian nai chu isual khâi ngai mak iti ei riat; Pathian Naipa khan â hoih mai a, Diabola khan itôn khom ai tôn thei khâi ino a nit.

¹⁹Rammual pumpui hih Diabola thunuaia om ni khom seh, Pathiana rithoka suak ei nit iti ei riat.

²⁰Pathian Naipa chu a zuang a, Pathian diktak chu ireh thei rangin riat theina a ne zuang pêk iti khom ei riat; khanchu, Pathian diktakah khan ei iom a nit, a Naipa Jisua Kristaah khan. Amahih Pathian diktak a nit a, kumtluang ringna khom a nit.

²¹Ki naihei, mirmilheia rithokin rikiang rei.