Read Biete ROIRÊLTUHEI 1 Bible Online

ROIRÊLTUHEI 1 - Biete bible

ROIRÊLTUHEI 1

¹Khante, Josua thi nungah khan Israela richihei khan, “Kananhei idoi rangin kin lâia tu nam im â fe masa tak rang?” itin PUMAPA an ridon a.

²PUMAPA khan, “Juda namhei fe masa riseh, an kutah ram chu kî pêk tâk a nit,” a ti a.

³Juda namhei khan an suapui Simeona namhei ziangah, “Kin ram dongtumah hin hong sa rei, Kananhei chu munkan doi ei ti; khanungchu, nin ram dongtumah keini khom hong sâng kin ti,” an ti a. Khanchu, Simeona namhei kha Juda namhei rualin munkan an fe sa tâk a.

⁴PUMAPA khan Kanan mihei neh Periz mihei khah an kutah a pêk a; Bezek khuaah mi sîngkah an that a.

⁵Bezek khuaah khan Adonibezeka an mu a, an doi a.

⁶Adonibezeka kha lâizâm a tho a; khannisela, an rizûl a, an man a, a kutpuihei neh a kepuihei an tan pêk a.

⁷Adonibezeka khan, “Rêng sômsarika kutpui neh kepui kî tan pêkhei khan ki docham nuaia burmal an rût ngai a. Ki tho lam angkah takin Pathianin a ne ithung tâk a nit hih,” a ti a. Khante, Jerusalem khuaah an ṭhui a, amakhan a thi tâk a.

⁸Juda richihei khan Jerusalem khua an doi a, an lâk a. A mihei kha khandaiin an that a, khua kha an hâl a.

⁹Kha rizoiah khan Kanan mi, tlângrama omhei, itlângbul phâia omhei, sim tiang ramchârna omhei idoi rangin an rithok a.

¹⁰Hebron khua, Kiriat Arba an iti ngai kha an doi a, Sesaia richihei, Ahimana richihei, Talmaia richihei kha an inê a.

¹¹Khantaka rithokah khan Juda richihei khan Debir khua doi rangin an rithok a, matonah khan chu Debir khua riming kha Kiriat Sefer[1] a nit.

¹²Khante, Kaleba khan, “Tukhom Kiriat Sefer khua kha idoi a, â latu tak chu ki nainu Aksaii innei ki ti,” a ti a.

¹³Kaleba unaipa Kenaza naipa Othniela khan khopui khah a lâk a; khanchu, Kaleba khan a nainu Aksaii khah nupuiin ân nei tâk a.

¹⁴An rinei nî-ah khan Othnielan Aksaii kha a pa Kaleba ram inih rangin a lei ithor a; khanchu, Aksaii kha sakuartung chung ata a ṭum a; Kaleba khan a ziangah, “Im nî nuam?” a lei ti a.

¹⁵Aksaii khan, “Sim tiang ram iṭôl takah ni ne lei in-om tâk a; khasikin, tuinâr iring omna ne peh sa rangin nang kî ngên a nit,” a ti a. Khanchu, Kaleba khan tuinâr iring chuanchung neh chuannuai kha a pêk tâk a.

¹⁶Khante, Mosia tarpu, Ken richia mi kha Juda richihei neh Itûmphâi khopui an iti Jeriko ata kha Arad khua sim tiang Judai ramchârah khan an fe a. Kha munah khan Amalek mihei lâiah khan an hang om tâk a.

¹⁷Juda namhei kha an suapui Simeona namhei neh an rithok a, Zefat khuaa om Kanan mihei kha an rûn a, an inram riai a. Kha khopui khah vâni an sâm a, an isiat a, arming Horma[2] an be a.

¹⁸Juda namhei khan Gaza khua hei, Askelon khua hei, Ekron khua hei neh an kôlvêl khuahei kha an lâk a.

¹⁹PUMAPA khan Juda namhei chu a ompui mai a; khanchu, tlângrama omhei kha an ûmisua riai a; khannisela, phâi rama omhei kha chu thîr tâlihei an nei sikin an iûm isua thei ino a nit.

²⁰Mosia thu lei pêk angkan Hebron khua kha chu Kaleba an pêk a. Ani khan khantaka om Anaka naipa ithumkahei kha ai ûm isua a nit.

²¹Khannisela, Benjamina richihei khan Jerusalem khuaa om Jebus mihei kha ûm isua mak a; Jebus mihei chu Benjamina richihei neh atûn tenah hin Jerusalemah munkan an iom mai tâk a nit.

²²Efraima namhei neh Manasea namhei khom kha Bethel khua rûn rangin an rithok a; matonah khan chu Bethel khua riming khah Luz a nit. PUMAPA chu an ziangah a om a. Bethel khuaah khan enthlâttuhei an tir a.

²⁴Khante, enthlâttuhei khan mi khatkah khosung ata hong isuak hi an mu a, a ziangah, “Ringaiihoi takkan khopui sung inrûkka lûtna nen mu ro ba; khanchu, keini khomin ni chungah iṭha takkan kin itho rang a nit,” an ti a.

²⁵Khanchu, khopui sung lûtna khah ân mu a; Efraima neh Manasea richihei khan khua khah an lût a, khandaiin mihei khah an that vang a, kha mi kha chu a insung mihei neh khan an zua a.

²⁶Nungah chu kha mi khah Hit rama a fe a, khua a siam a, kha khua rimingah khan Luz a be a; atûn tenan kha riming khah a irput mai tâk a nit.

²⁷Khante, Manasea namhei khan Bethsan khuaa omhei, Taanak khuaa omhei, Dor khuaa omhei, Ibleam khuaa omhei, Megido khuaa omhei, neh an kôlkiang khuaa omhei khah ûmisua mak a; kha ramah khan Kanan mihei kha an iom mai tâk a nit.

²⁸Israela richihei chu an hong rât tîr tîr tenan chu Kanan mihei kha sin intak itho rangin an sia a, an iûm isua vang khâi ino a nit.

²⁹Efraima namhei khan Gezer khuaa Kanan mi omhei khah ûmisua mak a; Kanan mihei chu Gezer khuaa khan Efraimhei lâiah an iom mai tâk a nit.

³⁰Zebuluna namhei khan Kitron khuaa omhei neh Nahalal khuaa omhei khah ûmisua mak a; Kanan mihei kha an lâiah an om sa a, sin intak itho rangin an isia tâk a nit.

³¹Asera namhei khan Ako khuaa omhei, Sidon khuaa omhei, Ahlab khuaa omhei, Akzib khuaa omhei, Helba khuaa omhei, Afek khuaa omhei neh Rehob khuaa omhei khah ûmisua mak a.

³²An ûmisua no sikin Asera richihei chu kha rama om Kanan mihei neh khan munkan an iom tâk a nit.

³³Naftalia namhei khan Beth Semes khuaa omhei neh Bethanat khuaa omhei khah ûmisua mak a; kha rama om Kanan mihei neh khan munkan an iom tâk a nit. Khannisela, Beth Semes khuaa omhei neh Bethanat khuaa omhei kha an sin ithoa mang rangin an în-om tâk a nit.

³⁴Khante, Amor mihei khan Dana namhei khah tlângram tiang an rizûl a, an omna phâia an zuang ṭum phal mak a.

³⁵Amor mihei chu Heres tlânghei, Aijalon khua hei, Salbim khua heiah khan an om mai a; khannisela, Efraima namhei neh Manasea namhei kha Amor mihei chungah an inlal a, an sin itho rangin an imang tâk a nit.

³⁶Khante, Sela mâr tianga Amor mihei ramrî chu Akrabim Pialikot ipâl thleng a nit.