Read Biete ROIRÊLTUHEI 10 Bible Online

ROIRÊLTUHEI 10 - Biete bible

ROIRÊLTUHEI 10

¹Abimeleka thi nungah khan Israelhei san isua rangin Isakara nama mi Dodoa nai Pua naipa Tola a hong suak a. Efraim tlângram Samir khuaa om a nit.

²Kum sôminikah kum ithumkah Israelhei roi a rêl a. Khanungchu, a thi a, Samir khuaah khan an phûm tâk a.

³Tola nungah khan Gilead mi Jaira a hong suak a, kum sôminikah kum inikah Israelhei roi a rêl a.

⁴Ani khan naipa sômithumkah, sakuartung sômithumka chunga chuang ngai a nei a. Gilead ramah khua sômithumkah an nei a, khahei khah atûn tenah hin Jaira khuahei an iti ngai a nit.

⁵Jaira khah a thi a, Kamon khuaah khan an phûm a.

⁶Israela richihei kha PUMAPA chungah thilisual an tho nôk tâk a, Baalhei neh Astarothi hei, Suriahei pathian hei, Sidonhei pathian hei, Moabhei pathian hei, Amona richihei pathian hei, Filistiahei pathian hei sin an hong tho tâk a; PUMAPA khah nung an song a, a sin tho khâi mak a.

⁷Khanchu, PUMAPA khah Israelhei chungah khan a ning a thik tâk a, Filistiahei kutah neh Amona richihei kutah a pêk tâk a.

⁸Amonhei khan kum sômlei kum iriatka sung chu Jordan râl sua tianga Amorhei ram Gileada om Israelhei khah an sirde a.

⁹Amona richihei khan Jordan dung ten rikanin Juda richihei, Benjamina richihei, Efraima richihei khah an doi a. Khangkan Israelhei kha lungzîng inkhôk takkan an om tâk a.

¹⁰Khanchu, Israela richihei khan, “Kin Pathian, nung nang lei isongin, Baalhei sin lei ithon ni chungah thil isual kin lei itho tâk a nit,” itin PUMAPA an isam a.

¹¹Khante, PUMAPA khan Israela richihei ziangah, “Zoro thleng tâka Aigupta mihei, Amor mihei, Amona richihei, Filistia mihei,

¹²Sidon mihei, Amalek mihei, Maon mihei murdi khan nangni an sirde a; khante, nin ne sam a, nangni kî san isua ni mak im a?

¹³Khannisela, nangmanin nung nin ne song a, pathian danghei sin khah nin tho tâk a; khasikin, nangni san isua khâi no ning e.

¹⁴Nin irthlang pathianhei khah isam ta rei; anni khan nin lungzîng zoroah khan nangni san isua riseh,” a ti a.

¹⁵Khannisela, Israela richihei khan PUMAPA ziangah, “Thil kin lei ithôn sual tâk a nit. Nangman ṭha ni ti lam angkan kin chungah zuang thon la; inzôk chu vuanah hin lungkhamin nen zôk ngêt roh,” an ti a.

¹⁶Khanchu, an lâia nam dang pathianhei khah an pai riai a, PUMAPA sin khah an tho tâk a; Israelhei lungzînga an omzia khah a mun chu lung ân kham tâk a.

¹⁷Khanungchu, Amona richihei khah ridoi rangin an risiam a, Gilead ramah khan ṭangmun an va khuar a. Israela richihei khom khah an ribûm a, Gilead rama Mizpa khuaah ṭangmun an khuar a.

¹⁸Kha munah khan mipuihei neh Israel nam lupuihei khah an risôn a, “Amona richihei idoi rangin tûm ma ruai rang? Tukhom ma ruai tak chu Gilead rama om murdihei ruaitu chang a ti,” an ti a.