Read Biete ROIRÊLTUHEI 11 Bible Online

ROIRÊLTUHEI 11 - Biete bible

ROIRÊLTUHEI 11

¹Gilead mi Jeptha khah sipai ihâi tak a nit a, a nu khah nochizuar a nit a. A pa chu Gileada a nit.

²Gileada khan a nupui ata naiipa danghei a nei intam a. Khante, an hong puitling tenan chu Jeptha khah an insung ata an ûmisua a, a ziangah, “Nangman chu ei pa richon îte lua thei no tin, nupang dang ata nai kêng nî nit,” an ti a.

³Khanchu, Jeptha khah a urênghei ziang ata lâizâm a tho a, Tob ramah a om tâk a. Kha munah khan Jeptha ziangah khan mi chanlamboi tak takhei an ribûmin, amah an zui ngai a.

⁴Nakan ual viatah chu Amona richihei khan Israelhei khah an doi tâk a.

⁵Amona richihei khan Israelhei an doi tenan chu Gilead ruaituhei khah Tob rama om Jeptha ṭhui rangin an fe tâk a.

⁶Anni khan Jeptha ziangah, “Amona richihei idoi rangin kin ruaitu hong chang roh,” an ti a.

⁷Khannisela, Jeptha khan, “Nin ne nel a, ki pa in ata khah nin ne iûm isua ni mang im a? Nin lunginzîng phingin chu îrang im ki ziangah nin ihong?” a ti a.

⁸Anni khan Jeptha ziangah, “Kha sik takah khan kêng ni tiang kin hong irbat nôk, Amon mihei va doi ranga ne fepui a, Gilead rama omhei murdi maruaitu chang pêk rangin nang kin inuam a nit,” an ti a.

⁹Jeptha khan an ziangah, “Amon richihei idoi ranga in tiang nin ne ṭhui kîr nôk a, PUMAPA khan nêna a ne pêkin chu nin chungah ruaitu ki chang rang a nit,” a ti a.

¹⁰Anni khan, “O a ṭhat, PUMAPA chu ei kâra riatpuitu nîng a ta; ni thu angkah takin tho ngêt ngêt kin ti,” an ti a.

¹¹Khanchu, Jeptha khah Gilead mi ulianhei ziangah khan a fe tâk a, mipuihei khan ruaitu rang neh an lupui tak rangin an lei siam tâk a. Jeptha khan Mizpa khuaah PUMAPA makungah thu tinrêng â sîr tâk a.

¹²Khanungchu, Jeptha khan Amonhei rêng ziangah khan, “Îtho tâk im hingkana ki ram idoi ranga ni hong irthok tâk hi, im ei rinuarna om tâk?” itin palâi a tir a.

¹³Amon rêng khan, “Israelhei Aigupta ram ata an hong suak lâiah khan ki ram Arnon vadung ata Jabok neh Jordan idênin an lâk sika a nit. Atûnah hin ringei irkan kha ramhei khah ne hong peh nôk roh,” itin Jeptha palâihei khah a lei sâm a.

¹⁴Jeptha khan Amonhei rêng ziangah palâi a tir nôk a,

¹⁵a ziangah, “Israelhein Moab ram manih, Amon richihei ram manih la pêk mak e.

¹⁶Hingka hin thil nit dân chu a nit. Aigupta ram ata Israelhei an hong suakah khan Tuipui Sen idênin ramchâr khah an pâl thleng a, Kades khah an tlung a.

¹⁷Khanungchu, Edom rêng ziangah, ‘Lungkhamin ni ram hi nen pâl thleng roh,’ itin palâi an tir a. Khannisela, Edom rêng khan phal mak a. Khangkah ngirin Moab rêng zianga khom mi an tir nôk a; khannisela, ani khomin a ram ipâl thleng khah phal pêk mak a. Khanchu, Israelhei kha Kadesa an om tâk a.

¹⁸Khanungchu, ramchâr khah an fe thleng a, Edom ram neh Moab ram khah an fe kual a, Moab ram sak tiang pangah an fe a, Arnon vadung kiangtiang râlah riabuk an khuar a; khannisela, Moab ram sung kha chu lût viat mak a, Arnon vadung kha Moab ramrî a nit sikin an ikhêl ino a nit.

¹⁹Khanungchu, Israelhein Amorhei rêng Sihona, Hesbona om ziangah palâi an tir a; a ziangah, ‘Ringaiihoi takkan kin rama fe rangin ni ram hi pâl thleng kin ti,’ an ti a.

²⁰Khannisela, Sihona khan Israelhei khah a ram pâl thleng rangah khan iam zoi mak a. Khanchu, a sipaihei murdi a bûm a, Jahaz khuaah ṭangmun an khuar a, Israelhei kha an doi tâk a.

²¹Khannisela, PUMAPA Israelhei Pathianin Sihona neh a mihei murdi khah Israelhei kutah a pêk a, an that tâk a. Khanchu, Israelhei khan kha ram, Amorhei omna ram murdi khah an inei riai tâk a nit.

²²Amorhei ram pumpui sim tiang pang Arnon vadunga rithoka mâr tiang pang Jabok vadung idênin, sua tiang pang ramchâra rithokin tlâk tiang pang Jordan vadung idênin an inei riai tâk a nit.

²³Khasikin, PUMAPA Israelhei Pathianin a mi Israelhei ta rangin Amorhei khah ai ûmisua pêk a nit. Nangman idong pêk nî tum im ai nit?

²⁴Ni pathian Khemosan ni dongtuma nang ai pêk khah nei ṭian roh. Khannisela, PUMAPA, kin Pathianin kin dongtum ranga a ne ipêk murdi chu kin idong mai rang a nit.

²⁵Moab rêng Zipora naipa Balaka nêkan nî rât ual nî sôn mani? Ani khan Israelhei khah a doi ngai im a?

²⁶Israelhei khan Hesbon neh a kôlvêl khuahei, Aroer neh a kôlvêl khuahei neh Arnon vadung panga khopui murdiheiah khan kum rizathumkah sar an om tâk a, kha sungah khan îtho sik im la loiin ni lei iom ṭian?

²⁷Khasikin, ni chungah hin îte thil thônsual mang e. Nangman kêng ne doi ni tum sikin ki chungah hin thil nî thônsual a nit. PUMAPA, Roirêltu khan atûnah hin Israela richihei neh Amona richihei kâra thu chu ngaitua riseh,” a ti a.

²⁸Khannisela, Amonhei rêng khan Jeptha thucha khah lei ringai pêk nuam mak a.

²⁹Khanungchu, PUMAPA rithla khah Jeptha chungah a zuang tlung a. Khanchu, Gilead neh Manasea ram khah arfang a, Gilead rama Mizpa khuaah a kîr nôk a, khantaka rithokah khan Amonhei ramah a fe tâk a.

³⁰Jeptha khan PUMAPA ziangah ṭong arkhâm a, “Amona richihei hih ki kutah ni ne pêk titakin chu,

³¹Amona richihei inê zoia râlringama ki kîr nôk tenah khan îkhom ki insunga rithoka ne hong don masa tak kangân chu PUMAPA ta rang nîng a ta, hâlrivâm thillan rangin mang ngêt ngêt ki ti,” a ti a.

³²Khanchu, Jeptha khah Amona richihei idoi rangin vadung kha arkan tâk a, PUMAPA khan nêna a pêk a.

³³Aroera rithoka Minith idênin a doi a, khua sôminikah, Abel Keramim idênin a lâk kîr a, mi itam takkah a that a. Khangkan Amona richihei khah Israela richihei maah khan an tlôm tâk a.

³⁴Khante, Jeptha khah a omna Mizpa khuaah a in tiang a kîr nôk tenan chu, amakhan a nainu khan khuangte neh ilâmpumin a lei hong don a. A nai neisun a nit a.

³⁵Khante, Jeptha khan a nainu a hei mu kaneh chu, a puanhei â potthlêra, “O ki nainu! ki lungril ni îkhoi a nit tâk! Ithôm lungzîng ne saktu lâia mi nî nit tâk? PUMAPA makungah ṭong ki lei rikhâm tâk a, amakhah ilah kîr nôk thei lak ni khâi mang a,” a ti a.

³⁶Ani khan a pa ziangah, “Epa, PUMAPA zianga ṭong ni lei rikhâm tâkin chu ni bâia thu suak angkah takin ki chungah ni tho rang a nit. PUMAPA khan ne râl Amona richihei chungah khan phuba nang ân lâk tâk a,” a ti a.

³⁷Khannisela, a pa ziangah khan, “Hingka hin thil khatkah ne tho pêk roh. Thla nika sung chu ki khâtin om inran ki ta; khanchu, ki chamhei neh itlângheiah lêng kin ta, ki nungâk rithiangna hih lei sûn rong ung,” a ti a.

³⁸Khante, ani khan ân fe a, thla nika sung ithang rangin ân fe tâk a. A chamhei neh khan itlângheiah khan an fe a, nai nei loia nungâk rithianga ai thi rang khah an sûn a.

³⁹Thla nika nungah khan a pa ziangah a zuang kîr nôk a. Ani khan PUMAPA zianga a ṭongrikhâm khah a len tâk a. Nungâk rithiang liai inih pumin ai thi tâk a nit.

⁴⁰Khanchu, Israelhei lâiah, Israel nungâkhei khan, kum tin Gilead mi Jeptha nainu sûn rangin sûn likah an thang ngai a, tho ngai balamin an inei tâk a nit.