Read Biete ROIRÊLTUHEI 12 Bible Online

ROIRÊLTUHEI 12 - Biete bible

ROIRÊLTUHEI 12

¹Efraimhei khah an ribûm a, Jordan dung an rikan a, Zafonah khan an fe a, Jeptha ziangah khan, “Îsika Amona richihei idoi ranga ni hongah khan, ne hong fial sa loia nî tho mani? Ni inah nang kin ihâl thlût rang a nit hih,” an ti a.

²Khannisela, Jeptha khan an ziangah, “Amona richihei neh kin mihei hih kin irsual titak a nit. Ne ṭangpui rangin nangni ker cha a, nin ne zuang isan nuam ino a nit khate.

³Khanchu, nangmanin ne san nuam mak chei u iti ki riat kaneh, thi ṭi viat loiin ramrî ker kan a, Amona richihei khah ki va doi a, PUMAPA khan annihei khah ki kutah a ne ipêk tâk a nit. Khasikin, îtho rang im ne doi rangin vuanah hin nin zuang irthok hi?” a ti a.

⁴Khanungchu, Jeptha khan Gilead mi murdi khah a bûm a, Efraimhei khah a doi a, an inê tâk a. Efraimhei khan, “Nangmani Gileadhei hi Efraimhei neh Manaseahei ram ata mi thâidôp lâizâm itho ribuk nin nit,” an iti ngai a nit.

⁵Khante, Efraimhei an zôk nona rangin Gileadhei khan Jordan dung Efraimhei varâl kâina rang munhei murdi an lei lâk vang a. Efraim mi lâizâm ithohei khan, “Varâl lei kâi rong ung,” an ti kipah Gileadhei khan an ziangah, “Efraim mi ni nit im?” an lei ti a. “Ni mang e,” an tin chu

⁶an ziangah, “Shibolet” hang ti ta, an lei ti a. Khante, ani khan “Sibolet” a ti ngai a; ifiang lar kan ai ti thiam ino a nit a. Khanchu, an man a, Jordan dung varâl an kâina ngaiah khan an lei ithat ngai a nit. Kha ṭumah khan Efraim mi sîngilikah neh sânginikah an ithat a nit.

⁷Jeptha khan Israelhei chungah kum irukkah roi a rêl a; khanchu, Jeptha khah a thi a, Gilead rama a omna khuaah an phûm tâk a.

⁸Jeptha nungah khan Bethlehem khuaa mi Ibzana khan Israelhei chunga roi a rêl a.

⁹Ani khan naipa sômithumkah neh nainu sômithumkah a nei a. A nainu sômithumkahei khah panam danga mihei ân nei a, khangkan a naipahei nupui rang khom panam dang nungâk sômithumkah ai ṭhui inlût a nit. Ibzana khan Israelhei chungah kum sarikah roi ai rêl a nit.

¹⁰Khante, Ibzana kha a thi a, Bethlehem khuaah khan an phûm a.

¹¹Ibzana nungah khan Zebulun mi Elona khan Israelhei chungah kum sômkah roi a rêl a.

¹²Khanungchu, a thi a, Zebulun rama Aijalon khuaah khan an phûm a.

¹³Elona nungah khan Pirathon mi, Hilela naipa Abdona khan Israelhei chungah roi a rêl a.

¹⁴Ani khan naipa sômilikah neh tûpa sômithumkah sakuartung sômsarika chunga chuang ngai mi a nei a. Abdona khan Israelhei chungah kum iriatkah roi ai rêl a nit.

¹⁵Khanungchu, a thi a, Efraim ram, Amalek mihei tlângrama Pirathon khuaah khan an phûm tâk a.