Read Biete ROIRÊLTUHEI 13 Bible Online

ROIRÊLTUHEI 13 - Biete bible

ROIRÊLTUHEI 13

¹Khante, Israela richihei khan PUMAPA chungah thil isual an tho nôk tâk a; khanchu, PUMAPA khan Filistiahei kutah kum sômilikah ân om a.

²Kha lâiah khan Zora khuaah, Dana richia mi khatkah a om a, arming chu Manoa a nit a; a nupui kha â ching nai rêng rêng nei ino a nit a.

³Khante, PUMAPA vântirtôn khah nupangnu ziangah khan a zuang inlâr a, a ziangah khan, “Ringai roh, â ching, nai rêng rêng la vong ngai ino ni nit a; nikhomsela, nai vong ni ta, naiipa nei ni ti.

⁴Khasikin, ridîn roh, uain neh zu rêng rêng in non la, fâk rithiang ino thil rêng rêng khom fah tlak no roh;

⁵Naipa ni nei zoi nung khomin, a sam khah ni ep tlak rang ni mak e, a zuang suak nî-a rithokin kha nai khah PUMAPA ta ranga Nazarit mi ai nit rang a nit. Ani khan Israelhei hi Filistia mihei kut ata inzôkna sin ai phut rang a nit,” a ti a.

⁶Khanungchu, nupangnu khah a fe a, a pasal ziangah, “Pathian mi khatkah ki ziangah a zuang a, a mêl chu vântirtôn mêl angkah a nit a, inrît tak a nit. Taktianga mîm ai nit ridon ual mang a, ani khan arming ne ril ual mak a.

⁷Khannisela, ki ziangah, ‘Ringai roh, nai vong ni ta, naiipa nei ni ti; khangkan uain neh zu rêng rêng in non la, fâk rithiang ino thil rêng rêng khom fah tlak no roh, naipang khah sûlah a om lâia rithoka a thi dênin Pathian ta ranga Nazarit mi ai nit rang a nit,’ a ti a,” itin â ril a.

⁸Khanungchu, Manoa khan PUMAPA ziangah a ṭongṭai a, “O PUMAPA lungkhamin Pathian mi ni zuang itirah khah kin ziangah zuang nôk sela, naipang zuang isuak rang kha ingkan im kin enkol rang ne zuang inrisei riseh,” a ti a.

⁹Pathianin Manoa ngên lam angkan a tho a, nupangnu khah phûlah â ṭhung lâiin a ziangah Pathian vântirtôn khah a zuang nôk a. A pasal Manoa chu a ziangah om sa mak a.

¹⁰Khasikah khan nupangnu khah rimot takkan â tlân zel a, a pasal kha a va ril a, a ziangah, “Enta, nîkanta ki zianga zuang khah a zuang inlâr nôk tâk,” a ti a.

¹¹Khanchu, Manoa khah a thoi a, a nupui a zui a, kha mi ziang khah a va tlung a, a ziangah, “Nangmah hîm nî nit ki nupui zianga thusîrtu chu?” a ti a. Ani khan, “O, ki nit,” a ti a.

¹²Khanungchu, Manoa khan, “Khateh ni ṭong khah a zuang idik tenan naipang omdân rang kha ingkan im ai nit rang, îsin im a tho rang ai nit?” a ti a.

¹³PUMAPA vântirtôn khan Manoa ziangah, “Ni nupui zianga kî ril murdi khah iṭha takkan uksak riseh.

¹⁴Grep ruia rêng rêng chu îte a fâk rang ni mak a, uain neh zu rêng rêng a in rang ni mak, fâk rithiang ino thil rêng rêng khom a fâk rang ni mak e. Thu kî pêk tâk murdi khah vong inṭha riseh,” a ti a.

¹⁵Manoa khan PUMAPA vântirtôn a nit iti reh mak a, khasikin, a ziangah, “Ringaiihoi takkan la fe hi no roh, kêlte nang la hang inrifûk pêk hi rong ung,” a ti a. Khannisela, PUMAPA vântirtôn khan Manoa ziangah, “La om khom inlang, ni bu kha chu kî nêk inoh rang a nit, khan ân rifûk nî nuam a nitin chu, hâlrivâm thillanin PUMAPA ziangah lan roh,” a ti a.

¹⁷Manoa khan PUMAPA vântirtôn ziangah khan, “Ner ming ne ril roh; khanchu, ni thusîr a zuang tlung idik tenan nang chôiinrisâng thei kin ti,” a ti a.

¹⁸PUMAPA vântirtôn khan a ziangah, “Ithôm ker ming ni ne irdon? Ker ming chu iril chi ni mak e,” a ti a.

¹⁹Khanchu, Manoa khan kêlte khah ibaidi neh a chôi a, lung mâichâm chungah khan thil rikhêlhei itho ngaitu PUMAPA ziangah a lan tâk a.

²⁰Khante, mâichâma meichok khah rivân tiang a fe lâiah khan, Manoa neh a nupui khan an thlîr mai a, PUMAPA vântirtôn kha mâichâma meichokah khan rivân tiang a fe tâk a. Khanungchu, Manoa khan kha mi khah PUMAPA vântirtôn a nit iti a riat tâk a; khanchu, amah neh a nupui khah rinêngah an ibok rak tâk a. PUMAPA vântirtôn khah Manoa neh a nupui ziangah khan zuang inlâr nôk khâi mak a.

²²Manoa khan a nupui ziangah, “Pathian ei mu tâk sikah hin ei ithi ngêt rang a nit,” a ti a.

²³Khannisela, a nupui khan a ziangah, “PUMAPA khan ne that ai nuam ni sela chu ei thillanhei iham no ni a; hihei murdi khom hih nen mu no ni a, hi thilhei khom hih atûna ṭumah hin ne ril viat no nih,” a ti a.

²⁴Khante, nupangnu khan naiipa a nei tâk a, arming Samsona an sak a. Khante, naitesen khah a hong seilian a, PUMAPA khan ṭhat a vur a.

²⁵Khante, Zora neh Estaol kâra Mahane-Dan munah khan PUMAPA rithla khan a zuang pôl inhar tâk a.