Read Biete ROIRÊLTUHEI 14 Bible Online

ROIRÊLTUHEI 14 - Biete bible

ROIRÊLTUHEI 14

¹Khante, sûnkah chu Samsona kha Timna khuaah khan a zu fe a, Timna khuaah khan Filistia mi nungâk khatkah a zu mu a.

²Inah a hong kîr nôkin chu a nu neh a pa ziangah, “Timna khuaah Filistia mi, nungâk khatkah ki mu a, nupuiin nen nei rei,” a ti a.

³Khannisela, a nu neh a pa khan a ziangah, “Ei panam lâia manih, ei chihei lâia manih nungâk an iom tlak khâi ino mani, sertan inohei Filistiahei lâiah teh nupui rang ni zu zong tâk tlia?” an ti a. Nikhomsela, Samsona khan a pa ziangah, “Ani khu ki ta rangin ne zu biak pêk roh, ki îdit a nit,” a ti a.

⁴A nu neh a pa khan amakhah PUMAPA îruaia Samsonan ai tho a nit iti reh mak a, PUMAPA khan Filistiahei chungah zoron ṭum ai zong a nit a. Kha lâiah khan Filistiahei khan Israelhei chungah roi an rêl a.

⁵Khanchu, Samsona khah a nu neh a pa neh Timna khuaah khan an zu fe a. Khante, Timna khuaa mihei Grep rikul an pâl thleng a, amakhan sakeibaknei vânglâi hi a lei irâm a.

⁶Voikah zelin PUMAPA rithla khah Samsona chungah zuang itlungin râtna ritha ân nei a; khanchu, sakeibaknei khah kêlte sânphor angkah dôrkan kut korongin a sân phor tâk a. Khannisela, a thiltho khah a nu neh a pa iril mak a.

⁷Khanungchu, khuaah khan a zu fe a, nungâk khah arsônpui a; Samsona khan â dit ok a.

⁸Sûn itôiteka nungah chu Samsona khan kha nungâk khah inei rangin a fe nôk a. Lampuiah a lôn lâiah khan sakeibaknei ruak kha ien itumin a va pêt a; khante, ringai ta, sakeibaknei takpumah khan ikhuai hi an lei om mur mur a, a tui khom a lei om a.

⁹Amakhah a lâk a, a fe nôk tâk a, a lôn pumin a fâk thiai a. Khanungchu, a nu neh a pa ziang khah a tlungin chu a pêk sa a, anni khom khan an fâk a; khannisela, khuaitui khah sakeibaknei takpuma mi ai lâk a nit iti îte iril mak a.

¹⁰Khante, a pa khah nungâknu insunga khan a zu fe a, amakhan Samsonan ruai â ṭhe a. Amakhah tlangvâlhei tho dân balam pial a nit.

¹¹Filistiahei khan amakhah an mun chu, a zianga omsa rangin tlangvâl sômithumkah an tir a.

¹²Khante, Samsona khan an ziangah, “Atûnah hin ṭongthurkhen nangni lei ridon rong. Ruaiṭhe nî, sûn sarika sunga nin ne rilfia pêk thei a, nin riat sua theiin chu puan zâirimi sil sômithumkah neh rithlengna puan sômithumkah nangni pêng ki ti.

¹³Khannisela, nin ne rilfia pêk thei non chu, puan zâirimi sômithumkah neh rithlengna puan sômithumkah nin ne pêk rang a nit,” a ti a. Khante, anni khan a ziangah, “Ni ṭongthurkhen khah hang isîr roh tho, lei ringai kin ti,” an ti a.

¹⁴Ani khan an ziangah, “Mi fah ngai ata ifarua hong isuak, Irât tak ata thil ithlum tak hong isuak iti hih,” a ti a. Sûn thumka nung tenan khom kha ṭongthurkhen kha la rilfia thei mak a.

¹⁵Khante, a sûn linî-ah khan chu Samsona nupui ziangah, “Ni pasal khah hi ṭongthurkhen ne rilfia pêk rangin ithlêm roh; khanonchu, nangmah neh ni pa insungkuahei hi nangni kin ihâl rang a nit. Nangmani ruai hih ne ropral rangin na nin ne ifial? Ni mak im a?” an ti a.

¹⁶Khanchu, Samsona nupui khah a makungah a ṭap a, “Lung ne thlung loiin ni ne inel a nit hi te. Ki rualhei ṭongthurkhen ner don a, kei laka a rilfiana ne ril mak che a,” a ti a. Samsona khan a ziangah, “Ringai roh, ki nu neh ki pa tak khom ki îril ino a nit, nangmah nang ki îril rang na?” a ti a.

¹⁷An ruaiṭhe sûn sarika sung kha a makungah a ṭap a ṭap a. Khanchu, a sûn sarinin chu a ngên tlut tlut sikin ṭongthurkhen rilfiana khah â ril tâk a. Khanungchu, ani khan a chipui Filistiahei khah kha ṭongthurkhen rilfiana khah a va ril nôk tâk a.

¹⁸Khanchu, a sûn sarinî, ni tlâk maah khan kha khuaa mihei khan Samsona ziangah, “Khuaitui nêka thlum ual im â om a? Sakeibaknei nêka rât ual im â om a?” an ti a Samsona khan an ziangah, “Ki serâtrila a hin rinêng irît no unla chu, Ki ṭongthurkhen hih a rilfiana reh suak tlak no tin u,” a ti a.

¹⁹Voikazelin PUMAPA rithla khah a chungah a zuang tlunga râtna ritha ân nei a. Khante, Askelon khuaah a zu fe a, mi sômithumkah a that a, an silbom a lîp pêk a, rithlengna puanhei khah ṭongthurkhen rilfiatuhei khah a pêk tâk a. Kha rizoiin chu kha thil a tlung sikah khan a ning a thik tak tak a,

²⁰a pa in tiang a fe nôk tâk a. Khante, Samsona nupui kha rinei nî a, a rual ranga ai mangtu khah an lei innei tâk a.