Read Biete ROIRÊLTUHEI 15 Bible Online

ROIRÊLTUHEI 15 - Biete bible

ROIRÊLTUHEI 15

¹Kha rizoi sôt rak inoah khan bu ât zoro lâiah hin, Samsona khan kêlte chôiin a nupui a va pan a. Ani khan a tarpu ziangah, “Chontan sungah son ki nupui ziangah la va lût rong,” a ti a. Khannisela, a tarpu khan a lût lei phal khâi mak a.

²Ani khan Samsona ziangah, “Ani khah nî nel tâk manih ki ti a; khasikin, ni rualpa ki lei înnei tâk a nit. Khannisela, a unainu hi ama nêkan a mêl khom a ṭhat ual a, arthûlin ringaiihoi takkan la nei ta roh,” a ti a.

³Samsona khan an ziangah, “Atûna ṭum chu Filistiahei chunga ki thilthoah hin keiman mopêl no ning e,” a ti a.

⁴Khanchu, a fe a, sihal rizathumkah a man a. Inik nikan an rimei ân riman pêk a, an rimei rimanna chita meiser a khuap pêk chit a.

⁵Khanungchu, meiser khah â chok a, sihalhei khah Filistiahei bu bilah â sua tâk a, khangkan, Filistiahei fathlu neh bu la dinghei khah oliv munhei neh khan a rêngkan a kâng vang tâk a.

⁶Filistiahei khan tu ithôm ai nit iti a an ridon vêlin chu, Timna khuaa mi Samsona itho, a tarpu khan a nupui a lâk pêk a, Samsona malpa khah ân nei pêk sika a nit iti an riat tâk a. Khanchu, Filistiahei khan an parfa kan an hâl that tâk a.

⁷Samsona khan an ziangah, “Hingka hin na thil nin itho! Nin chungah phuba kî lâk ngêt rang a nit,” a ti a.

⁸Khanchu, ingam takkan a doi a, mi itam takkah a that a. Khanungchu, a fe a, Etam muna lungpui ipûkah a om tâk a.

⁹Khante, Filistiahei khah an fe a, Judai ramah ṭangmun an khuar a, Lehi khua an doi a.

¹⁰Judai rama mihei khan, “Îtho sika nin ne hong idoi im ai nit?” an ti a. Anni khan, “Samsona ikhuap a, kin chunga a tho lam angkah taka a chunga tho rangin kin ihong a nit,” an ti a.

¹¹Khanchu, Judai rama mi sângithumkah Etam muna lungpui ipûkah khan an zu fe a, Samsona ziangah, “Filistiahei hi ei chunga roirêltu an nit iti nî riat ino mani? Îtho sika hingkana kin chungah thil ni hong itho tak im ai nit hi?” an ti a. Khante, ani khan an ziangah, “Ki chunga an tho lam takkan an chungah kî tho a nit,” a ti a.

¹²Anni khan a ziangah, “Nangmah hi ikhuap a, Filistiahei kuta ipeh rangin kin izuang a nit,” an ti a. Samsona khan an ziangah, “Nangmanin chu ne that loi rangin ki ziangah vâni risâm rei,” a ti a.

¹³Khante, anni khan a ziangah, “Nang that tlak no ning ung; khannisela, nang khuap khap kin ta, an kutah nang kin ipêk rang a nit,” an ti a. Khanchu, Samsona khah rui irual ithar inikah hin an khuap a, lungpui ipûk ata khah an ṭhui tâk a.

¹⁴Lehi mun an hong tlungin chu Filistiahei khan an lei don a, an ikhêk dur dur a, voikazelin PUMAPA rithla a chungah a zuang tlunga râtna ritha ân nei a; khanchu, â bânhei neh a kuthei khuapna ruihei khah patzâi ikâng angkan a hong chat tâk a, an khuapnahei khah a kut ata a ṭul vang tâk a.

¹⁵Khanungchu, sakuartung rikam ru thar hih a mu a, a rût a, kha sakuartung rikam ru-ah khan mi sângkah â tôk that a.

¹⁶Khanchu, Samsona khan, “Sakuartung rikam ru mangin ki that inpông ngut tâk e. Sakuartung ru ngêiin mi sângkah ke tôk that e,” a ti a.

¹⁷Kha rizoiin chu sakuartung rikam ru khah a pai a. Kha mun khah Ramath Lehi[6] an hong ti tâk a.

¹⁸Khanungchu, Samsona khah a tui arhâl tak tak a, PUMAPA â sam tâk a, “Nangman ne som kut hih imangin roinpui takkan ni ne san isua tâk a, atûnah hin tui rihâlin ithi pai ranga omin, sertan inohei kutah imanin kî om rang na?” a ti a.

¹⁹Khanungchu, Lehi muna khur iom khah PUMAPA khan ân kak a, tuipût a hong suak tâk a. Samsona khan a in a, a hong har nôk tâk a. Khanchu, kha tuinâr rimingah khan En-Hakore[7] an ti tâk a, atûn tenah hin Lehi munah a lai om mai a nit.

²⁰Filistiahei inlal lâiah khan Samsona khan Israelhei chungah kum sôminikah roi ai rêl a nit.