Read Biete ROIRÊLTUHEI 16 Bible Online

ROIRÊLTUHEI 16 - Biete bible

ROIRÊLTUHEI 16

¹Samsona kha Gaza khuaah a fe a, amakhan nochizuar hi a va mu a, a zâlpui tâk a.

²Khante, “Samsona hin a hong e,” itin Gaza mihei khah an iril a. Khanchu, an rihual khap a, khopui kul kotbâi kôlah khan zân khovârin an iruang a, zântluanin an dâirek a, an khâtin, “Khua hong vâr phot riseh; khanchu, that ei ti,” an ti a.

³Khannisela, Samsona khah zânlâi idênin a zâl a; khanungchu, a thoi a, khopui kul kotkhârhei neh a ngul inikah khah â tûk a, â kalnahei neh a rêngka khan a phâi vang a, a dârah arput a, Hebron ridîn itlângsîpah arput tâk a.

⁴Kha nungah khan Sorek phâia mi nupang arming Delili khah Samsona khan â dit a.

⁵Filistia lal ringakahei khah Delili ziangah an fe a, a ziangah, “Samsona khah kin inê a, ikhuapa kin nuam kin lo theina rangin a râtna bi ireh rangin ithlêm roh. Khanchu, kin rêngkah hin tangka sânglei rizakah nang peh chit kin ti,” an ti a.

⁶Khanchu, Delili khan Samsona ziangah, “Ni rât tak tak na bi hih ne ril roh ba. Ingkan im nuam ilo rangin ikhuap thei ni nit rang?” a ti a.

⁷Samsona khan a ziangah, “Phel rui ithar la châr ino sarikan ne khuap sela; khanchu, rât khâi no ning a, mi dang angkah pai ngir kî nit rang a nit,” a ti a.

⁸Khanchu, Filistia rênghei khan phel rui ithar sarikah la châr viat inohei khah Delili an hong pêk a, khaheiah khan Samsona khah a khuap a.

⁹Chontan sungrilah khan ruang chuantuhei a sia a. Khanchu, a ziangah, “Samson, Filistiahein nang an hong idoi rang a nit,” a ti a. Khante, phel ruihei khah meiin patzâi tom ai kâng chat angkah hin a chat tâk a. Khanchu, a râtna bi khah reh thei mak a.

¹⁰Delili khan Samsona ziangah, “Enta, ni ne lêm a, thudik ni ne îril ino a nit. Ingkana nang ikhuap rang im ai nit ne ril ta roh tho?” a ti a.

¹¹Ani khan a ziangah, “Ruirual ithar, la mang viat inon ne khuap sela; khanchu, rât khâi no ning a, mi dang angkah pai ngir kî nit rang a nit,” a ti a.

¹²Khanchu, Delili khan ruirual ithar a lâk a, a khuap tâk a. Khante, a ziangah, “Samson, Filistiahein nang an hong idoi rang a nit,” a ti a. Chontan sung rilah khan ruang chuantuhei khah an om a. Khante, a kut khuapna khah patzâi ichat angkah paiin a hong chat tâk a.

¹³Delili khan Samsona ziangah, “Ni ne la lêm mai a, thudik ni ne la îril ino a nit hih; ingkana nang ikhuap rang im ai nit ne ril ta tho,” a ti a. Khante, ani khan, “Ki sam phiar sarikah hih puanah không san la, â kilnan ikil khap inla a nit zel,” a ti a.

¹⁴Khanungchu, Delili khan â uai in-in thlar a, a sam phiar sarikah kha a lâk a, puanah khan a không sa tâk a. Â kilnan â kil indet khap a, a ziangah, “Samson Filistiahein nang an hong idoi rang a nit,” a ti a. Khanchu, â in thlar khah a hang har a, puan rikol kildetna khah a puan rikol pumin a phâi suak riai a.

¹⁵Khanchu, Delili khan a ziangah, “Ni lungril ne peh viat loiin ingkam lung nang ki thlung ni ne ti tlia? Voithumkah sar ni ne lêmna kha ni înlang tâk a nit a, ni râtna bi hih ni ne la îril tlak inoh mai a nit a,” a ti a.

¹⁶Nîn tin a ngên tlut tlut a, â thlêm, â thlêm ngai sikin, Samsona chu a ning ihalin a lungril a kâng tâk a.

¹⁷A nungkhônah chu a lungril murdi khah Delili â ril riai tâk a, a ziangah, “Ki lu-ah hin chêngchi rêng rêng la mang ni mak a, ki nu sûlah ki om lâia rithoka Pathian ta ranga Nazarit mia serinran ki nit a. Atûnah hin ki sam hih iep ni sela chu ki râtna hih boi riai a ta, mi dang angkah pai ngir kî nit rang tâk a nit,” a ti a.

¹⁸Khante, a lungril murdi khah a îril riai tâk a nit iti Delili khan a riat kaneh Filistia rênghei ziangah, “Voikah hong nôk rei, a lungril murdi khah a ne ril riai tâk,” itin archa a. Khanungchu, Filistia rênghei khah an fe a, tangka khah an chôi a.

¹⁹Delili khan Samsona khah a malpui chungah ân in thlar a; khanungchu, mi khatkah a koi a, a sam phiar sarika kha a ep tan vang tâk a. Khanungchu, a nuam a lo zel tâk a, Samsona lak chu a râtna om khâi mak a.

²⁰Khanchu, ani khan, “Samson, Filistiahein nang an hong idoi rang a nit,” a ti a. Â in khah a hang har a, “Sûn dang angkah ngirah khan suak ki ta, zôk thei rêk ki ti,” a ti a. Nikhomsela, PUMAPA khan a mâk tâk iti rêng rêng reh mak a.

²¹Filistiahei khan an man a, a mit an ikhel suak pêk a.Gaza khuaah an ṭhui a, sumsen kolhei an inbun a; lung inah khan bu an innôi ngai a.

²²Nikhomsela, a sam khah a hong sei nôk tâk a.

²³Khante, Filistia rênghei kha an pathian Dagona ziangah ribôlna roinpui tak ilan rang neh râifân risak rangin an ribûm a, “Ei pathianin ei irâlpa Samsona a ne ipêk tâk a nit,” an ti a.

²⁴Khante, an lungril râifân lâi takah khan, “Samsona khah nuiza siamna rangin hang koi rei,” an ti a. Khanchu, Samsona kha lung in ata khah an va koi suak a, an makungah khan nuiza siamnan an mang tâk a, chopui inika kârah hin an inding a. Khante, mipuihei khan Samsona khah an mun chu an pathian an inpâk a, “Ei pathianin ei irâlpa neh ei ram isehtu, mi tam tak ne thattu chu ei kutah a ne pêk tâk hi te,” an ti a.

²⁶Khante, Samsona khan â kâitu naipang ziangah, “Hi in idoitu chopuihei hih ne hang intôn ta, la hang rinêl rong,” a ti a.

²⁷Kha in khah nupang neh ipa an sip khap a. Filistia rêng ringakahei khom khah an om a; khabanah Samsona enhoia thlîrtuhei khah inchunga khan ipa neh nupang sângithumkah vêl an iom a nit.

²⁸Khanungchu, Samsona khan PUMAPA ziangah a ṭongṭai a, “O PUMAPA Pathian, lungkhamin ne remai inla, lungkham takkan atûna ṭumkah mâng mângah hin nen rât nôk roh. O Pathian, ki mit kiangruaika phuba hi Filistiahei chungah hin la hang la zel rong,” a ti a.

²⁹Khanchu, Samsona khan kha in idoitu tak chopui inikah khah a hang tôn a, a kut changtiang khatkah a nam a, a kut voitiang khatkah a nam a.

³⁰Samsona khan, “Filistiahei hi la hang thipui ki ti,” a ti a. Khanchu, a theidôrkan a nam rak a; in khah a chim tâk a. Khante, Filistia rêng ringakahei neh mipui, kha insunga om murdihei khah, in khan a del riai a. Khangkan Samsona khan a dam lâia ai that nêka khan ai thipuia ai that khah an itam ual a nit.

³¹Khanchu, a urênghei neh a pa insungmihei murdi khah an zuang a, a ruak khah an lâk a, an rizôn a, Zora neh Estaol kâra a pa Manoa an phûmna munah khan an phûm tâk a. Samsona khan Israelhei chungah kum sôminikah roi ai rêl a nit.