Read Biete ROIRÊLTUHEI 17 Bible Online

ROIRÊLTUHEI 17 - Biete bible

ROIRÊLTUHEI 17

¹Khante, Efraim tlângramah mi khatkah a om a, arming kha Mika a nit.

²Ani khan a nu ziangah, “Ni tangka sânglei rizakah nang an irûk pêk a, inru khah vâni ni sâm a, ke kuar riat ngêiah ne sîr a. En ta, kha tangka khah ki zianga om kêng, keima ilâk kêng ai nit,” a ti a. Khante, a nu khan, “Ki naipa Pathianin ṭhat nang vur riseh,” a ti a.

³Tangka sânglei rizakah kha a nu a pêk nôk a; khante, a nu khan, “Vânisâmna khah ki naipa chungah a ṭum nona rangin keimah ngêiin hi tangka hih PUMAPA ziangah kî lan a nit. Tangka khah mirmil thinga siamnan neh kha mirmil intuamna ranga mang rang a nit. Khasikin, atûnah hin tangka hih nang kî pêk nôk a nit,” a ti a.

⁴Khanungchu, tangka khah a nu khan a hong pêk nôkin chu, a nu khan tangka rizanikah khah a lâk a, tangkarua siamtu a pêk a, a ni khan mirmil a lei siam a, ama mirmil khah tangkarua ngirin ân tuam a. Amakhah Mika inah khan a sia a.

⁵Kha Mika khan a khâtin pathian chubai ûnna in a nei a. Ani khan mirmilhei neh Efod mirmilhei a siam a, a naipa khatkah kha a thiampu rangin ân ran tâk a.

⁶Kha lâiah khan Israel ramah rêng la nei mak a, mi tinin mahni ṭhat ti lam lamin an iom ngai a nit.

⁷Kha lâi ngirah khan Judai rama Bethlehem khuaa mi Levia richi tlangvâl khatkah a om a.

⁸Kha mi khah Bethlehem Juda khopui ata khah a suak a, omna inṭum izongin arvâk vêl a. Khangkana arvâk vêlnaah khan Efraim tlângrama om Mika in kha a va tlung a.

⁹Mika khan a ziangah, “Taka rithoka hong im nî nit?” a ti a. Ani khan, “Judai ram Bethlehema Levia richi ki nit. Omna mun inṭum izongin ki irvâk vêl a nit,” a ti a.

¹⁰Mika khan a ziangah, “Ki ziangah om ta roh. Ki roisaktu neh ki thiampua om inla, kum tin, tangkarua lûm sômka banah silbom ṭhenkah neh ifah ranghei khom nang pêng ki ti,” a ti a.

¹¹Khanchu, Levia chi tlangvâl kha Mika zianga om khah ân rifûk tâk a, kha tlangvâl khah a naipa khatka angkan a om tâk a.

¹²Khante, Mika khan Levia chi kha a thiampu rangin a serinran a.

¹³Mika khan, “Atûn chu Levia chi ki thiampu rangin ki nei tâk a, PUMAPA khan vângsak inṭumin ne siam ngêt tâng a ti, iti ki riat,” a ti a.