Read Biete ROIRÊLTUHEI 18 Bible Online

ROIRÊLTUHEI 18 - Biete bible

ROIRÊLTUHEI 18

¹Kha lâiah khan Israel ramah rêng la omak a. Israel richihei lâiah dongtum ram an sem lâiah khan Dana richihei kha ram an lua rang inkung pêk mak a, ram an lua rang an izong mai a nit.

²Khasikin, Dana namhei khan an nam pumpui lâia mi, pasalṭha ringakah, Zora neh Estaol khuaa rithoka ram va enthlât rang neh va eninchial rangin an tir a, an ziangah khan, “Va fe unla, ram khah va eninchial rei,” an ti a. Khanchu, Efraim tlângrama Mika in khah an va tlung a, amakhan an riak tâk a.

³Mika inah an om lâiah khan Levia richi tlangvâl rôl khah an riat a; khanchu, ani khah an va pan a, a ziangah, “Tûm hintaka nang hong iṭhui? Hi munah hin im nî tho ngai? Ingkam hin nî om?” an ti a.

⁴Ani khan an ziangah, “Mika inah ki hong a, thiampu rangin a ne iphun a nit,” a ti a.

⁵Anni khan a ziangah, “Kin fena rangah hin thluan kin tlung rang neh tlung no rang kin riat theina rangin Pathian ner don pêk roh,” an ti a.

⁶Thiampu khan an ziangah, “Rithla ringam takkan fe rei, nin fena rang kha PUMAPA khan nangni ai riatpui mai a nit,” a ti a.

⁷Khanchu, mi pasal ringakahei khah an suak a, Lais khua an va tlung a. Khantaka mihei khah Sidon mihei angkah ngaingirin râlringam takkan an om iti an mu a. Mi nunhoi, rithlaringam tak neh ningibei riamka om, tute ritûrpui ino, lam tinrênga vângsak inṭum an nit a. Kha ram khah îte a hang iseh thei ranga thuneitu ual tute omak a, Sidonhei neh lak an rilat a, mi dang neh lak rimanna îte nei mak a.

⁸Khante, mi pasal ringakahei khah Zora neh Estaol khuaa an chipuihei ziang tiangah khan an kîr tâk a; an chipuihei khan an ziangah, “Im nin thu hong chôi te?” an ti a.

⁹Anni khan, “Tho risiam rei, Lais khua khah la hang doi rei u. A ram chu kin hang mu a, ram iṭha tak a nit, chanlamboiin hin om ṭian khâi no rei; rimot ta rei, kha ram hang ilût a, hang ilua rangah khan rivuak khâi no rei.

¹⁰Nin fe a, nin hang tlung tenan chu râlringam taka om an nit iti nin hang imu rang a nit. A ram chu ram rizat tak a nit a, rinênga thil iomah chu îte risam rang om viat nona mun a nit. Pathianin nangni ai pêk tâk a nit,” an ti a.

¹¹Khanchu, Zora neh Estaol khuaa rithokah khan Dana richihei kha ridoina râlthluka rithlukin mi rizarukkah an suak tâk a.

¹²Khante, an hang fe a, Judai rama Kiriat Jearim khua thlang tiangah khan riabuk an hang khuar a. Khasikin, kha mun khah atûn tenan Mahane Dan an lai ti mai a nit.

¹³Khantaka rithokin an fe a, Efraim tlângrama Mika in khah an hang tlung a.

¹⁴Khanungchu, Lais ram enthlât ranga mi pasal ringaka fehei khan an champuihei ziangah, “Hi inheiah hin Efod mirmilhei, thing mirmil tangkarua tuamhei an om iti nin riat im? Khahei khah im nin lo rang ngaitua rei,” an ti a.

¹⁵Khanchu, Levia richi tlangvâl omna Mika inah khan an fe a, a chungchâng thu an ridon a.

¹⁶Kha rualah khan Dana nam, mi rizarukkah ridoina râlthluka rithlukhei khah kotbâi kôlah an iding a.

¹⁷Khante, mi pasal ringakah, ram enthlâttuhei khah insungah an thleng thal a, mirmilhei kha an lâk a, thiampu khah mi rizarukkah, ridoina râlthluka rithlukhei lâiah kotbâi kôlah khan â ding sa a.

¹⁸Kha mi ringakahein Mika ina mirmilhei an lâk lâiah khan, thiampu khan an ziangah, “I rang im nin iti,” a ti a.

¹⁹Anni khan, “Dâirek roh, ni kutin ni bâi hup inla, kin ziangah hong san la, kin roisaktu neh kin thiampu rangin hong om roh. Ni ta rangin insungkua khatkah bang thiampua om im ai ṭhat ual, Israel lâia chi khatkah neh nam khatka thiampua om im?” an ti a.

²⁰Kha thu khan thiampu lungril khah ân lôm ok a; khanchu, a mirmilhei khah a chôi a, mipuihei lâiah khan a fe sa tâk a.

²¹Khanungchu, an fe suak tâk a, an nainetehei, an ranhei, an neinunhei kha matiang an infe mai a.

²²Mika ina rithoka ilah tak an fe nungah khan Mika khan a bungtualbômhei khah â phung a, Dana richihei va doi rangin an rizûl a, an môk phâk tâk a.

²³Khante, Dana richihei khah a hang isam a. Khante, anni khah an rihel a, Mika ziangah khan, “Îtho rang sik im mi khangkah zâk zâk ni hong iṭhui?” an ti a.

²⁴Mika khan an ziangah khan, “Ki pathian siamhei neh ki thiampu khah nin rotpuia, lâizâm nin tho a, im kî nei a om khâi a? Ingkan im, ‘Im nî chang tlia tak?’ nin la ti ngam tlia?” a ti a.

²⁵Dana richihei khan a ziangah, “Kin ziangah hin ṭong pai pai no roh dua; khanonchu, mihei ningthik a ta, an kut nî tuang rang a nit. Nangmah neh ni insungkuahei nin ithi vang rang a nit,” an ti a.

²⁶Khanungchu, Dana richihei khah an fe mai a. Mika khan idoi ngam rual an nitin reh mak a, a in tiang a kîr nôk tâk a.

²⁷Khante, Mika thilsiamhei neh a thiampu nei khah an fepui tâk a, Lais khua râlringam neh ningibei riamka omhei ziang an hang tlung a, khandaiin an hang that a; khua khah an hâl tâk a.

²⁸Sidona rithokin a lat ok sikin tute a hang saninzôktu rang lak tute omak a, tute neh lak rimanna nei mak a; Bethrehob kôl phâia om a nit. Dana richihei khan khua khah an inding nôk a, amakhan an om tâk a.

²⁹Khante, an chibul Dana, Israela nai riming riputin Lais khua khah Dan khua an be tâk a.

³⁰Dana richihei khan mirmil khah chubai iûn rangin an inding tâk a. Mosia nai Gersoma naipa Jonathana khah thiampun an mang a; kha mi richihei khah bôia tâng ten idênin Dana namhei thiampun an om mai tâk a.

³¹Khangkan Mika isiam mirmil kha a om mai a. Ritongna Puan-In, Pathian an biakna kha chu Silo khuaah khan ai om mai a nit.