Read Biete ROIRÊLTUHEI 19 Bible Online

ROIRÊLTUHEI 19 - Biete bible

ROIRÊLTUHEI 19

¹Khante, Israel ramah rêng an la nei no lâiah khan Levia richi, mi khatkah hi Efraim tlângram mong rêtah a om a. Judai ram Bethlehem khuaa mi thâikêm a nei a.

²Khannisela, a thâikêmnu khan a chungah a ning a thik a; khanchu, Judai rama Bethlehema a pa ziangah a rot a, amakhan thla likah sar a om a.

³Khanungchu, a pasal khan a thâikêmnu ziangah va fe a, va thlêm a, hong iṭhui nôk rangin a ngaitua a. Khanchu, a thoi a, â som neh sakuartung inika ṭhuiin a fe tâk a. Khante, nupangnu khan a pa inah khan a lei ṭhui inlût a, nupangnu pa khan a mun chu a lei lôm tak tak a.

⁴A tarpu khan a zianga om rangin a lei ngên a; khanchu, sûn thumkah a châm tâk a. An fâkin an in a, munkan an riak a.

⁵A sûn linîn chu zîng takah an thoi a, rithok itumin an risiam diam a. Khannisela, nupangnu pa khan â mâkpa ziangah khan, “Ibai ichînteka lua fah hi bak inla, ni lungril kha inhar inla, kha rizoin la fe rei,” a ti a.

⁶Khanchu, an iṭhunga an ruaikah khan an fâkin an in tâk a. Khanungchu, nupangnu pa khan a ziangah, “Lung itluk takkan riak nôk inla, ni lungril chu râiifân takkan om riseh,” a ti a.

⁷Khante, Levi mi khah rithok itumin a thoi a; nikhomsela, a tarpu khan â thlêm ngit a; khanchu, a riak nôk tâk a.

⁸A sûn ringanî zîng takah khan rithok itumin a thoi a; khannisela, nupangnu pa khan, “Imanih ifan ni lungril inhar hi roh tho, kholoi inî dâi tena lua la om hi roh ba,” a ti a. Khanchu, an ruaikah khan munkan bu an nêk nôk tâk a.

⁹Khante, kha mi khah a thâikêmnu neh â som neh rithok ituma an hang thoiin chu a tarpu khan a zianga, “En ta, inî khom â thla rang tâk, vuanzân chu riak nôk hi ta roh; zân khom â zîng zel rang tâk a nit, hin riak nôk inla, ni lungril kha râiifân takkan om riseh. Naktûk zîng takah thoi ni ta, ni in tiang la fe ta roh,” a ti a.

¹⁰Khannisela, kha mi khan kha zân hang iriak nôk khah inbei khâi mak a; khanchu, a thoi a, amah neh a thâikêmnu neh â som neh a sakuartung inrifo sai iṭhuiin a suak tâk a.

¹¹Jebus khua (amakhah Jerusalem khua a nit) ridîn an va tlungin chu kholoi â thlâi ok tâk a; khanchu, isom khan a pu ziangah, “Tho, hi Jebus khopuiah hin lût ei ta, lei riak ta rei,” a ti a.

¹²Khannisela, a pu khan a ziangah, “Israela richi khom ni no, nam dang khuaah khan lût no min e; Gibea khua manih, Rama khua manih pan lem ei ti, a tak khua khôk khôka manih la riak rei,” a ti a.

¹⁴Khanchu, Jebus an khêl a, an fe mai a, Benjamina namhei ramhuala Gibea kho kôl an tlungin chu inî a tlâk tâk a.

¹⁵Gibea khuaa iriak rangin an lût tâk a, kha khopui tolâiah khan â ṭhung a, tute â thlun nuam rêng rêng omak a.

¹⁶Kha munah an om lâiah khan, patar khatkah hi kholoia iṭuan ihong a om a, kha mi khah Efraim tlângrama mi a nit a; khannisela, atûn chu Gibea khuaah khan ai om tâk a nit. Gibea mihei kha chu Benjamina nama mihei an nit.

¹⁷Khante, tarpa khah a hang ngatin chu mikhual tolâia ṭhung khah a hang mu a, a ziangah khan, “Taka fe rang chêm? Taka rithoka hong im nî nit?” a ti a.

¹⁸Khante, Levi mi khan a ziangah, “Judai rama Bethlehema rithoka Efraim tlâng mong ram tianga fe tum ki nit; khantaka om ngai ki nit a. Tute ne thlun nuam an iom ino a nit.

¹⁹Kin sakuartunghei rangah khan bupôl neh ran buhei vâng chu kin nei a. Khante, keimah neh ki thâikêmnu neh ke sompa khom hin ibai neh uain kin nei a, îte risam chu nei ual mang ung e,” a ti a.

²⁰Khante, patar khan, “Rithlaringam takkan om roh; nî nang murdihei chu keiman tum vang ki ti; tolâiah chu riak tlak no roh,” a ti a.

²¹Khanchu, a inah a ṭhui inlût a, an sakuartunghei khah bu a pêk pêk a. A mikhualhei khah an ke ân risûk a, an fâkin an in tâk a.

²²Khangkana râiifân neh ilôm takka an om lâiah khan, kha khuaa mi, mi hur porinchehei khan inkhâr khah an hong suk rak rak a. Anni khan inchongpu tarpa ziangah khan, “Ni ina hong itlungpa khah hong ṭhui isua roh, kin iompui rang a nit,” an ti a.

²³Khannisela, tarpa khah tual a va suak a, an ziangah, “Ni mak e, ki suapuihei, khangkah dôra thil isual porinche khah tho tlak no rei. Hi mi hih ki mikhual a nit, hi angkana thil ṭhano tak hi chu tho no rei.

²⁴Ringaita u, hin ki nainu nungâk rithiang neh a thâikêmnu an om a; anni khah hong ṭhui suak ki ta, anni khah ṭhui unla, ṭha nin ti lam angkah takin an chungah la tho ta rei. Hi mi chungah hin chu khangkana thil ṭhano khah tho no rei,” a ti a.

²⁵Khannisela, kha mihei khan a thu khah ipom nuam mak a. Khanchu, Levi mi khan a thâikêmnu khah a ṭhui a, tolâiah an ziangah a va suak a. Khante, anni khan an lei ompui a, khovâr mâkah chu zân thluanin an lei soisak bit a. Khua a hong vârin chu an isua tâk a.

²⁶Nupangnu khah khua a hong vâr kaneh a hong a, a pasal tlung inpa kotbâi kôlah khan â lîr rak a, khovâr pam idênin a om mai tâk a.

²⁷Khante, a pasal khah zîngah a hang thoi a, inkhâr a hei iong a, ife tumin a va suakin chu a thâikêmnu khah kotbâi kôlah khan sirkungah, inkhâr itu ṭiankan a lei ilîr ṭian a.

²⁸Khante, ani khan a ziangah, “Tho thoi inla, fe tâng ei ti,” a ti a. Khannisela, lei sam viat khâi mak a. Khanchu, a sakuartung chungah a bâng a; arthok a, a in tiangah khan a fe tâk a.

²⁹Khante, in a va tlungin chu chemte a va lâk a, a thâikêmnu takpum khah lek sômlei lek inikan archan nôi a, Israela richi nam sômlei nam inikahei ziangah lek khatkah chitin a thon dar tâk a.

³⁰A lei imu kangânin chu, “Israela richihei Aigupta ram ata an hong suak ten ata hingkana thil rêng rêng hih atûn tenah hin la om ngai mak e. Imanih chu ei tho ai nang a nit? Ngaitua unla, im ei tho rang lei isîr inrituk rei u,” an ti a.