Read Biete ROIRÊLTUHEI 2 Bible Online

ROIRÊLTUHEI 2 - Biete bible

ROIRÊLTUHEI 2

¹Gilgal khuaa rithokin PUMAPA Vântirtôn kha Bokim khuaah a fe a, ani khan Israel mihei ziangah, “Aigupta ram ata kha nangni ki ṭhui suak a, nin chibulhei zianga ṭongrikhâma ki lei înkung tâk ramah khan nangni ki ṭhui inlût a. Keimah ngêiin nin ziangah, ‘Ki thuthlung iseh tlak no ning e.

²Hi rama omhei neh hin thu thlung no unla, an mâichâmhei isim pêk rei,’ ki ti a. Khannisela, ki thupêk angkan tho mak chei a, a letiang nin itho tâk a nit.

³Khasikin, atûnah hin nangni kî ti a nit, anni khah nangni ûmisua pêk khâi no ning a; nin irâlhei ni tâng an ta, an pathianhei chu nin ta ranga châng nîng an ti,” a ti a.

⁴PUMAPA vântirtôn khan Israela richihei murdi ziangah kha thu khah a ril zoiin chu, mipuihei kha rôl iring takkan an ṭap ngûi ngûi a.

⁵Khasikah khan kha mun rimingah khan Bokim an be a. Kha munah khan PUMAPA ziangah ribôlna an lan tâk a.

⁶Josua khan Israel mihei khah â ṭhîn a, Israela richihei kha mi tin mahni dongtum chit ram khah ilua rangin an fe tâk a.

⁷Josua damsung kârkah chu Israela richihei khan PUMAPA sin an tho ngai a. Josua thi nung khomah khan, Israel ruaituhei, PUMAPAN Israelhei ranga thil roinpui tak ai tho murdi la mutuhei damsungkah chu Israela richihei khan PUMAPA sin an itho ngai a nit.

⁸Nuna naipa Josua, PUMAPA som kha kum rizalei sômkah a nitin a thi a.

⁹Khanchu, Josua kha Gash tlâng mâr tiang pang Efraim tlângrama ama dongtum ram sung Timnat Heres khuaah khan an phûm tâk a.

¹⁰Kha rikhûka mi murdihei khom khah an thi zoi tâk a; kha rikhûka mihei inunga, rual itharhei khan chu PUMAPAN Israelhei ta ranga a thil thohei kha an ringil phar tâk a.

¹¹Khanungchu, Israel richihei khan PUMAPA chungah thil isual an tho tâk a, Baalhei sin an tho a.

¹²PUMAPA, an chibulhei Pathian, Aigupta ram ata, ṭhui suaktu kha nung an song a, pathian dang an kôlvêla, mi omhei pathian kha an zui a, chubai an ûn a; Pathian ning an inthik a.

¹³PUMAPA khah nung an song a, Baal neh Astarothi sin an tho tâk a.

¹⁴Khasikah khan PUMAPA ning kha Israelhei chungah khan a thik tâk a. Anmani rok ngaituhei kutah khan a pêk tâk a. An irâl, an kôlvêla omhei kut ata khah an khâtin rirung thei khâi mak a.

¹⁵Ridoi ranga an fe kipah PUMAPA khan an zianga a lei iti angkan an tiang ṭang khâi mak a. Khanchu, lungzîng lungdongin an om tâk a.

¹⁶Khanungchu, PUMAPA khan anmani roktuhei kut ata ân zôktu rang ruaituhei chu a pêk ngai a.

¹⁷Khannisela, Israelhei khan kha an ruaituhei thu khah zôm mak a, PUMAPA chungah iamomin omak a, pathian danghei chubai an ûn a. An chibulhein PUMAPA thupêkhei izôma an izui ngai lampui khah an pêt tâk a.

¹⁸PUMAPA khan ruaituhei a zuang siam pêk ikipah PUMAPA kha ruaitu ziangah khan a om ngai a, ruaitu damsung kârkah chu an irâlhei kut ata khah a san isua mai ngai a. Sirdena neh dengtheina tuanga an irungna sikin PUMAPA khan lung a înkham ngai a nit.

¹⁹Khannisela, ruaitu khah a thi tenan chu, an nung ritol nôk a, pathian danghei sin an tho nôk a, rikhûk masahei nêka sual ualin an iom nôk ngai a nit. An thil tho ngaihei neh an tuklullianhei khom bâng ual ngai mak e.

²⁰Khanungchu, PUMAPA ning kha Israelhei chungah khan a thik tâk a, an ziangah, “Hi namhei hin an chibulhei thu kî pêk, ki thuthlung khah an isiat a, ki thu ipom khâi mak.

²¹Khasikin, kei khomin atûna rithokin chu Josua thi tena ûmisua ban namhei hi ûm isua pêk khâi no ning e.

²²An chibulhei izui angkah khan PUMAPA dân an izui rang im, an izui ino rang im, Israelhei fia nan anmani chu mang ki ti,” a ti a.

²³Khanchu, PUMAPA khan kha namhei khah ûm isua zel khâi loiin kha ramah khan ân om tâk a; Josua kutah khom hi mihei hih in-ûmisua mak a, Josua thi nung khomin ai ûm isua khâi ino a nit.