Read Biete ROIRÊLTUHEI 21 Bible Online

ROIRÊLTUHEI 21 - Biete bible

ROIRÊLTUHEI 21

¹Khante, Israel mihei khan Mizpa khuaah an ribûmah khan PUMAPA ziangah ṭong an rikhâm a, “Tutên kin nainuhei hih Benjaminhei innei tlak no ning ung e,” an ti a.

²Khanchu, Israel mihei khah Bethelah an fe a, kholoi idênin Pathian maah an iṭhung a, iring takkan an ṭap ngûi ngûi a,

³“O PUMAPA Israelhei Pathian, îtho sik im Israelhei lâiah hingkana thil hi a hong iom? Ithôm Israel nam lâi ata Benjamina nam chu rimang rangin ai om tâk?” an ti a.

⁴Atûkah khan mipuihei khah zîng takah an thoi a, amakhan mâichâm an siam a, hâlrivâm thillanhei neh ringeina thillanhei an lan a.

⁵Israela richihei khan, “Israel nam murdi lâiah hin Mizpaa PUMAPA zianga ribûm lâia hang ṭang sa no, nin om im?” an ti a. (Mizpa khua PUMAPA zianga hang fe sa no kangân chu ithat ngêt rang a nit itia vâni an lei irsâm tâk a nit a).

⁶Israela richihei kha an suapui Benjaminhei chungchângah khan an insîr tâk a, “Vuanah hin Israelhei lâia nam khatkah chu ri-ompai a nit tâk a.

⁷Â om isunhei ta rangah khan an nupui rang ingkan im ei tho rang hi? Ei nainuhei hih nupuiin innei tlak loi rangin PUMAPA riming ichingin ṭong lak ei lei rikhâm tâk a,” an ti a.

⁸Khante, anni khan, “Israelhei nam lâia tu panam tak im ai nit Mizpa khuaa PUMAPA maa hang rilang sa no hi?” an ti a. Khante, ribûmna munah khan Gilead rama Jabesa om mihei kha khatka lua omak iti an riat suak tâk a.

⁹Mipuihei an hang ritepah khan, Gilead rama Jabesa om mihei kha khatka lua omak a.

¹⁰Khanchu, mipui ribûmhei khan mi rât mi hâi ngat sîng lei sânginikah an tir a, “Fe unla, Gilead rama Jabesa om mihei kha nupang neh naipang tehei murdi khandaiin va that riai rei.

¹¹Nin tho dân rang chu hingka hin a nit, ipa neh nupang murdi that riai unla, nungâk rithiang nino murdi khom that inrimang riai rei,” itin thu an pêk a.

¹²Khante, Gilead rama Jabesa om mihei lâiah khan nungâk rizalikah, ipa lai pôl tlak ngai ino an mu a; khanchu, Kanan rama Silo khuaa an riabukah khan an hong ṭhui tâk a.

¹³Khanungchu, mipui ribûmhei murdi khan mi an tir a, Rimon lungpui ipûka om Benjaminhei an va sôn a, an ziangah ringeina thu an vân puang a.

¹⁴Khanchu, Benjaminhei khah an hong kîr tâk a; Gilead rama Jabesa om nungâk rithiang an izuahei khah an pêk a.

¹⁵Khante, Israel nam lâiah PUMAPA khan phelrua rikhoina a lei siam tâk sikin mipuihei khah Benjaminhei chungchângah khan an insîr tâk a.

¹⁶Khanchu, mipui ribûm ruaituhei khan, “A la damhei nupui rang hi ingkan im ei ngaituapui rang tâk hi? Benjaminhei lâia an nupanghei lak inrimang zoi an nit tâk a.

¹⁷Nupui la dum inohei rang ingkan im nupui ei zong pêk rang tâk? Israelhei hin ei nam sômleiinika lâi ata namkah an irmang rang hi ei phal rang ni mak.

¹⁸Ei nainuhei lak hi nupuiin innei thei mang me a, tukhom a nainu Benjaminhei nupuia innei kangân chu vânisalin om riseh, itin ṭong ei lei rikhâm tâk a,” an ti a.

¹⁹Khanungchu, an ngaitua a, anni khan, “Ringai ta u, Bethel mâr tiang, Bethela rithoka Sekem fena lamilian sak tiang panga Lebanon sim tianga om Silo khuaah kum tin PUMAPA ta rang ruaiṭhe ai om ngai a nit khate, ai om thiai rang tâk a nit,” an ti a.

²⁰Khante, anni khan Benjamina richihei ziangah khan, “Va fe unla, grep rikulah lei iruang zâi unla;

²¹Lei thlîr ṭian rei. Khanchu, Silo khuaa nungâkhei ruaiṭhe zoroa lâm ranga an hong suak tenan chu, grep rikul ata khah hong suak unla, Silo nungâkhei khah mahni nupui rang man chit unla, Benjaminhei ramah ṭhui rei.

²²Khante, an pahei manih, an ṭahei manih, â sêl ranga kin ziangah an hongin chu, ‘Lungkhamin nei thal ta riseh, irâl angkana ridoia an nupui ranga an iman khom ni mak a; nangmani lakin nin ipêk ni ual mak a, nin ṭongrikhâm khom iseh ual mak chei,’ la lei ti rong ung,” itin thu an pêk a.

²³Khante, Benjamina richihei khan khangkah khan an tho a, Siloa nungâk ilâmhei lâia mi mahni nupui rang chit an man a, an ram tiang an fepui tâk a. Khanungchu, an khopuihei an siam inṭhat nôk a, amakhan an om tâk a.

²⁴Kha lâi ngirah khan Israela richihei khom kha mahni chi neh mahni nam namin an richin a, khantak ata khah anmani ram chitah khan an kîr nôk tâk a.

²⁵Kha lâiah khan Israelhei lâiah rêng la om ngai mak a, mi tinin mahni ṭha ti lam takin an iom ngai a nit.