Read Biete ROIRÊLTUHEI 3 Bible Online

ROIRÊLTUHEI 3 - Biete bible

ROIRÊLTUHEI 3

¹Kanan ram doi lâia la ṭang phâk ino Israelhei fiana rangin hi nam ṭhenkahei hih PUMAPA khan ai zua a nit.

²Israela richi, rualitharhei, risual buala la fe tlak ngai inohein râl doi dân an risei theina rangin nam danghei khah a în-om a nit.

³Khahei kha: Filistia khopui ringakahei, Kanan mi murdihei, Sidonhei neh Lebanon tlâng, Baal Hermona rithoka Hamath Pialikot idêna om Hiv mihei an nit.

⁴PUMAPA khan Mosia manga an chibulhei thu a lei ipêkhei khah an zôm rang neh rang no, riatna rangin khahei khah Israelhei fiana rang an nit.

⁵Khangkan Israela richihei kha Kanan mihei, Hit mihei, Amor mihei, Periz mihei, Hiv mihei, Jebus mihei lâiah khan an om tâk a.

⁶Nupui pasal an rinei ripol a, an pathianhei chubai an ûn a.

⁷Khante, Israela richihei khan PUMAPA an Pathian an ringil tâk a, a chungah an isual a, Baal neh Aseri mirmilhei khah chubai an ûn tâk a.

⁸Khanchu, PUMAPA ningthik khah Israelhei chungah khan a tlung tâk a, Mesopotamia ram rêng Kusan Risathaima kutah a pêk tâk a; khanchu, Israela richihei chungah kum iriatkah roi a rêl tâk a.

⁹Khanungchu, Israela richihei khan PUMAPA an isam a, PUMAPA khan Israela richihei inzôktu rangin mi ân ding pêk a. Kha mi khah Kaleba unaipa Kenaza naipa Othniela a nit.

¹⁰PUMAPA rithla khah a chungah a zuang tlunga; khanchu, Israelhei roi a rêl pêk tâk a. Othniela khah râl idoi rangin arthok a, PUMAPA khan Mesopotamia rama rêng Kusan Risathaima khah a kutah a pêk a, â nê tâk a.

¹¹Khante, ram kha kum sômilika sung râlringamin an om a; khanungchu, Othniela kha a thi tâk a.

¹²Israela richihei khan PUMAPA chungah an isual nôk tâk a, khasikah khan PUMAPA khan Moab rêng Eglona kha Israelhei nêka râtin a siam a.

¹³Eglona khan Amon mihei neh Amalek mihei â phung a, Israelhei khah an va doi a, Itûm khopui Jeriko khah an lâk a.

¹⁴Khanchu, Israela richihei kha Moab rêng Eglona thu nuaiah khan kum sômlei kum iriatkah an om a.

¹⁵Khanungchu, Israela richihei khan PUMAPA an isam a, PUMAPA khan Gera naipa Ehuda, Benjamina richi, voi kut imang ngai khah a pêk a. Israela richihei khan Moab rêng Eglona ipeh rang thilpêkhei inchôiin Ehuda khah an tir a.

¹⁶Ehuda khan khandai bêneirim, mûkka sei a siam a, amakhah â changtiang puan nuaiah a vong zat a.

¹⁷Moab rêng Eglona kha mi takpa a nit a, Ehuda khan thilpêk khah a hang pêk a.

¹⁸Khante, thilpêk a hang pêk zoiin chu thilpêk ichôituhei khah a lei infe nôk tâk a.

¹⁹Khannisela, Ehuda chu Gilgal kho kôla lungsukna muna rithokin a kîr nôk a, Eglona ziangah a fe nôk a, a ziangah, “Rêngpa, thurithup nang iril rang ki nei,” a ti a. Khanchu, rêngpa khan â somhei ziangah, “Kin ruaikan bang ne mah rei,” itin thu a pêk a. Khanchu, a kôla ding murdihei khah an suak vang tâk a.

²⁰Khanungchu, rêngpa khah a chuanchung chontan idâi riamah khan a khât bangin â ṭhung a, Ehuda khah a ziangah a fe a, a ziangah, “Pathiana rithoka thucha ni zianga sîr rang ki nei” a ti a. Rêng khah ṭhungmun ata kha â ding lik a.

²¹Khante, Ehuda khan a kut voitiang, â changtianga a khandai vong khah a lâk a, rêng phûngah khan a dôt tâk a;

²²Â hâ khom khah a lût rikhum vang a; khante, a khandai khah a thâiin a tuam khap a, Ehuda khan rêng phûnga khandai khah thuat khâi mak a, â nungtiang ai len thal a nit.

²³Khanungchu, Ehuda khah putiang a suak a, chontan kotkhârhei khah a khâr a, â kal khap a, a mâk tâk a.

²⁴Khante, Ehuda a suak zoi nungah khan rêng isomhei khah an hong a; chontan kotkhârhei kha a lei rikal korongin an mu a; khannisela, rêng kha a chontan idâiriama sôl ringamin, a khâta ai om nîng a ti, an sôn a.

²⁵Changidong rakkan an ngâk a; khannisela, chontan kotkhârhei khah iong tlak khâi mak a; khanungchu chabi an lâk a, an hang iong a; khante, an rêngpa khah iṭuangah khan â thi saiin a lei riphek rak a.

²⁶Ehuda lak khah khangkana an ngâk mai sungah khan lâizâm a lei tho a, Lung sukna mun khah a lei khêl a, Seira-ah a rot a.

²⁷Khante, Efraim tlângram khah a tlungin chu Israel râlkâp mihei koina rangin bekul a tum a, râlkâp mihei khah a ziangah an hong a; an ma â ruai a, tlângram ata khah an zuk fe tâk a.

²⁸Khante, ani khan an ziangah, “Ne zui rei, PUMAPA khan nin irâl Moab mihei hih nangni ai pêk tâk a nit,” a ti a. Khanchu, ani khah an zui a, Moab mihein Jordan dung an rikanna ngai khah an lâk pêk a, tute Jordan rikan rang phal khâi mak a.

²⁹Kha nî-ah khan Moab sipai irât tak takhei mi sîngkah vêl an that a, tute inzôk mak a.

³⁰Kha nî-ah khan Moabhei chu Israelhein an inê tâk a. Khante, ram khah kum sômiriatka sung râlringamin a om a.

³¹Khante, â nunga ruaitu nôk chu Anatha naipa Samgara a nit a. Ani khom khan Filistia mi rizarukkah serât sunna rolin a sun that a, Israelhei khah ai saninzôk a nit.