Read Biete ROIRÊLTUHEI 4 Bible Online

ROIRÊLTUHEI 4 - Biete bible

ROIRÊLTUHEI 4

¹Ehuda thi nungah khan Israela richihein PUMAPA chungah an hong isual nôk tâk a.

²Khanchu, PUMAPA khan Israelhei khah Hazor khua Kanan ram rêng Jabina kutah ân tlôm tâk a. Jabina sipai ulian tak khah Sisera a nit a, Jentailhei ram Haroseth khuaa om a nit.

³Jabina khan thîr tâli rizakuakkah a nei a, Israela richihei chungah khan kum sôminika sung nunisia neh inrông takkan a înlal a nit. Khanungchu, Israela richihei khan PUMAPA khah an isam tâk a.

⁴Khante, kha lâiah khan Zânthla Debori, Lapidotha nupui a om a, ani khan Israelhei roi a rêl a.

⁵Efraim tlângrama Rama neh Bethel kho kâra itûmkung nuaiah khan Debori khah â ṭhung ngai a, Israela richihei kha an roi a lei rêl pêk rangin a ziangah an ife ngai a nit.

⁶Sûnkah chu Naftali rama Kades khuaa rithokin Abinoama naipa Baraka khah archa a, a ziangah, “PUMAPA, Israelhei Pathianin, ‘Naftalia namhei neh Zebuluna namhei mi sîngkah ṭhui inla Tabor tlângah fe roh.

⁷Khanchu, Kison vadunga Jabina sipai ruaitu Sisera khah a tâlihei neh a lômahei neh hong tir ki ta; ani khah nang pêng ki ti,’ itin thu nang ai pêk a nit,” a ti a.

⁸Khanungchu, Baraka khan a ziangah, “Ne fepui inla; khanchu, fêng ki ti; ni ne fepui non chu fe no ning e,” a ti a.

⁹Debori khan, “Nang fepui ngêt ki ti; khannisela, ni fenaah khan riming ṭhat nî lo no rang a nit kha; PUMAPA khan Sisera kha nupang kutah ai pêk rang a nit,” a ti a. Khanchu, Debori khah a thoi a, Baraka ziangah Kedes khuaah khan a fe tâk a.

¹⁰Baraka khan Naftalia namhei neh Zebuluna namhei khah Kedesah a koibûm a; mi sîngkan an zui a. Debori khom a ziangah a fe sa a.

¹¹Ken mi, Hebera khah Mosia tarpu Hababa richia mi a nit a, Kenhei lâi ata khah a lei om inran a, Kades kôla Zananim rama saso thing bil kôlah khan ommun hong ikhuarin puan-in a sin a.

¹²Abinoama naipa Baraka khah Tabor tlângah a fe iti Sisera khan a lei riatin chu,

¹³Sisera khan a thîr tâli rizakuakkah neh sipaihei murdi a koi a, Jentailhei ram Haroseth khua ata Kison vadungah a tir tâk a.

¹⁴Khanungchu, Debori khan Baraka ziangah, “Tho, fe ta roh, vuanah hin PUMAPA khan Sisera chu ni kutah nang ai pêk tâk a nit. Ni ma ruaitu chu PUMAPA a nit,” a ti a. Khanchu, Baraka kha Tabor tlâng ata khah a ṭum a, a mi sîngkahein an zui a.

¹⁵Baraka khan a sipaihei neh an hang doiin chu PUMAPA khan Sisera neh a tâli murdi neh a sipaihei murdi khah ân buai chit a. Khante, Sisera kha a tâli ata a ṭum a, a ken lâizâm a tho tâk a.

¹⁶Baraka khan tâlihei neh sipaihei kha Jentail ram Haroseth idênin an rizûl tâk a; khanchu, Sisera sipaihei murdi khah khandaiin an that riai a; khatka lua inring mak a.

¹⁷Sisera kha chu Ken mi Hebera nupui Jaeli puan inah â tlân lût a; Hazor rêng Jabina neh Ken mi Hebera insungkuahei kha a lei ringei ngai pial an nit a.

¹⁸Jaeli kha Sisera don rangin a lei hong suak a, a ziangah, “Epu, hong lût roh; ki puan inah hong lût roh. Ṭi no roh,” a ti a. Khanchu, a puan insungah khan a lût tâk a, ani khan puan arkhû a.

¹⁹Khante, Sisera khan a ziangah, “Ringaiihoi takkan tui iin rang ne peh roh, ki tui arhâl tak tak,” a ti a. Khante, Jaeli khan dûtbûr a hong iong a, ân in a, puan arkhû nôk a.

²⁰Khanchu, Sisera khan Jaeli ziangah, “Puan in kotbâiah khan om inla; khanchu, ‘Hin mi an om im?’ itia nang an hong ridonin chu, ‘Tute omak e,’ lei ti ngai roh,” a ti a.

²¹Sisera khah a sôl tak tak sikin inrimu nik takkan a in thlar a. Khanungchu, Jaeli khan puan-in thlungna thing rizum neh chungchôi kha a chôi a, zâi zâi kan a pan a, thing rizum khah a bengberêpah a hêm inrilen a, rinêngah a zu lût khap a, a thi zel tâk a.

²²Khante, Baraka khan Sisera a hong zongin chu, va don itumin Jaeli khah a suak a, a ziangah, “Hin hong roh. Ni mi zongah khah nang inmûng ki ti,” a ti a. Khanchu, a ziangah a va fe a, khantakah khan Sisera khah rinêngah a lei thi zan tâk a, thingrizum a bengberêpa riphun mutkan a va mu a.

²³Kha nî-ah khan Pathianin Israela richihei maah Kanan ram rêng Jabina khah ân tlôm tâk a.

²⁴Khanchu, Israela richihei khan Kanan rêng Jabina khah an inôr tîr tîr a, nungah chu an that inrimang rip thei tâk a.