Read Biete ROIRÊLTUHEI 5 Bible Online

ROIRÊLTUHEI 5 - Biete bible

ROIRÊLTUHEI 5

¹Kha nî ngirah khan Debori neh Abinoama naipa Baraka khan hi lâ hih an sak a.

²PUMAPA chu inpâk rei, Ruaituhei khan Israel mipuihei ma an iruai a, Mipuihei chu ritha fân takkan an hong ripêk a.

³O, nangni rênghei, lei ringai unla; O, nangni ruaituhei; nin ikuar lei sung rei, Keimah ngêiin PUMAPA chôiinrisângna lâ sak ki ta, PUMAPA, Israelhei Pathian inpâkin lâ sak ki ti.

⁴O PUMAPA Seir tlâng ata ni zuang suak a, Edom ram ata ni hong suak lâiah khan rinêng khah â nîng dur dur a, Rivâna rithokin rua a zuang sûr a.

⁵Sinai tlâng PUMAPA maah khan itlânghei khah an lei inîng a, PUMAPA Israelhei Pathian maah khan.

⁶Anatha naipa Samgara neh, Jaeli damlâiheiah khan, rivai mihei an chât khap a; Khualzin rilonghei khan lamkêm an ro ngai a.

⁷Israel khuahei khah lua loiin a ram zoi a, Debori, ni hong suak ma, Israel ram nu ni hong suak mâkah kha chu iramin ai om a nit.

⁸Pathian itharhei ibia an rithlang a, Khanchu, kul kotbâiheiah khan ridoina a hong om tâk a. Israel rama mi sîngilika lâiah, Ipho neh ifei ichôi rêng rêng an om im a?

⁹Ki lungril chu Israelhei ruaitu chungah a om a, Mipui ritha fân takka ripehei chungah khan ai om a nit. PUMAPA chu inpâk rei.

¹⁰Nangni sakuartung ngoi chunga chuang ngaihei, Nangni ṭhungmun rivuaia taka ṭhunghei, Nangni lampuia lôn vêlhei, Kha thuhei kha inpuang rei.

¹¹Ringaita u, tuikuang kôlvêla mipui ichiar suaihei khan, PUMAPA nêna an îsîr a nit; Israel mihei nêna ngêi kha. Khanungchu, PUMAPA mihei khah an khopui ata an rithok suak tâk a.

¹²Iruai roh, Debori iruai roh, Iruai inla, lâ sak inla, iruai roh! Thoi inla, Abinoama naipa Barak nî manhei khah suakin ṭhui roh,

¹³Khanungchu, mi iamom la om isunhei khah an ruaituhei ziangah an zuang a; Ridoi ranga risiam ṭian kan a ziangah an zuang tâk a.

¹⁴Anni kha Efraima rithokin phâiah an zuang ṭum a; Benjamina namhei khan an zuang zui a. Makira rithokin sipai ruaitu liantakhei an zuang suak a; Zebuluna rithokin sipai ruaituhei khah an zuang suak a.

¹⁵Isakara milianhei khah Debori neh munkan an zuang a, A nit, Isakara a zuang a, Baraka khom; Phâi tiangah khan ani khah an zui a. Khannisela, Reubena namhei lâiah khan chu inṭhenna a om a, Fe sa thu ithlûk thei mak a.

¹⁶Îtho sik im bera rikulah ni om ṭian mai? Berapun, bera lômhei a koina belem ringai rang im? A nit, Reuben namhei lâiah khan inṭhenna a om a, Fe sa thu an îthlûk thei ino a nit.

¹⁷Gada namhei chu Jordan râl sak tiang ramah khan an om ṭian mai a, Dana namhei chu rikuangheiah an iom ṭian mai a nit. Asera namhei chu tuikhanglian rikamah an iṭhung ṭian a, Tuirikamheiah khan an iom ṭian a nit.

¹⁸Khannisela, Zebulunhei neh Naftali hei chu; Râltuk bualah ithi khom ṭi loiin an idoi mai ngai a nit.

¹⁹Rênghei khan an hong doi a, Kanan rênghei khan Megido tuikôl Taanak khuaah khan an hong doi a, Khannisela râllâk sum îte chôi mak e.

²⁰Rivâna rithokin ârsihei khomin an zuk doi a, An muna rithokin Sisera khah an zuk doi a.

²¹Kison tui ilianin anni chu a fen riai a, Kison vadung irât takka luang khan. O ker thla, irât takkan fe mai roh.

²²Khanungchu, sakorhei kha fuar richômin an hong a, An ke tinhei chu nuaiah an itât a.

²³PUMAPA vântirtônin, “Meroz khah vâni sâm rei, Khantaka omhei khah inah takkan vâni sâm rei. Anni chu PUMAPA san rangin, Ridoinaah khan PUMAPA san rangin an ihong ino a nit,” a ti a.

²⁴Nupang murdi lâiah khan Jaeli, Ken mi, Hebera nupui hi hamṭha tak a nit, Nupang, puan ina omhei murdi lâiah khan a ham iṭha tak a nit.

²⁵Sisera khan tui a nî a, Khannisela, ani khan dût a pêk a, Kuri ṭha takin dût thâi kang a hong pêk a.

²⁶A kut voitiang thing rizum a chôi a, A kut changtiang kutthiam chungchôi a chôi a; Thing rizum khah chungchôiin Sisera lu-ah khan a hêm a, A lu a hêm inlen thal a, A nit, a bengberêpah khan a hêm a, ai hêm inlen thal a nit.

²⁷A ke bulah arno rak a, â lîr tâk a, Arno rakna munah khan a thi zel tâk a.

²⁸Sisera nu khan tukver ata a hang thlîr a, Thîngripal ri-ong ata khah a thlîr a, “Îtho sik im a tâli a hong tlung intak bâka? Îtho sik im a sakorhei an hong irvuak ok tâk hi,” a ti a.

²⁹A nupang ivârhein an lei sâm a, A nit, a khat nâk nâkin lungngam arsak a,

³⁰“Râllâk thilhei khah an mu a, an irsem a nit hite, Mi tinin nungâk khatkah inikah chit, Sisera dongtum rang râllâk puan zia ṭha dang dang an izong ni ngêt a ti. Nêtu ribât rang puan a kiang ruaika ṭial rizia ṭha tak takhei an izong a nit,” a ti a.

³¹“O PUMAPA, ne râlhei murdi chu rimang riai riseh, Khannisela, nangma lungithlungtuhei chu irât taka fen, Inî hong isuak angkah hi ni riseh,” itin. Khante, ram kha kum sômilika sung râlringamin a om tâk a.