Read Biete ROIRÊLTUHEI 6 Bible Online

ROIRÊLTUHEI 6 - Biete bible

ROIRÊLTUHEI 6

¹Khante, Israela richihei khan PUMAPA chungah thil an thôn sual tâk a; khanchu, PUMAPA khan Midianhei kutah kum sarikah ân om a.

²Midianhei kha Israelhei nêkan an rât ual a; khanchu, Midianhei sikah khan Israel richihei chu tlângram ipûkhei neh mun fianrialheiah ribîk mun an siam a.

³Israelhein chimu an tho rêng rêngin Midianhei, Amalek hei, ramchâra om mihei khah an hong a, an hong doi ngai a.

⁴Riabuk an khuar a, Gaza dênin chimuhei khah an îsiat pêk ngai a nit. Israel ramah ifah rang rêng rêng zua loiin berahei, sialhei, sakuartunghei khom an ilâk pêk vang ngai a nit.

⁵An ranhei neh an puan inhei neh an hong rithok a, ikhâi intâm angkah dôrkan an hong rithok ngai a. Anmani neh an saringseihei khah tep zoi zât khom ni mak a. Ram iseh rang piala hong rithok ngai an nit.

⁶Khangkan Israelhei khah Midianhei sikah khan riangvâiin an hong om tâk a; khanungchu, Israela richihei khan PUMAPA chu an isam tâk a.

⁷Khante, Midianhei sika Israelhein PUMAPA an hang isam tenan chu,

⁸PUMAPA khan Israela richihei ziangah khan zânthla a zuang tir a; ani khan an ziangah, “PUMAPA, Israelhei Pathianin hingka hin ai ti a nit, Aigupta ram bôi ata nangni ki kêl suak a;

⁹Aiguptahei kut ata neh nangni sirdetu murdi kut ata nangni ki san isua a, nin matonah anni khah ki ûm isua a, an ram khah nangni ki pêk a.

¹⁰Keimah ngêiin, ‘Keimah hi PUMAPA nin Pathian ki nit hih, hi nin omna ram ineitu Amorhei pathianhei hi chubai nin ûn viat rang ni mak e, ki ti a. Khannisela ki thu khah ipom mak chei u,’ ai ti a nit,” a ti a.

¹¹Khanungchu, PUMAPA vântirtôn khah Ofra khuaah a zuang a, Abiezera panama mi Joasa saso kung bulah khan â ṭhung a. Joasa naipa Gideona khan Midianhei mu thei nona rangin grep sômna khurah bu a lei chîl a.

¹²PUMAPA vântirtôn khah a ziangah a zuang inlâr a, a ziangah, “Nangmah, mi rât neh mihâi, PUMAPA chu ni ziangah ai om a nit,” a ti a.

¹³Gideona khan a ziangah, “Epu, PUMAPA khah kin ziangah a omin teh, îtho sik im hi thilhei hih hingkana kin chungah a hong itlung tâk hi? Kin chibulhei khan, ‘PUMAPA khan Aigupta ram ata khah a ne hong iṭhui suak a nit,’ an ti a, a sintho rikhêl tak tak an ne îril ngaihei khah taktiang im ai om zoi tâk? Atûn chu PUMAPA khan a ne nôl phar tâk a, Midianhei kutah a ne ipêk tâk a nit,” a ti a.

¹⁴Khanungchu, PUMAPA khan thu a pêk a, a ziangah, “Hi ni râtna murdi hih mang inla, Israelhei hih Midianhei kut ata inzôk roh; Keimah ngêiin nang kî tir a nit,” a ti a.

¹⁵Gideona khan, “Khannisela, PUMAPA, ingkan im Israelhei hih ken zôk thei rang? En ta, Manasea nam lâiah keimani panam hih â rât ino tak kin nit a, keimah lak hih kin insungkuaa â chîntak ki nit a,” a ti a.

¹⁶PUMAPA khan a ziangah, “Ni ziangah ki om mai rang sikin inzôk thei ni ti. Midianhei chu mi khatkah bang angkah dôrkan inê vang ni ti,” a ti a.

¹⁷Gideona khan a ziangah, “Ni mit itlung ki nitin chu nangmah PUMAPA ngêiin ni ne îsôn a nit iti risinsiana im manih nen mu roh.

¹⁸Ni makunga lan rang thilpêk ki va lâk a, ni zianga ki hong nôk mâkah chu ringaiihoi takkan hintaka ta hih lei ro tlak no roh,” a ti a. Khante, ani khan, “Ni hong nôk mâkah chu lei om mai ki ti,” a ti a.

¹⁹Khanchu, Gideona khah a inah a fe a, kêlte a suang a, chol pol ino bairiam siamna rangin baidi her sômkah a mang a. A sa khah khamlua a sia a, a tui khah bêlah a sung a, khahei khah saso thing nuaia PUMAPA vântirtôn ziangah khan a hong chôi a, a ziangah a lan a.

²⁰Pathian vântirtôn khan a ziangah, “Sa neh bairiam khah lan la, hi lung chungah hin sian la, a tui khah buak roh,” a ti a. Khangkah khan Gideona khan a tho a.

²¹Khanungchu, PUMAPA vântirtôn khan â rol chôi môrah khan sa neh bairiam khah a hang intôn a; khante, lunga rithokah khan mei a hong suaka sa neh bairiam khah a kâng riai tâk a. Khanungchu, vântirtôn khah armang dip tâk a.

²²Khanchu, Gideona khan PUMAPA vântirtôn ai mu a nit iti a riat tâk a, rilônthing pumin Gideona khan, “O Tinrêngthothei PUMAPA Pathian, ni vântirtôn khah mâi ritongin kî mu tâk a nit,” a ti a.

²³Khannisela, PUMAPA khan a ziangah, “Rithlaringam takkan om inla, ṭi no roh, thi no tin e,” a ti a.

²⁴Khanchu, Gideona khan kha munah khan PUMAPA ta rang mâichâm a siam a, “Jehova Salom,”[3] a be a. Atûn tenan Abiezera panamhei khua Ofraah a lai om mai a nit.

²⁵Kha zân ngirah khan PUMAPA khan Gideona ziangah, “Ni pa serâtchal neh serâtchal dang kum sarika mi lan la, ni pa isiam Baala mâichâm hih isim inla, a kôla Aseri rilim hih iphûr roh.

²⁶Hi mâichâm isia ribuk ipông chungah hin PUMAPA ni Pathian ta rang mâichâm iṭha tak siam inla, serâtchal â nikna khah lan inla, Aseri rilim thing ni îphûr khah imangin hâlrivâm thillan lan roh,” a ti a.

²⁷Khanchu, Gideona khan â somhei lâia mi sômkah a ṭhui a, PUMAPAN a zianga a ti lam angkah khan a tho tâk a. A pa insung mihei neh khopui mihei khah a ṭi sikin sûnah tho ngam mak a, zânah ai tho a nit.

²⁸Khante, khopuia mihei khah zîng takah an thoiin chu, Baala mâichâm khah isimin a lei om a, a kôla Aseri rilim khah iphûrin a lei om a, mâichâm isiam thar chunga serâtchal â nikna ilana om khah an mu tâk a.

²⁹Anni khan amahih tu itho mani? itin an ridon risak a. Khante, an hang sui inrivêlin chu Joasa naipa Gideona itho a nit iti an riat suak tâk a.

³⁰Khanungchu, khopui mihei khan Joasa ziangah, “Ni naipa khah hin hong ṭhui suak roh, kin ithat ngêt rang a nit. Ani khan Baala mâichâm â sim a, Aseri rilim khah a îphûr a nit,” an ti a.

³¹Khante, Joasa khan amah hong rikhalpuitu murdihei ziangah khan “Baala khah nin ithlop rang ai nit na? Ani khah nin irung rang ai nit na? Tukhom ama thlop kangân chu vuan zîng ngêiah hin ithat rang a nit. Baala chu pathian a nit inteh a khâtin rirung riseh ba! Ama mâichâm kêng isima om ai nit,” a ti a.

³²Kha nî-a rithokah khan Joasa khan, “Baala khan a khâtin rirung riseh, ama mâichâm kêng isima om ai nit,” a ti sikin Gideona khah Jerubaala[4] itia koi a nit tâk a.

³³Khanungchu, Midianhei murdi, Amalekhei neh ramchâra om mihei khah an ribûm a; Jordan dung an rikan a, Jezreel phâiah om mun an khuar a.

³⁴PUMAPA rithla khah Gideona chungah a zuang tlung a; khante, bekul a hang tum a, ama zui rangin Abiezera panama mihei khah a koibûm tâk a.

³⁵Khante, Manasea nam mun inika omhei ziangah mi a tir a, anni khom khan an hong pun tâk a; khante, Asera namhei, Zebuluna namhei, Naftalia namhei ziang khomah mi a tir a, anni khan an hong thlop sa tâk a.

³⁶Khanungchu, Gideona khan Pathian ziangah, “Ni ti lam angkana keima kut imanga Israelhei hi ni înzôk rang a nitin chu,

³⁷rîzôlah bera mul siang ki ta, bera mul bangah khan rido a lei om a, a kôlvêl rinêng murdihei khah a lei hûl vangin chu, nî ti angkan keima kut imangin Israelhei hi ni înzôk rang a nit iti riang ki ti,” a ti a.

³⁸Khangkah takah khan a hong nit a. Atûk, zîng takah Gideona khah a thoi a, bera mul kha a hang sômin chu bera mul ata khah rido berbu sip piarkah a sôm suak tâk a.

³⁹Khanungchu, Gideona khan Pathian ziangah, “Ki chungah ning inthik non la, voika mâng mâng la hang ril nôk ki ti. Ringaiihoi takkan voika mâng mâng bera mulin fiana lei siam nôk rong. Atûna ṭumin chu bera mul bang khah lei hûl sela, rinêng chung murdiah rido lei om nôk ta riseh,” a ti a.

⁴⁰Khante, khangkah khan Pathianin kha zânah khan a zuang tho a; Bera mul bang khah a lei hûl a, rinêng chung dang murdi kha chu rido a lei dui zit a.