Read Biete ROIRÊLTUHEI 7 Bible Online

ROIRÊLTUHEI 7 - Biete bible

ROIRÊLTUHEI 7

¹Sûnkah chu Jerubaala (Gideona a nit) khan a zianga mipui iom murdihei khah zîng taka a thoipui a, Harod tuipût kôlah om mun an khuar a. Midianhei om mun khuar khah an omna mâr tiang pang More tlâng thuai phâiah a nit.

²PUMAPA khan Gideona ziangah, “Ni kutah Midianhei ipe a nit rangin chu ni zianga omhei khah an tam rai tâk. Khanonchu, Israelhein, ‘Keimani kut ritha râta kin înê a nit,’ itin ner song khum duai an ti.

³Khasikin, mipuihei riatah, ‘Tukhom iṭi neh rilônthing nin omin chu inah kîr nôk rei, keini chu hin Gilead tlângah om kin ti,’ iti tlângisam riseh,” a ti a. Khanchu, mipuihei khah sînginikah neh sânginika an kîr nôk a; sîngkah an la om a.

⁴Khante, PUMAPA khan Gideona ziangah, “Mihei khah an la tam rai tâk; vadungah ṭhui inla, khantaka khan keiman nang ithlei pêk ki ti. Hi mi hi chu ni ziangah fe riseh kî ti kah ni ziangah fêng an ta, hi mi hi chu ni ziangah fe sa no riseh kî ti kah chu an fe rang ni mak,” a ti a.

⁵Khanchu, Gideona khan mipuihei khah vadungah khan a ṭhui a; PUMAPA khan Gideona ziangah, “Ui angkana a leia tui iliak murdihei khah a ranin buk inla; khangkah ngirah khan rikhûk idila tui idôk murdihei khom khah a ranin buk roh,” a ti a.

⁶Khante, mi an kutphaa tui iluaka â inhei khah mi rizathumkah an nit a; mi danghei murdi kha chu rikhûk idila tui idôk korong an nit.

⁷Khanchu PUMAPA khan Gideona ziangah, “Mi rizathumkah an kuta tui iluaka inhei imangin nangni inzôk ki ta, Midianhei hih ni kutah nang kî pêk rang a nit. Mipui danghei murdi khah mahni mun chita kîr nôk rangin iril roh,” a ti a.

⁸Khanchu, Gideona khan Israel mipui murdihei kha chu an puan in tiang a tir ikhîr nôk tâk a, mi rizathumkahei banah cholam ipêltuhei neh bekul ichôituhei bang khah an om a. Midianhei om mun khuar khah an thlang zel phâiah khan a nit.

⁹Kha zânah khan PUMAPA khan Gideona ziangah, “Thoi inla, riabuk khu zu rûn roh; ni kutah nangni kî pêk a nit.

¹⁰Khannisela, zu rûn ni ṭin chu, ne som Pura neh hin riabukah khun zu fe phot rei.

¹¹Khanchu, an thusîr riang ni ta, kha nungah khan anmani zu rûn rangin ngamna nei ni ti,” a ti a. Khanchu, Gideona neh â som Pura khan an irâlhei riabuk râlvêngtuhei omna tongtîr takah khan an zu fe tâk a.

¹²Khante, Midianhei, Amalekhei, neh ramchâra om mihei murdi khah phâizôlah khan ikhâi lôm angkah dôran hatpui an lei om mur mur a; an saringseihei khah tep zoi loi, an tam tlia khah tuikhanglian rikama ṭiai zâkah an nit a.

¹³Khante, Gideona a zuk tlungin chu mi khatkah hin a malpa khah armang a lei isîr pêk a, a ziangah, “Rimang ki nei a, barli bai hih ei riabukah a zuang iluma puan-in a dêng a, puan-in khah a chim a, rinêngah arphe dak tâk a,” a ti a.

¹⁴A malpa khan a sâm a, “Amakha chu Israel mi Joasa naipa Gideona chemsei a nit ngêt, Pathianin Midianhei neh ei sipaihei murdi khah a kutah ai pêk tâk a nit khah,” a ti a.

¹⁵Gideona khan kha rimang neh a omzia an irilfia khah a riatin chu â bok a, PUMAPA chubai a ûn tâk a. Khanungchu, Israelhei riabuk tiangah khan a kîr nôk a, an ziangah, “Tho thoi ta rei; PUMAPA khan Midian sipaihei chu nin kutah nangni ai pêk tâk a nit,” a ti a.

¹⁶Khanchu, mi rizathumkahei khah pôl ithumkan a siam a, an rêngkah khan bekul neh bêl khorong a sunga meiser iom a pêk chit a.

¹⁷Ani khan an ziangah, “Ne en ṭian unla, riabuk tongtîr tak ki tlung kaneh, ki tho lam angkah takin nin tho rang a nit.

¹⁸Keimah neh ki zianga om murdihein bekul kin hang tum kaneh riabuk vêla om murdihei khomin bekul tum sa riai nin ta, ‘PUMAPA neh Gideona ta rang’ ti chit rei,” a ti a.

¹⁹Khangkan Gideona neh a zianga om mi rizakahei khah zânlâi tak tlungma tet, râlvêng an rithleng zoi phing kaneh riabuk tongtîr khah an tlung a. Khanchu, bekul khah a hang tum a, an bêl chôi khah an itôk ikhoi a.

²⁰Pôl dang inikahei khom khan khangkah khan an tho korong a. An rêngkan an ivoitiang meiser an chôi a, an ichangtiang bekul an chôi a, “Chemsei chu, PUMAPA neh Gideona ta rang,” itin an ikhêk dur dur a.

²¹Riabuk ivêlah khan mi tin mahni dingmun chitah khan an iding chit a; khanchu, an irâlhei murdi khah lâizâm an tho a, an ikhêk rak rak a.

²²Gideona mihei khan bekul rizathumkah an tum lâiah khan PUMAPA khan irâl sipaihei murdi khah an khâtin anmani neh anmani khandaiin ân ridoi a. Khanchu, irâl sipaihei khah Zerera tiang Beth Sita dênin neh Tabat kôla Abel Mehola khua dênin lâizâm an tho tâk a.

²³Khanungchu, Naftalia namhei, Asera namhei neh Manasea nam, sak tiang neh thlang tianga omhei lâia mihei khah a koi a, annihei khan Midianhei khah an rizûl tâk a.

²⁴Khante, Gideona khan Efraim tlângram murdiah khan, “Midianhei hi zuang doi rei, Beth-Bara vadung idênin Jordan dungah khan lei iruang unla, Midianhei khah varâl kâi no riseh,” itin tlângisam mi a tir a. Khanchu, Efraim mihei khah an rikoi bûm a, Midianhein Beth-Bara dêna vadunghei neh Jordan dung an rikan rang khah an lei iruang tâk a.

²⁵Khante, Midian ilal inikah Oreba neh Ziba khah an man a; Oreba khah Oreb lungpuiah khan an that a, Ziba kha Zib Grep sôm khurah khan an that a. Midianhei khah an rizûl mai a; khanchu, Oreba neh Ziba lu khah Jordan dung râla om Gideona ziangah an hong chôi a.