Read Biete ROIRÊLTUHEI 8 Bible Online

ROIRÊLTUHEI 8 - Biete bible

ROIRÊLTUHEI 8

¹Khanungchu, Efraim mihei khan Gideona ziangah, “Ithôm Midianhei idoi ranga ni feah khan nin ne koi no? Îtho sika hingkana ni ne itho mani?” itin iṭha takkan a ziangah an riphun tak tak a.

²Khannisela, ani khan an ziangah, “Nangmani sintho neh inrichakin chu, keima sintho chu îte ni mak e. Nangni Efraimhein nin itho viatte khom keimani nam pumpuihei itho nêkan chu a roinpui ual ok a.

³Pathianin Midianhei ilal Oreba neh Ziba khah nin kutah a hong ipêk a nit a. Khahei neh khan inrichakin keimah hin im nangmani nêka kî tho lian ual bîk ai om?” a ti a. Kha thu khah a ti zoin chu a chunga an ningthik khah a dâi ual tâk a.

⁴Khante, Gideona neh a zianga mi rizathumka omhei khan Jordan dung khah an zu tlung a, an rikan a. An sôl tak tak tâk a; khannisela, an irâlhei khah an rizûl mai a.

⁵Sokot khua an tlungin chu, kha khua mihei ziangah khan Gideonan, “Midianhei rêng Zeba neh Zalmona kin rizûl a, ki mihei hih an isôl tak tak tâk a nit, ringaiihoi takkan ifah rang peh ta u,” a ti a.

⁶Khannisela, Sokot kho ruaituhei khan, “Ithôm ni sipaihei ifâk kin ipêk rang? Zeba neh Zalmona khom la man loi chei a,” an ti a.

⁷Khanchu, Gideona khan, “O a ṭhat, PUMAPA khan Zeba neh Zalmona khah ki kutah a ne pêk tenan ramchâr riling neh sâisorlingheiah khan nin taksa khah sun ithlêr ngêt ki ti,” a ti a.

⁸Khantak ata khah Penuelah a fe a, an ziangah khangkah ngirah khan a ti nôk a; khannisela, Penuel khuaa mihei khan Sokot khuaa mihei sâm lam angkah ngirah khan an lei sâm a.

⁹Khanchu, Penuel khuaa mihei ziangah khan, “Nêna changa ki hong kîr nôk tenan, hi nin kulpui hih hong isim ngêt ki ti,” a ti a.

¹⁰Zeba neh Zalmona khah Karkorah an sipaihei neh an om a. Ramchâra om mihei sipai khah mi nuaikah neh sînginikah chu an thi tâk a, mi sînglei sângringakah bang an om tâk a.

¹¹Gideona chu Noba neh Jogbeba sak tianga ramchâr tongtîr, rivai mihei lampuiah khan a fe a, sipaihei khah an rining loi kârin a hang doi a.

¹²Khante, Midianhei rêng inika ruai Zeba neh Zalmona khah lâizâm an tho tâk a; khannisela, an rizûl thal a, an man a; an sipaihei murdi khah an buai nuai nuai tâk a.

¹³Khante, an ridoi zoiin chu Gideona khah Heres fena lampuiah a hong kîr nôk a.

¹⁴Sokot khuaa tlangvâl khatkah hi a man a, thuhei ardon a. Tlangvâl khan Sokot khuaa milian neh ruaituhei riming sômsarika sarikah arziak pêk a.

¹⁵Khanungchu, Gideona khah Sokot khuaa mihei ziangah a hang fe a, an ziangah, “Nin ne san nuam no lâi khah nin la riat mai na? ‘Zeba neh Zalmona lua khom la man loi chei a. Ithôm ni mi sôlhei ifâk kin ipêk rang’ itia nin ne iphengsan khah. Zeba neh Zalmona hih en ta u,” a ti a.

¹⁶Khanungchu, kho ulianhei khah a man a, ramchâr riling neh sâisorlingheiah khan Sokot mihei makungah khan a sun thlêr tâk a.

¹⁷Khangkah ngirin Penuel khua kulpui khom khah â sim a, khua mihei khah a that a.

¹⁸Khanungchu, Gideona khan Zeba neh Zalmona khah ardon a, “Tabor tlânga nin mi thathei khah ingkana mîm an init,” a ti a. Anni khan, “Nangmah nang an ang a; rêng nai angna an nei chit,” an ti a.

¹⁹Gideona khan, “Ki urênghei, ki nu naipahei ngêt an nit. PUMAPA ai ring mai angkah hin, anni khah lei zua ta duai unla chu nangni kî that ino rang a nit,” a ti a.

²⁰Khanchu, a nai lutîr Jethera ziangah khan, “Tho nangman that roh,” a ti a. Khannisela, tlangvâlte khan khandai thuat mak a, thuar bapte bang a la nit sikin a îndôp a nit.

²¹Khanungchu, Zeba neh Zalmona khan Gideona ziangah, “Nangmah hong inla ne hong that roh. Patling sin chu patlingin kêng an itho ngai,” an ti a. Khanchu, Gideona khah a thoi a, Zeba neh Zalmona khah a that tâk a, an saringsei ringa ritheihei khom khah a lâk a.

²²Kha rizoiah khan Israel mihei khan Gideona ziangah, “Midianhei kut ata hi ni ne înzôk tâk a nit a, kin chunga roirêltu ni ta roh, ni naihei, ni tûhei ten khom ni mai riseh,” an ti a.

²³Gideona khan an ziangah, “Keiman chu nin chungah hin roirêl no ning a, ki naipa lakin nin chunga roirêl no ni a; PUMAPA khah nin chunga roirêltu nîng a ti,” a ti a.

²⁴Khannisela, Gideona ngir khan, “Thil khatkah chu nangni kî nî nuam a nit. Mi tinin nin râllâk kuarbet khah ne peh chit rei ba,” a ti a. (Midianhei chu ramchâra mihei angkan rângkachak kuarbet an inei chit a nit.)

²⁵Khante, Mipuihei khan, “Nang peh ngêt kin ti,” an ti a. Khanchu, puan an dâp a, mi tinin an râllâk kuarbet khah an hong sia chit a.

²⁶Kha rângkachak kuarbet, Gideonah an ipêk khah a rêngkan her sôminikah vêl a nit. Hiheiah hin Midian rênghei rivona ṭhivalhei, ritheihei, puan senduk tep sa no a nit a, an saringseihei rithei khom tep sa no a nit.

²⁷Gideonan kha rângkachakah khan Efod rilim a siam a, a omna Ofra khuaah a sia a. Israel mihei murdi khan Pathian nung an song a, kha munah khan kha mirmil chubai iûn rangin an fe tâk a. Khangkan Gideona neh a insungkuahei ta rang khomin châng a hong nit tâk a.

²⁸Khanchu, Midianhei khah Israel richihei maah khan intlômin an hong om tâk a, îte risong thei khâi mak a. Khante, Gideona dam sungkah chu ram kha kum sômilika sung râlringamin a om a.

²⁹Khante, Gideona khah a in tiang a om tâk a.

³⁰Ani khan a thisena inzir ngêi, naipa sômsarikah a nei a; nupui itam takka nei a nit a.

³¹Khante, Sekem khuaa a thâikêmnu khan naipa a nei pêk sa a, arming Abimeleka a sak a.

³²Joasa naipa Gideona chu tarkûla damin a thi a; khanchu, Abiezera panamhei khua Ofraah a pa Joasa thlânah an phûm tâk a.

³³Gideona khah a thi zoi kaneh chu Israel richihei kha nung an ritol nôk a, Pathian chungah iamom loiin Baalhei chubai an ûn a, Baal-thuthlung khah an pathianin an siam tâk a.

³⁴Israela richihei khan an vêla irâlhei murdi kut ata saninzôktu PUMAPA an Pathian khah reh khâi mak a.

³⁵Israelhei ta ranga thei dôrka thil iṭha tho ngaitu Gideona insungkuahei chungah khom lôm ual khâi mak e.