Read Biete ROIRÊLTUHEI 9 Bible Online

ROIRÊLTUHEI 9 - Biete bible

ROIRÊLTUHEI 9

¹Gideona naipa, Abimeleka khah Sekem khuaa a nu ṭâpahei ziangah a fe a, a nu pahei insungkua murdihei khah â sôn a, an ziangah,

²“Sekem khuaa mi murdihei riatah thusîr unla, ‘Gideona nai murdi mi sômsarikahein nin chungah roi an irêl im a ṭhat ual nin ti, mi khatkan nin chunga roi ai rêl im?’ ti rei; kei khom nin thisen rizompui ki nit iti hih remai sa rei,” a ti a.

³Khante, a nu ṭahei khan Sekem khua mi murdihei riatah khan kha thu murdi khah an isîr a. Khanchu, Abimeleka zui nuamna lungril an hong riput tâk a; “Ani chu ei suapui a nit,” an ti tâk a.

⁴Khanchu, Baal thuthlung in ata tangka sômsarikah an pêk a. Kha sumah khan mi chanlamboi, mi tôksol tak takhei khah ama zui rangin a ṭhui a.

⁵Ofra khuaa a pa inah a va fe a, Gideona naipahei, urêng sômsarikahei khah lung khatka chungah a that riai a. Khannisela, Gideona naipa, â thlum tak Jothama kha chu a lei ribîk a, â damin ai zôk a nit.

⁶Khanungchu, Sekem khuaa mi murdi neh Beth-Miloa mi murdi khah an ribûm a, Sekem khuaa saso thingkung kôla lungphun bulah khan Abimeleka khah rêngin an siam tâk a.

⁷Kha thu khah Jothaman a lei riatin chu Gerizim tlângsîpah a hang iding a, rôl iring takkan â khêk a, an ziangah, “Nangni Sekem khuaa mihei, ki thusîr hih lei ringai rei; khanchu, Pathian khomin nin thu a lei irngai sa rang a nit.

⁸Voikah chu thinghei hih an rêng rang, riak inrithu rangin an ribûm a. Oliv thing ziangah hin, ‘Nangmah kin rêng chang roh,’ an ti a.

⁹Khannisela, oliv thing khan an ziangah, ‘Nin rêng ki changin chu kiangtiang kiangtiang rihêm ki ta, Pathian neh miriam chôiinrisângna ranga an ne mangna tak ki riak hih ki îsua thei khâi ino rang kêng ai nit?’ a ti a.

¹⁰Khanungchu, thinghei khan theipui kung ziangah hin, ‘Tho ta, nangmah kin rêngin om roh,’ an va ti a.

¹¹Khannisela, theipui kung khan an ziangah, ‘Nin rêng ki changin chu kiangtiang kiangtiang rihêm ki ta, ki thlumna neh ke râ ṭha tak hih ki îsua thei khâi ino rang kêng ai nit,’ a ti a.

¹²Khanchu, thinghei khan grep rui ziangah, ‘Tho ta roh, nangmah kin rêng chang ta roh,’ an ti a.

¹³Grep rui khan an ziangah, ‘Nin rêng ki changin chu kiangtiang kiangtiang rihêm ki ta, Pathian neh miriam inlôm ngaitu ki uain hih ki îsua thei khâi ino rang kêng ai nit,’ a ti a.

¹⁴Khanung khom thinghei khan riling ziangah, ‘Tho, nangmah kin rêng chang ta roh,’ an ti a.

¹⁵Khante, riling khan thinghei ziangah, ‘Nin rêng ranga nin ne inuam tak tak a nitin chu ki dâilîmah khan hong ribih ta u; nin hong nuam non chu ker lingbuk ata mei hong isuakin, Lebanon tlânga sidar thinghei khah kâng vang riseh,’ a ti a.

¹⁶“Atûnah hin Abimeleka, nin rêng ranga nin lei isiam tâk hih tititak neh ifel taka tho chu nin nit im? Gideona neh a insungkuahei khah marit itho a, a sin lei tho lam angkah takkan a chungah sin nin itho chu nin nit im?

¹⁷Ki pa khan irâl nangni a doi pêk a, Midianhei kut ata nangni san isua rangin a ringna ten khom ai phal a nit iti khah remai rei.

¹⁸Khannisela, vuanah hin ki pa insungkuahei chungah khan nin rihel tâk a. A naipa sômsarikahei khah lung khatka chungah nin that riai tâk a; a bôinu naipa Abimeleka hih nin suapuipa a nit sik ringotin Sekem khuaa mihei rêngin nin isiam tâk a nit.

¹⁹Khasikin, vuanah hin Gideona neh a insungkuahei chungah idik neh ifel takka tho nin nit ngânin chu Abimeleka chungah hin lôm rei, ani khom nin chungah lôm riseh.

²⁰Khannisela, khangkan a nit non chu Abimeleka rithokah hin mei hong chok suak sela, Sekem khuaa mihei neh Beth-Milo mihei chu kâng riai riseh; khante, Sekem khuaa mihei neh Beth-Milo miheia rithokin mei hong chok suak sela, Abimeleka chu kâng vang riseh,” a ti a.

²¹Khanungchu, ân zirpuipa Abimeleka khah a ṭi sikin lâizâm a tho a, Beerah a fe a, amakhan a om mai tâk a.

²²Abimeleka khah Israelhei chungah kum ithumkah ân lal a.

²³Khanungchu, Pathianin Abimeleka neh Sekem khuaa mihei khah ân rinuar a; khanchu, Sekem khuaa mihei khah Abimeleka chungah an rihel tâk a.

²⁴Amakhah Gideona naipa sômsarikahei chunga nun iseh takka a that sikin an thisen phuba khah Abimeleka neh a urênghei ithat ranga lei ithortu Sekem khuaa mihei chungah phuba lâkna a zuang tlung theina ranga a nit.

²⁵Khante, Sekem khuaa mihei khan tlângsîpheiah khan Abimeleka ruang ichuantu rang an sia a, kha mihei khan kha lampuia fe hong murdihei khah an lei suam ngai a. Kha thu khah Abimeleka an iril a.

²⁶Khanungchu, Ebeda naipa Gaala khah a urênghei neh Sekem khuaah an zuang a; Sekem khuaa mihei khan an lei iam zoi a.

²⁷Khante, an grep rikulheiah an va fe a, grep irâhei an rimal a, a tui an sôm a, ruai an iṭhe a. An pathian inah an lût a, an fâkin an in a, Abimeleka khah vâni an sâm a.

²⁸Gaala khan, “Sekema mi hih ingkan im ei init tâk? Ithôm Abimeleka sin ei itho ranga? Ani khah tu ngân im ai nit? Gideona naipa ni mak im a! Zebula lak hih a thu thua om a nit a. Khannisela, ithôm a sin ei itho rang? Nin chibul Sekema pa Hamora, nin panam indingtu chungah iamom rei ba!

²⁹Hi mihei hih ki îruai ni sela chu O! Abimeleka kha kî heng pai rang a nit, a ziangah, ‘Ni sipaihei murdi iphung inla, zuang rithok inla, lei ridoi rei,’ kî ti pêk rang a nit,” a ti a.

³⁰Khante, kha khua lal Zebula khan Gaala thusîr khah a lei riatin chu a ning a thik a.

³¹Khanchu, vârrilet takkan Aruma khuaa Abimeleka ziangah khan, “Ringai ta, Ebeda naipa Gaala neh a urênghei Sekemah an zuang a, ni chunga rihelpui itumin khuaa mihei an îthor a nit.

³²Khasikah khan ni lômahei neh a zân a zânin zuang rithok unla, phûlah lei ribih rei.

³³Naktûk zîng inî suak kaneh an rining loi kârin khua khah zuang doi rei. Khanungchu, Gaala neh a lômahei khan nangni doi ranga an hong suak tenan chu nin thei dôrkan an chungah kut lei tlâk rei,” itia ril rangin mi a tir a.

³⁴Khanchu, Abimeleka neh a lômahei murdi khah a zân a zânin an thoi a, lôm ilika risiamin Sekem khua khah an hual tâk a.

³⁵Khante, Abimeleka neh a lômahei khan Gaala khah hong isuakin khopui lûtna kotbâiah â ding an mun chu an ribîkna mun ata khah an hong suak tâk a.

³⁶Gaala khan mipuihei a hang mun chu Zebula ziangah, “En ta, tlângsîpheia rithokin mipuihei an zuang so,” a ti a. Zebula khan a ziangah, “Tlâng rilîm soh miriam angkana nî mu nîng a ti,” a ti a.

³⁷Gaala khan, “En ta soh, ram lâi taka soh, mipui an zuang soh te, lôm khatkah vâng chu Meonenim saso thing[5] lampuiah an zuang soh,” a ti nôk a.

³⁸Khanungchu, Zebula khan a ziangah, “‘Abimeleka khah tum ai nit, a sin kin itho ngân rang?’ itia ne sîrna bâi khah taktiang im ai om tâk. Hihei hih ni mi musithei ngêi khah an init ino mani? Va suak inla, va doi zel ta roh ba,” a ti a.

³⁹Khanchu, Gaala khan Sekemhei ma a va ruai a, Abimeleka khah a va doi tâk a.

⁴⁰Khannisela, Abimeleka khan a lei rizûl a, Gaala khah lâizâm a tho tâk a. Khopui lûtna kotbâi kôl zel khomah khan mi itam takkah popliamin an idal pheng phung a.

⁴¹Abimeleka khah Aruma khuaa om a nit a. Khanchu, Zebula khan Gaala neh a urênghei khah Sekem khua ata a ûmisua a, om thei khâi mak a.

⁴²Khante, atûkah khan Sekem khua mihei khan phûlah va fe suak an tum iti Abimeleka khan a riat suak a.

⁴³Khanchu, a lômahei khah a ṭhui a, lôm ithumkan a siam a, phûlah khan an lei iruang ṭian a. Mipuihei khah khopui ata an hong suak a mun chu anmani khah a lei doi a, a lei that a.

⁴⁴Khante, Abimeleka neh lôm khatkahei khah rimot takkan an fe a, khopui lûtna kotbâiah khan an va ding a, kha sungah khan lôm inikahei khan phûla omhei murdi khah an lei that vang a.

⁴⁵Abimeleka khan khopui khah kha nî-ah khan sûn thluanin a doi a; khanchu, khopui khah a lâk a, a sunga mihei khah a that a; khopui khah â siat chit a, rinêng kha ichi arthe tâk a.

⁴⁶Khante, Sekem kulpui sunga om ruaitu murdihei khan kha thu khah an lei riatin chu Baal thuthlung biakna in kulbingah khan an lût riai a.

⁴⁷Kha munah khan an ribûm vang iti Abimeleka khan a lei riat a.

⁴⁸Khante, a lômahei neh khan Zalmon tlângah an fe a. Khantaka khan reipui a lâk a, thing iṭang ar-om a, arput a. Khante, a lômahei khom khah rimot takka a tho lam angkana tho rangin â ril a.

⁴⁹Khanchu, mi murdîn thing iṭang khah an ri-om chit a, an riput a, Abimeleka khah an zui a, thing kha kulbing ivêlkan an buk a, kulbingah khan an hâl khum tâk a; khangkan Sekem kulbinga mi om murdihei khah an thi a, ipa neh nupang sângkah vêl an nit.

⁵⁰Khanungchu, Abimeleka khah Thebes khuaah a fe a, Thebes khua khah a hual a, a lâk a.

⁵¹Khannisela, kha khopui sungah khan lal kulbing a om a, khopui sunga ipa, nupang, khua ruaituhei, mi murdi an rêngkan kulbing sungah khan an lût vang a, an rikhâr khap tâk a, inchung richamah an om a.

⁵²Khante, Abimeleka kha kulpui idoi rangin a hong a, ihâl itumin kulpui kotbâi tiang a hang fe a.

⁵³Khannisela, nupang khatkan bunôina lung hih Abimeleka lu-ah a zuk iṭhul a, a lu ru a koi a.

⁵⁴Khanungchu, rimot takkan â râlthluk ichôitu tlangvâl khah a koi a, a ziangah, “Ni khandai khah thuat inla, ne that ta roh; khanchu, mihein nupang ithat a nit ne ti no nih,” a ti a. Khanchu, tlangvâl khan â dôt a, a thi tâk a.

⁵⁵Khante, Israelhei khan Abimeleka khah a thi tâk iti an riat kaneh chu mi tin mahni in chitah an fe tâk a.

⁵⁶Khangkah khan a pa neh a urênghei sômsarikah chungah thilisual a tho sikin Pathianin Abimeleka khah întuangin ai thung a nit.

⁵⁷Sekem kho mihei siatna murdi khom khah Pathianin a zuang thung tâk a; Gideona naipa Jothama vânisâm khah an chungah ai ṭum tâk a nit.